Zumanɔ 81 - WE NU GALE 1995

Zuma dungu do ɛngga

¹ Zuma 'da Asafɛ

² Aa nɛ, nɛ dɛ́ yangga, nɛ nɛ zɛ́ kaliã hã Gale, kɛ a a wi zɔ mɔ tɛ lɛ ni. Nɛ zɛ́ kɔ̃ nɛ hã a, Gale 'da yaa lɛ Yakɔbɔ.

³ Nɛ kálá biã, do gã kundu, do be kundu, hã nɛ zɛ́ do dia zuma.

⁴ Nɛ dámá mɔtũlũ do ngba soe ɛngganɔ 'da lɛ, do ngba soe mbé hɔa zɛkɛ, do ngba soe kɛ zɛkɛ fi mbata ni.

⁵ Ki ni a mbula 'da lɛ obe Israɛlɛ, wi ia mbula ni a Gale 'da Yakɔbɔ.

⁶ A ba zi ma hã lɛ obe Israɛlɛ do ngba soe kɛ a bi zi Oezipeto ni. Mi zila wala gɛlɛ wele kɛ mi ĩ̀ ti nɛ gɔ ni, nɛ ma tɔ̃ hã mi na:

⁷ “Mi fua dĩ tole zu 'baka mɔ, nɛ mɔ la fala dɛ nga dɛa to.

⁸ Mɔ zi a kɔ ngamɔ, nɛ mɔ sa mɔ hã mi, nɛ mi kpasa mɔ. Mi fua mɔ kɔ 'bakoe mɔ kpa zi ni, nɛ mi yamba sila mɔ tɛ nu lì Mɛriba.”

⁹ Gale na: “Aa nɛ, owinɔ 'da mi, obe Israɛlɛ, mi nɛ mbese nɛ do we, nɛ zélé mi Sɛ.

¹⁰ Ɔ do kɛ nɛ zele sɔ mbulanɔ 'da mi, nɛ nde nɛ sámbálá sɔ gele gale gɔ.

¹¹ Mi a NWA Gale 'da nɛ, mi fua zi nɛ ngɔ nù Ezipeto. Nɛ 'bã́ nu nɛ, nɛ mi hã sɛ nyɔngɔmɔ hã nɛ.

¹² “Nɛ nde nɛ, owinɔ 'da mi, obe Israɛlɛ, nɛ bɛ̃a mbulanɔ 'da mi, nɛ nɛ dɛ̀ ma gɔ.

¹³ Ma hã mi la nɛ na, nɛ dɛ mɔ nga zu, do mɔ yɔndanɔ nɛ́ kɛ zã nɛ kɔ̃a ni.

¹⁴ Ɔ do kɛ nɛ owinɔ 'da mi, obe Israɛlɛ, nɛ zele sɔ nu mi, kɔ nɛ dɛ sɔ mbulanɔ 'da mi,

¹⁵ nɛ mi bi sɔ owi sɛnɛ nɛ, nɛ mi nɛ ngɔ wa vɛ̃ do ti.

¹⁶ Nɛ owinɔ wa bɛ̃a gɛnɛ mi NWA ni, wa bili sɔ zu wa nù dati mi, nɛ mi hã sɔ etumbu hã wa fai.

¹⁷ Nɛ mi hã sɔ dia nyɔngɔmɔ hã nɛ owinɔ 'da mi, nɛ nɛ nyɔngɔ sɔ nɔ gɔlɔ, nɛ zã nɛ hɛ̃.”