Zumanɔ 77 - WE NU GALE 1995

Gale nganda sila owinɔ 'da a kɔ ngamɔ

¹ Zuma 'da Asafɛ

² Mi sa mɔ hã mɔ Gale, nɛ mi ala nu mi hã mɔ. Mi sa mɔ hã mɔ na, mɔ gɛ́ zala mɔ hã mi.

³ Do ngba soe ngamɔ, nɛ mi siki li mi dɛ 'da mɔ NWA. Nɛ do tũi, nɛ mi ɛfɛ kɔ̃ mi hã mɔ, nɛ mi sambala mɔ fai ndɔti nɛ bina, nɛ mi kɔ̃́ na, wa amba mi se'de gɔ.

⁴ Fala kɛ ta zu mi gba ngɔ mɔ Gale, nɛ mi ama gba ama. Fala kɛ mi lengge mɔ Gale, nɛ sila mi gɔnɔ, nɛ ngawi 'da mi ma e.

⁵ Nɛ mɔ dɛ na, mi tɛ ùmù li mi do tũi ni gɔ, nɛ zu mi ma vĩ, nɛ mi wè 'bɔ tɛ wele we gɔ.

⁶ Nɛ ta zu mi gba ngɔ mɛnɔ mɔ dɛa zi kɔ sabɛlɛnɔ ma la zi dati ni.

⁷ Nɛ do tũi, nɛ mi lengge we gbaa, nɛ mi fa gulu mɛnɔ ni, nɛ mi aka tɛ mi na:

⁸ “NWA bɛ̃a gɛnɛ lɛ fai nde? A kpá sɛ 'bɔ mbé yangga we lɛ gɔ nde?

⁹ Kɔ̃a zã 'da a we lɛ ma Sɔkpɔ fai nde? A wélé sɛ 'bɔ mbé we hã lɛ gɔ nde?

¹⁰ Ta zu Gale ila ngɔ dɛ 'bako hã lɛ nde? Zã a nɔ̃lã dɛ tɛ lɛ, nɛ a da sila a ngɔ lɛ fai nde?”

¹¹ Nɛ mi na: “Sila mi ma zɛlɛ, mba gɔ, we kɛ Gale kɛ a nɛa ngɔ mɔ vɛ̃ ni, a dɛ́ 'bɔ mɔ kpo we duzu lɛ gɔ.”

¹² Aa NWA, ta zu mi gba ngɔ de dɛa mɛnɔ 'da mɔ. Mi tɔ̃ sako ɔngbamɛnɔ 'da mɔ,

¹³ nɛ mi lengge mɛnɔ vɛ̃ kɛ mɔ dɛa zi ni.

¹⁴ Aa Gale, mɛnɔ vɛ̃ kɛ mɔ dɛa ni, ma be na, mɔ a santo. Fo mbé gale kɛ a gã nɛ́ mɔ ni bina.

¹⁵ Mɔ zu mɔ kpo a mɔ dɛ oɔngbamɛnɔ, mɔ bia zi ngawi 'da mɔ hã ogele nu kɔnggɔnɔ.

¹⁶ Do ngawi 'da mɔ, mɔ kpasa zi lɛ owinɔ 'da mɔ, kɛ lɛ a obe zã Yakɔbɔ do Yozɛfu ni.

¹⁷ Aa Gale, mɔ hɔa nu lìnɔ, nɛ ma dɛa kili, nɛ ma tana gbaa ti go'do nɛ i vɛ̃.

¹⁸ Nɛ lì kolo yula kɔ gba tũ kolonɔ, nɛ ma tɛa dɛ nù nga, nɛ kolo ua dã gbangga dɛ kɔ nɛ ni, nɛ kole ni nyɛa li ɛ falanɔ vɛ̃.

¹⁹ Giti ua dã kole 'da mɔ dɔ̃lɔ̃, nɛ kolo nyɛa li ɛ gbarr kpa ngɔ nù gɛ vɛ̃, nɛ nùi tana kili gbulu gbulu.

²⁰ Mɔ fi li wala 'dɔ lì, nɛ mɔ la do 'dɔ gba 'du lìnɔ, nɛ wele kpo zɔ̀ olo nyanga mɔ gɔ.

²¹ Mɔ kpia dati owinɔ 'da mɔ, nɛ mɔ ia Mɔizɛ do Aroni na, wa zɔ mɔ tɛ wa.