Zumanɔ 79 - WE NU GALE 1995

Sambala 'da owinɔ kɛ wa tia li bolo

1 Zuma 'da Asafɛ

¹ Zuma 'da Asafɛ Aa Gale, ogele wele wa tɛa, nɛ wa bi nùi 'da mɔ. Wa faka Tɛmpɛloe 'da mɔ kɛ ma santo, nɛ wa 'danga le Yeruzalɛmɛ vɛ̃ do'do.

² Wa da wɔlɔ owi dɛa tonɔ 'da mɔ hã ogba nɔɛ, do osa'de zamɔ na, wa nyɔngɔ ma.

³ Wa gbɛa owinɔ 'da mɔ, nɛ tɔkɔ tɛ wa fua nɛ lì ni, nɛ ma zĩ nu le Yeruzalɛmɛ takpa, nɛ nde wele kpo tɛ̃ we mi wɔlɔ wa gɔ.

⁴ Ongba lɛ wi tɔanɔ wa dã lɛ owinɔ 'da mɔ. Owinɔ wa ɔ kɛ zã lɛ ni, wa fi tɔɛ zu lɛ, nɛ wa hã sape hã lɛ.

⁵ Aa NWA, zã mɔ nɛ nɔ̃lɔ̃ dɛ tɛ lɛ fai nde? Dã 'da mɔ kɛ ma bɛlɛ lɛ ɔ nɛ we gɛ, ma nɛ 'bana fai nde?

⁶ Mɔ bé nɔ̃lɔ̃ zã 'da mɔ hã ogele winɔ, kɛ wa ĩ̀ ti mɔ gɔ, nɛ wa dɔ́nggɔ́ mɔ gɔɛ ni.

⁷ We kɛ wa bi nùi 'da mɔ, nɛ wa 'danga ma, nɛ wa gbɛa owinɔ 'da mɔ.

⁸ Mɔ tɛ kɔ̀'dɔ̀ lɛ we o'dã mɛnɔ 'da oyaa lɛ gɔ, mɔ kɔ̃́, nɛ mɔ ĩ 'bako hã lɛ dɔ̃ dɔ̃, nɛ mɔ tɛ zĩ̀ tɛ mɔ zĩ gɔ, tua kɛ sila lɛ 'bɔa do'do.

⁹ Aa Gale, mɔ kpásá lɛ, mɔ gbáká lɛ, nɛ mɔ fó ku'da 'dã mɛnɔ zu lɛ do'do, we duzu dɔ̃lɔ̃ li 'da mɔ.

¹⁰ Gulu kɛ mɔ la ogele wele, nɛ wa aka nu lɛ na: “Gale 'da nɛ a do nde” we ge nde? E kɔ mɔ bili nu gbã hã ogele winɔ, kɛ wa a tɔkɔ tɛ wi tonɔ 'da mɔ nu ni. Mɔ hã etumbu hã wa dɛ li lɛ, hã lɛ zɔ ma.

¹¹ Mɔ gɛ́ zala mɔ, hã mɔ zele gɛlɛ owi bɔlɔkɔnɔ kɛ wa ala nu wa gɛ, nɛ mɔ bé ngawi 'da mɔ, hã mɔ kpasa wa kɔ fie wa nɛ fe ma ni.

¹² Aa NWA, ogele winɔ wa dã mɔ, kɔ mɔ bílí nu gbã dɛlanɔ ni hã wa fala sambo.

¹³ 'Do nɛ, nɛ lɛ owinɔ 'da mɔ, kɛ mɔ zɔ mɔ tɛ lɛ ni, lɛ gese sɛ iɔ̃nae hã mɔ fai, nɛ lɛ dɔnggɔ sɛ mɔ kɔ sabɛlɛ do sabɛlɛ.