Zumanɔ 78 - WE NU GALE 1995

Gale bia mbula hã owinɔ 'da a

1 Zuma 'da Asafɛ

¹ Zuma 'da Asafɛ Aa nɛ, owinɔ 'da mi, nɛ zélé mbulanɔ 'da mi, nɛ gɛ́ zala nɛ, hã nɛ zele wenɔ mi tɔ̃ ma gɛ.

² Mi nɛ wele we hã nɛ do gba wia we, mi nɛ tɔ̃ gulu ɔngbamɛnɔ ma la zi dati ni hã nɛ.

³ Obaa lɛ wa tɔ̃a lɛnggɛ mɛnɔ ni hã lɛ, nɛ lɛ zila ma, nɛ lɛ ĩ 'bɔ ti ma.

⁴ Lɛ úsú sɛ ma do obe zã lɛ gɔ, Lɛ be sɛ gulu dɔ̃lɔ̃ li 'da NWA, do ngawi 'da a, do oɔngbamɛnɔ a dɛa ni hã wa.

⁵ A ia zi mbula hã lɛ obe Israɛlɛ, obe zã Yakɔbɔ. A ba nu a hã oyaa lɛ na, wa be wenɔ ni hã lɛ obe zã wa.

⁶ Na mɛ ni, obenɔ 'do lɛ gɛ wa yambala sɛ ma, nɛ wa be sɛ 'bɔ ma hã obe zã wa na,

⁷ wa gbíní zã wa do Gale, nɛ ta zu wa tɛ èlè ngɔ gba mɛnɔ a dɛa zi ni gɔ. Wa dɛ́ mbulanɔ 'da a,

⁸ nɛ dɔ wa dɛ́ mɔ tɛ wa nɛ́ oyaa lɛ ni gɔ. Oyaa lɛ wa dɛa zi nga zu, nɛ wa bɛ̃a we nu Gale. Wa è zi sila wa ngɔ Gale gɔ, nɛ wa gbìnì zi zã wa do a gɔ.

⁹ Owi nu kpala Efraimɛ wa zɔlɔ zi mɔ bi bolo gɔ. Wa zi do okpili do nzabele boe, nɛ nde do ngba soe bole tia ni, nɛ wa yu.

¹⁰ Wa 'danga zi gba tɔkɛ 'da wa do nwa, nɛ wa bɛ̃a we dɛ mbulanɔ 'da a.

¹¹ Ta zu wa ila zi ngɔ ogba mɛnɔ, do ɔngbamɛnɔ kɛ a dɛa zi, nɛ wa zɔa ma ni.

¹² Gale dɛa zi ɔngbamɔ kɔ le Soanɛ, tɛ ngɔ nù Ezipeto, nɛ oyaa lɛ wa zɔa ma.

¹³ A kɛ̃a zi sanga gba lì, takɔ wa la do di ni, nɛ a dɛa na, lì fi gbongbo kɛ zã wa ɔ nɛ ngbo ni.

¹⁴ Do gba wese, nɛ a kpe zi dati wa do gba kutu, nɛ do tũi vɛ̃, a kã zi wa do nyɛa we.

¹⁵ A gba zi sanga ta li gba zɔ̃ i, takɔ lì yolo ndũu ti nù hã ma kũ, hã owinɔ wa nɔ ma.

¹⁶ A dɛa na, lì yolo kɔ ta, nɛ ma go'do, nɛ ma fo.

¹⁷ Nɛ nde wa là zi fala dɛ 'dã mɔ dɛ 'da Gale, kɛ a nɛa ngɔ mɔ vɛ̃ ni gɔ. Wa bɛ̃a zi 'bɔ nu a dɛ li gba zɔ̃ ni.

¹⁸ Wa yamba sila Gale do mbana, nɛ wa aka a na, a ha nyɔngɔmɛ kɛ ma wia do wɔ zã lo ni hã lo.

¹⁹ Nɛ wa wila 'dã we hã Gale, nɛ wa aka tɛ wa na: “Gale wia we hã nyɔngɔmɔ hã lɛ dɛ li gba zɔ̃ɛ gɛ nde?

²⁰ Mɛ a gbãlã we na, a zɛa ta, nɛ lì gu'da kɔ nɛ, nɛ ma fua, nɛ nde a wia 'bɔ we hã nyɔngɔmɔ, do mulu sa'de hã lɛ owinɔ 'da a nde?”

²¹ Nɛ nwa zila lɛnggɛnɔ ni, nɛ zã a nɔ̃lɔ̃ dɛ tɛ owinɔ 'da a, obe Israɛlɛ, nɛ nɔ̃lɔ̃ zã 'da a bɛlɛ wa ɔ nɛ we ni.

²² We kɛ wa gbìnì zã wa do a na, a wia tɛ kpasa lo ni gɔ.

