Zumanɔ 74 - WE NU GALE 1995

Owinɔ 'da Gale wa sa mɔ hã a na a gbaka lo

1 Zuma 'da Asafɛ

¹ Zuma 'da Asafɛ Aa Gale, gulu kɛ mɔ bɛ̃a gɛnɛ lɛ fai we ge nde? Gulu kɛ zã mɔ nɔ̃lɔ̃ dɛ tɛ lɛ owinɔ 'da mɔ fai we ge nde?

² Mɔ kɔ̃, nɛ ta zu mɔ tɛ èlè ngɔ lɛ owinɔ 'da mɔ gɔ. Mɔ saka zi lɛ belee, nɛ mɔ fua lɛ kɔ ngbá, nɛ mɔ ia lɛ do winɔ 'da mɔ. Mɔ kɔ̃́, nɛ ta mɔ gba ngɔ Sioni, kɛ mɛ a kala kɛ mɔ ɔ zi ngɔ nɛ ni.

³ Aa Gale, mɔ tɛ́, hã mɔ yɛ́nggɛ́ nu le kɛ ma 'danga gɛ, owi sɛnɛ lɛ wa 'danga tolenɔ kɔ Tɛmpɛloe vɛ̃.

⁴ Owi sɛnɛ mɔ wa hia mɔ bolo dɛ fala mɔ kpa do ngba mɔ do lɛ ni ngboo, nɛ wa zĩ bɛndɛlɛ bolo 'da wa dɛ di ni.

⁵ Wa tɛa ɔ nɛ owi gɔmɔ te, kɛ wa ba kpɛnɛmɔ, nɛ wa gɔmɔ do te dɛ nu ni.

⁶ Wa zɔa Tɛmpɛloe kɛ wa gɛzɛ tɛ nɛ gɛza ni, nɛ wa kala odugbu do okpɛnɛmɔ, nɛ wa gɔmɔ ma dɛ nù.

⁷ Wa fi we tɛ Tɛmpɛloe 'da mɔ, nɛ wa gbɛsa tɔa 'da mɔ, nɛ wa faka ma do'do.

⁸ Nɛ wa 'dafa na, wa bi lɛ hã wa gbɛ lɛ vɛ̃, nɛ wa dɔ falanɔ vɛ̃ kɛ lɛ dɔnggɔ do mɔ ngɔ nùi gɛ ni do'do.

⁹ Lɛ zɔ́ 'bɔ mɔ kɛ ma be na, mɔ sanga lɛ boe ni gɔ. Fo wi gba olo nu mɔ kɛ a 'bana ni kpo bina. Nɛ wele kpo sanga lɛ gɛ, a ĩ̀ ti ngba soe kɛ mɛnɔ ni vɛ̃ ma Sɔkpɔ sɛ nɛ ni gɔ.

¹⁰ Aa Gale, owi sɛnɛ lɛ wa nɛ tulu mɔ gbaa soe ki nge nde? Wa nɛ 'danga zu li mɔ fai ndɔti nɛ bina nde?

¹¹ Gulu kɛ mɔ kasa kɔ̃ mɔ dɛ ngu'du mɔ, nɛ mɔ kɔ̃ we gala lɛ gɔ we ge nde?

¹² Aa Gale, yolo do gulu, mɔ fai a nwa 'da lɛ. Zi dati, mɔ gala zi lɛ na, lɛ nɛ ngɔ owi sɛnɛ lɛ tɛ ngɔ nùi gɛ.

¹³ Mɔ kɛ̃a zi sanga gba lì do ngawi 'da mɔ, nɛ mɔ ua zu ogba sɔ̃ sa'de 'dɔ lìnɔ.

¹⁴ Mɔ gbini sanga gbãlã zu wa kisi kisi, nɛ mɔ hã ma hã osa'de li gba zɔ̃nɔ na, wa nyɔngɔ.

¹⁵ Mɔ hã wala na o'denɔ do ozu lìnɔ ma fo, nɛ mɔ dɛa na, gba lì kɛ ma ɔ̃́sɔ̃́ mbe fala kpo gɔ ni, ma ɔ̃sɔ̃, hã ma na nù.

¹⁶ Mɔ a wele gba wese, nɛ mɔ 'bɔ a wele tũ, mɔ a mɔ dɛa wese, do zɛkɛ do osɔlanɔ, nɛ mɔ a wa tɛ li nza i.

¹⁷ Wi zĩ ngbala nùi vɛ̃ a mɔ, nɛ mɔ a mɔ dɛa zɔlɔ sabɛlɛ do zɔlɔ lì kolo.

¹⁸ Aa nwa, mɔ zɔ́ owi sɛnɛ mɔ kɛ wa tulu mɔ, do oyɔndɔ winɔ kɛ wa 'danga zu li mɔ ni, nɛ dɔ ta zu mɔ élé ngɔ wa gɔ.

¹⁹ Mɔ tɛ là owinɔ 'da mɔ, kɛ wa ngɔ, sila mɔ ni, dɛ kɔ o'dã wi sɛnɛ wa gɔ. Ta mɔ tɛ èlè ngɔ owinɔ 'da mɔ, kɛ wa kpa 'bakoe fai gɛ gɔ.

²⁰ Mɔ lénggé do mbuli mɔ kpua do lɛ ni, we kɛ Owi dɛ ngatɛ, wa dungu tɛ usu falanɔ ngɔ nùi gɛ vɛ̃.

²¹ Mɔ tɛ là wi kɛ wa zɛlɛ tɛ̃ a ni na, a ɔ do sape ti kɔ Owi zɛlɛ tɛ̃ a gɔ. E kɔ Owi sãnɔ do Owi 'bakonɔ wa dɔnggɔ mɔ.

²² Aa Gale, mɔ lénggé do kɛ oyɔndɔ winɔ wa 'danga zu li mɔ fai ni. Mɔ kúlú ngɔ hã mɔ tɔ̃ ngbangga zu mɔ.

²³ Nɛ ta mɔ tɛ èlè ngɔ hiamɛ, kɛ Owi sɛnɛ mɔ wa he zu mɔ, nɛ ma kũ dɛ ngɔ kũ fai ni gɔ.