Zumanɔ 83 - WE NU GALE 1995

Obe Israɛlɛ wa sambala Gale we kɛ owele wa tulu wa

¹ Zuma 'da Asafɛ

² Aa Gale, mɔ tɛ kpè tɛ mɔ gɔ, mɔ tɛ kpè nu mɔ, nɛ mɔ dungu iko gɔ.

³ Mɔ zɔ́ Owi sɛnɛ mɔ wa dɛ nga zu, nɛ wa kulu ngɔ we bɛ̃ we dɛ tɛ mɔ.

⁴ Wa mba li ngba wa, nɛ wa ba zã zu we dɛ tɛ owinɔ 'da mɔ, kɛ mɔ zɔ mɔ tɛ wa ni.

⁵ Wa na: “Lɛ nɛ́ hã lɛ kúmú obe Israɛlɛ, takɔ ta zu winɔ ele ngɔ wa fai.”

⁶ Mɛnɔ wa 'dafa ni, nɛ nu wa we kɔ, nɛ wa gba tɔkɔ sanga wa we bi mɔ.

⁷ Wi dɛ mɛnɔ ni, wi a Oedɔmɛ, Oismaɛlɛ Omoabɛ, Oagarɛ do Ogebalɛ,

⁸ Oamoni do Oamalɛkɛ, Ofilisti do owi Tirɛ.

⁹ Nɛ Oasiri wa mba 'bɔ li ngba wa do obe zã Lɔtɛ, we gala wa hã wa kpa ngawi.

¹⁰ Aa Gale, mɔ hã́ kpo kpo ngamɛ, kɛ mɔ hã zi hã Omadianɛ ni hã wa. Mɔ dɛ do wa ɔ nɛ kɛ mɔ dɛa zi do Sisra do Yabinɛ, tɛ nu lì Kisoni ni.

¹¹ Mɔ kumu zi wa tɛ kɔ le Ɛnɛ-Dɔrɛ, nɛ wɔlɔ wa mbulu, nɛ ma 'dafa nùi ɔ nɛ zubu ni.

¹² Mɔ dɛ́ do Onwanɔ 'da wa ɔ nɛ kɛ mɔ dɛa zi do Orɛbɛ do Zɛbɛ ni. Mɔ gbɛ́ ogã wi ngɔ wa ɔ nɛ kɛ mɔ gbɛa zi Zeba do Salmuna,

¹³ kɛ wa tɔ̃ zi na: “Lɛ bí nùi 'da Gale hã lɛ ba ma” ni.

¹⁴ Aa Gale 'da mi, mɔ dɛ́ na bũ kala wa la do wa, ɔ nɛ 'bulu wɔkɔsɔ ni.

¹⁵ Mɔ dɔ́ wa hã wa bɛlɛ ɔ nɛ we bɛlɛ kɔla, tabi owɔkɔsɔ ngɔ kala ni.

¹⁶ Mɔ ndáká 'do wa do gba bũ kamba, nɛ mɔ dɛ́ na, wa tana kili dati gba bũ kamba 'da mɔ.

¹⁷ Aa NWA, mɔ hã sape hã wa na, ma dĩlĩ zu wa, nɛ mɔ dɛ na, wa ĩ ti ngawi 'da mɔ.

¹⁸ E kɔ wa tana kili 'da fala fai, nɛ wa fe do sape.

¹⁹ E kɔ wa ĩ na, NWA wi a mɔ zu mɔ kpo, mɔ a Gale ngɔ mɔ nyanga nza vɛ̃.