²³ Gɛnɛ kɔ na mɛ ni, nɛ NWA ba nu ɛ hã otũ kolonɔ, nɛ a fí nu ngbo li nza,

²⁴ nɛ nyɔngɔmɔ yula li nza i, nɛ ma ala nù ɔ nɛ kolo ni. A tumba mana hã owinɔ 'da a na, wa nyɔngɔ.

²⁵ Nɛ wele do wele nyɔngɔ kpo kpo nyɔngɔmɛ, kɛ anzɛnɔ wa nyɔngɔ ni, nɛ zã a hɛ̃a nɛ́ kɛ ma wia do a ni.

²⁶ Nɛ Gale dɛa na, bũ yolo si ba gɔtɔ hã ma fi, nɛ ma la si 'biti gba wese.

²⁷ Nɛ a tumba gba gili onɔɛ, wa dɛlɛ wena ɔ nɛ kɛnzɛ nu gba lì ni hã owinɔ 'da a.

²⁸ Nɛ nɔɛnɔ ni wa ala nù li fanda wa ɔ nɛ ni, dɛ kɛ zã tɔa tandenɔ 'da wa.

²⁹ Gale hã mulu sa'de kɛ wa kɔ̃a ni hã wa, nɛ winɔ wa nyɔngɔ nɔɛnɔ gbaa, nɛ ma we do wa.

³⁰ Nɛ nde wɔ nyɔngɔmɛ ni 'bana zi kɔ sila wa, nɛ wa dungu tɛ nyɔngɔ ma fai,

³¹ nɛ zã Gale nɔ̃lã dɛ tɛ wa, nɛ a gbɛa osɔ̃a tɛ zagbãlãnɔ sanga wa do'do.

³² Gɛnɛ kɔ kɛ NWA dɛa oɔngbamɛnɔ ni, nɛ nde owinɔ 'da a wa gbìnì zã wa do a gɔ, nɛ wa 'bana zi tɛ dɛ 'dã mɔ fai.

³³ Nɛ a tumba ngamɔ dɛ ngɔ wa na, ma gbanga wa, hã wa fe, hã wa la ngɔ nù gɛ dɔ̃ ɔ nɛ bũ ni.

³⁴ Nɛ 'da fala kɛ Gale gbɛa ombe sanga wa ni, nɛ otala wa wa kpula tɛ wa dɛ 'da a, nɛ wa gɔ gbaka wi kɔ̃ a.

³⁵ Nɛ ta zu wa gba na, Gale kɛ a nɛa ngɔ mɔ vɛ̃ ni, a a wi bi bolo zu lo, a ɔ nɛ kpangba ta amba zu lo ni.

³⁶ Nɛ nde wa tɔ̃ zi a bɛlɛ iko, fo gbãlã we nu wa bina.

³⁷ Wa è zi sila wa ngɔ a ngboo gɔ, nɛ wa yala gba tɔkɛ kɛ a gba zi do wa ni.

³⁸ Nɛ nde Gale ĩ 'bako hã wa, nɛ a fua ku'da 'dã mɛ 'da wa, nɛ a kùmù wa gɔ. A kunu sila a dati wa fala dɛlɛ wena, nɛ a bè nɔ̃lɔ̃ zã 'da a dɛ nza gɔ.

³⁹ A ĩ na, wa a Owele iko, dungu nza 'da wa la ɔ nɛ bũ ni.

⁴⁰ Wa 'bana zi li gba zɔ̃ i, nɛ wa bɛ̃a nu Gale fai, nɛ wa tulu a fala dɛlɛ wena.

⁴¹ Wa yamba sila a 'do ngbɛ ɛ do 'do ngbɛ ɛ, nɛ dɛa to tɛ wa hã 'bako hã a, kɛ a a Gale santo 'da lɛ obe Israɛlɛ ni.

⁴² Nɛ ta zu wa ila ngɔ gba mɛ kɛ a dɛa zi we wa, do ngba soe kɛ a fua wa ti kɔ̃ Owi sɛnɛ wa ni.

⁴³ A bia zi ngawi 'da a dɛ nza, nɛ a dɛa oɔngbamɔ kɔ le Soanɛ, tɛ ngɔ nù Ezipeto.

⁴⁴ A kifi lìnɔ do tɔkɔ, nɛ Oezipeto wa zi 'bɔ do lì nɔ nɔa bina.

⁴⁵ A tumba ozĩ tolo we nɔ tɔkɔ tɛ wa, nɛ a tombo 'bɔ odalɛ dɛ ngɔ nùi 'da wa na ma 'danga.

⁴⁶ Nɛ a tumba odɔla, nɛ wa nyɔngɔ kpalɛ li fɔnɔ 'da wa.

⁴⁷ Nɛ gba kolo tɛa do gbãlã mũlũ, nɛ ma 'danga te vinɔnɔ do te sikɔmɔrɛnɔ 'da wa.

⁴⁸ Nɛ gbãlã mũlĩ gbɛa onadalamɛnɔ 'da wa, nɛ ua dã kolo tia ngɔ osa'denɔ 'da wa, nɛ ma gbɛ wa.

