Zumanɔ 80 - WE NU GALE 1995

¹ Zuma 'da Asafɛ

² Aa mɔ, wi zɔ mɔ tɛ lɛ obe Israɛlɛ, mɔ zélé lɛ sɛ! Mɔ kɛ mɔ kpe dati lɛ ɔ nɛ wi kpe dati obata ni, mɔ gɛ́ zala mɔ hã mɔ zele lɛ sɛ. Mɔ kɛ mɔ dungu ngɔ kpongbo nwa 'da mɔ ngɔ kerubinɛnɔ ni, mɔ bé dɔ̃lɔ̃ li 'da mɔ dɛ nza,

³ hã lɛ Owi nu kpala Efraimɛ, Bɛnzamɛ do Manase, lɛ zɔ ma. Mɔ bé ngawi 'da mɔ hã lɛ, mɔ tɛ́ hã mɔ kpasa lɛ.

⁴ Aa Gale, mɔ gésé dɔ̃lɔ̃ li 'da lɛ hã lɛ, mɔ bé dia zã hã lɛ, nɛ lɛ kpasa sɛ.

⁵ Aa NWA Gale kɛ mɔ do nganda vɛ̃, zã mɔ nɛ nɔ̃lɔ̃ dɛ tɛ lɛ, owinɔ 'da mɔ, nɛ mɔ bɛ̃ sambala 'da lɛ gbaa soe ki nge nde?

⁶ Lɛ nyɔngɔ 'bako ti kɔ̃ mɔ, nɛ mɔ isi bila mili kɔ̃a dɛ nu lɛ.

⁷ Mɔ la lɛ na, ogele winɔ kɛ wa ɔ kɛ zã lɛ ni, wa bi nùi 'da lɛ, nɛ Owi sɛnɛ lɛ wa fi tɔɛ zu lɛ.

⁸ Aa Gale kɛ mɔ do nganda vɛ̃, mɔ gésé dɔ̃lɔ̃ li 'da lɛ hã lɛ. Mɔ bé dia zã hã lɛ, nɛ lɛ kpasa sɛ.

⁹ Mɔ kala zi lɛ ngɔ nù Ezipeto, ɔ nɛ wele kala be bɔlɔ te vinɔ, nɛ a mi ma gele fala ni. Mɔ ndaka ogele winɔ we a lɛ dɛ olo wa.

¹⁰ Mɔ 'dafa fala te vinɔ 'da mɔ, nɛ ma gã, nɛ liã nɛ ba nù, nɛ ma sanza kpa ngɔ nùi vɛ̃.

¹¹ Gɔ̃lɔ̃ nɛ kila ngɔ kalanɔ, nɛ gbakɔ̃ nɛ kũ dɛ zu ogã te sɛdrɛnɔ,

¹² nɛ ma dulu gbaa, nɛ ma hɔ nu gba lì Meditɛrane do Efratɛ.

¹³ Kɔ gulu kɛ mɔ gbini ngbo tɛ nɛ do'do, nɛ owi la walanɔ wa 'danga ma we ge nde?

¹⁴ Ongbianɔ wa tulu ma dɛ nù, nɛ osa'de zamɛnɔ wa nyɔngɔ zu nɛ.

¹⁵ Aa Gale kɛ mɔ do nganda vɛ̃, mɔ kpóló tɛ mɔ we lɛ. Mɔ zɔ mɔ tɛ lɛ yolo do li nza ngɔ i, mɔ tɛ́, hã mɔ kpasa lɛ ovinɔnɔ 'da mɔ.

¹⁶ Mɔ zɔ́ mɔ tɛ bɔlɔ te vinɔɛ, kɛ mɔ mi zi ma do tɛ mɔ, nɛ ma gã ni.

¹⁷ Owele wa wa ma, nɛ wa a ma li we, kɔ mɔ bé nɔ̃lɔ̃ zã 'da mɔ hã owinɔ ni, nɛ mɔ kumu wa do'do.

¹⁸ E kɔ mɔ zɔ mɔ tɛ lɛ owinɔ kɛ mɔ saka zi lɛ, nɛ mɔ hã zi ngawi hã lɛ ni.

¹⁹ Mɔ dɛ na mɛ ni, nɛ nde lɛ lá sɛ 'bɔ mɔ gɔ. Mɔ kɔ̃́, nɛ mɔ hã kpasi hã lɛ, nɛ lɛ dɔnggɔ sɛ mɔ.

²⁰ Aa NWA Gale kɛ mɔ do nganda vɛ̃, mɔ gésé lɛ dɛ ngɔ nùi 'da lɛ, mɔ bé dia zã hã lɛ, nɛ lɛ kpasa sɛ.