Zumanɔ 75 - WE NU GALE 1995

Gale a wi 'bili ngbangga 'da owinɔ

¹ Zuma 'da Asafɛ

² Aa Gale 'da lɛ, lɛ sambala mɔ, nɛ lɛ gese iɔ̃nae hã mɔ. Lɛ dɔnggɔ gã wi 'da mɔ, nɛ lɛ tɔ̃ lɛnggɛ ɔngbamɛnɔ mɔ dɛa ni.

³ NWA Gale tɔ̃a na: “Do ngba soe kɛ mi ia we 'bili do ngbangganɔ ni, nɛ mi gɔnɔ sɛ wenɔ do bɔlɔ nɛ ngboo.

⁴ Nùi wia we yaka nɛ, nɛ mɛnɔ ngɔ nù gɛ vɛ̃ wia tɛ tana nɛ, nɛ nde mi a mi zĩ nyanga nɛ na, ma nganda.

⁵ Mi tɔ̃a hã owi dɛ 'dã mɛnɔ na, wa la fala dɛ gã zu do'do.

⁶ Wa tɛ bà zu wa ngɔ we dɛ wali gɔ, nɛ wa tɛ tɔ̃̀ 'bɔ lɛnggɛ ngatɛ gɔ.”

⁷ Wi 'bili we yóló sɛ si 'biti gba wese, tabi gɛ̃a wese gɔ, nɛ a yóló sɛ si gbãlã ngɔ tabi si ba gɔtɔ gɔ.

⁸ Wi a Gale hã a 'bili sɛ wenɔ, a fi sɛ ombe winɔ li ngbangga, nɛ a fo ombe kɔ ngbangga do'do.

⁹ NWA ba bila dɛ kɔ̃ a, bila ni dunu do nga dɔ̃ nɔ̃lɔ̃ zã 'da a. A a dɔ̃ɛ ni we isi dɛ nu o'dã winɔ ngɔ nù gɛ. Wa vɛ̃ wa nɔ sɛ, nɛ ma e dɛ nu wa kpɛrr.

¹⁰ Nɛ mi, mi lá sɛ fala ga zuma hã Gale 'da Yakɔbɔ gɔ, mi dɔnggɔ sɛ zu li a fai.

¹¹ A gbini sɛ ngawi 'da o'dã winɔ, nɛ nde ngawi 'da Owi bɔlɔ zunɔ, ma gã sɛ dɛ dati fai.