⁴⁹ Nɛ zã Gale nɔ̃lɔ̃ dɛ tɛ Oezipeto la li ngele, nɛ a hã gã 'bako hã wa. A tumba oanzɛ gbɛ winɔ 'da a dɛ ngɔ wa.

⁵⁰ A kùnù sila a gɔ, a bia nɔ̃lɔ̃ zã 'da a, nɛ a dɛa na, 'dã zɛlɛ gbɛ wa.

⁵¹ Nɛ a gbɛa Okuti bulu benɔ, kɔ nu fɛlɛ kula 'da Oezipeto vɛ̃.

⁵² 'Do nɛ, nɛ Gale kpia ti owinɔ 'da a, nɛ wa hɔa nza ɔ nɛ odua kɔ ba'de ni, nɛ a la do wa do li gba zɔ̃.

⁵³ A kã wa do lɔa tɛ wa, nɛ wa dɛ́ zi kili mɔ kpo gɔ, nɛ nde gba lì nɛa ngɔ owi sɛnɛ wa fɛɔɔ.

⁵⁴ Nɛ a ia obe Israɛlɛ ngɔ nùi 'da a kɛ ma santo, mɛ a nùi ngɔ kala kɛ a ba ma do ngawi 'da a ni.

⁵⁵ Nɛ a ndaka ogele winɔ di ni do'do, nɛ a kɛ̃ nùi olo wa ni hã wa obe Israɛlɛ, nɛ wa ɔ kɔ tɔa olo ogele winɔ ni.

⁵⁶ Nɛ nde wa bɛ̃a nu Gale, kɛ a nɛa ngɔ mɔ vɛ̃ ni, nɛ wa yamba sila a, nɛ wa dɛ̃ mbulanɔ 'da a gɔ.

⁵⁷ Wa vũ to tɛ̃ a, nɛ wa dɛa 'dã mɔ ɔ nɛ oyaa wa ni. Wa dè 'bɔ li Gale gɔ, wa ɔ li a nɛ nzabele, kɛ fɛlɛ nɛ zafa do'do ni.

⁵⁸ Wa nɛa tɛ fala sambala ogale bɛlɛnɔ, nɛ wa dɔnggɔ osɛa te dɛ di ni. Na mɛ ni, wa tulu nwa, nɛ zã a nɔ̃lɔ̃ dɛ tɛ wa.

⁵⁹ Gale zɔa na mɛ ni, nɛ dã ba a, nɛ a bɛ̃a gɛnɛ obe Israɛlɛ.

⁶⁰ Nɛ a yu kɔ tɔa Tande 'da a tɛ kɔ le Silo, kɛ a ɔ zi kɔ nɛ dɛ sanga owinɔ ni do'do.

⁶¹ Nɛ a dɛa na, ogele wi wa ba Sanduku Gba Tɔkɛ, kɛ ma be ngawi, do dɔ̃lɔ̃ li 'da a ni, hã wa la do ma.

⁶² Nɛ zã a nɔ̃lɔ̃ dɛ tɛ owinɔ 'da a, nɛ a la wa dɛ kɔ̃ Owi sɛnɛ wa na wa gbɛ wa.

⁶³ Nɛ obe zagbãlãnɔ wa fia li bolo, nɛ obe zɔnganɔ wa zɔlɔ wi wili we ba wa.

⁶⁴ Nɛ onganganɔ wa fia nga fio, nɛ wi fio wili kpo 'bànà we he kɔ̃a fio wa gɔ.

⁶⁵ 'Do nɛ, nɛ NWA kulu ngɔ, ɔ nɛ nga soda kɛ dɔ̃ zĩ zu a ni,

⁶⁶ nɛ a ndaka 'do owi sɛnɛ a, nɛ a bi wa, nɛ a te do wa, nɛ wa kpa sape fai.

⁶⁷ A bɛ̃a gɛnɛ obe zã Yozɛfu, nɛ a sàkà 'bɔ nu kpala Efraimɛ gɔ.

⁶⁸ Nɛ nde a saka nu kpala Yuda, nɛ a kɔ̃a gɛnɛ kala Sioni.

⁶⁹ Nɛ a dɛa tɔa Tɛmpɛloe 'da a dɛ di ni. A zĩ ma nɔ wena ɔ nɛ li nza ni, nɛ ma 'bana sɛ fai ɔ nɛ nùi ni.

⁷⁰ Nɛ a nɛa, nɛ a kpa Davidi tɛ zɔ mɔ tɛ obatanɔ, nɛ a saka a do wi dɛa toe 'da a.

⁷¹ A fua a 'do onadalamɛnɔ 'da a, nɛ a e a do nwa ngɔ owinɔ 'da a, obe Israɛlɛ, nɛ a hɔa wi zɔ mɔ tɛ wa.

⁷² Nɛ Davidi dɛa toe 'da a do hã zã, do sila a kpo, nɛ a kpia dati owinɔ 'da NWA do dia nɛ ngboo.