Zumanɔ 73 - WE NU GALE 1995

TALƐ 'BUKU ZUMANƆ (Zumanɔ 73—89) O'dã winɔ wa kpasa do mbɔkɔ tɛ nde?

1 Zuma 'da Asafɛ

¹ Zuma 'da Asafɛ Mi zɔa na Gale do kɔ̃a zã wena we obe Israɛlɛ, do owinɔ kɛ kɔ sila wa sa wena ni.

² Gɛnɛ kɔ na mɛ ni, nɛ nde ma 'bana zi be sĩ na, mi tɛ gbìnì zã mi do a gɔ.

³ Mba gɔ, mi zɔa na, mɛnɔ o'dã winɔ wa dɛ ni, ma Sɔkpɔ vɛ̃ do dia nɛ, nɛ mi dɛa bɔnɛ we nɛ.

⁴ Owinɔ ni wa kpá ngamɔ gɔ, wa gã wena, nɛ wa dungu do nga tɛ wa.

⁵ Wa kpá ngamɔ ɔ nɛ ogele winɔ gɔ, zɛlɛ tɛ kɛ ogele winɔ wa kpa ni, ma kpá wa gɔ.

⁶ We duzu ma, ma kɛ wali do ngatɛ hi'da wa, ɔ nɛ kɛ wele he'de iyaka do tulu dɛ tɛ̃ ɛ ni.

⁷ Sila wa dè gɔ, nɛ zu wa dunu do 'dã linggamɔ.

⁸ Wa mɔmɔ ngba wa, nɛ wa tɔ̃ 'dã we tɛ wa, nɛ wa 'dafa na, lo zɛlɛ tɛ wa do nga.

⁹ Wa wele 'dã we hã Gale dɛ li nza i, nɛ nu wa lá mɔ kpo ngɔ nù gɛ gɔ.

¹⁰ Mbe winɔ 'da Gale wa nɛa we zɔ ni, nɛ wa siki li wa dɛ 'da o'dã winɔ ni, nɛ wa nɔ wila we nu wa ɔ nɛ lì ni.

¹¹ O'dã winɔ wa tɔ̃ na: “Gale wè we ĩ mɛnɔ lɛ dɛ gɛ gɔ. A a ndũu li ngɔ i, a nɛ dɛ fala ĩ ma nɛ nde?”

¹² Nɛ ka mɔ hã nɛ zɔ o'dã winɔ, fo wi gba gɛlɛ wa bina, nɛ wa kpa mɔ dɛ dati fai.

¹³ Na mɛ ni, gulu kɛ mi 'bana wi dia sila, nɛ mi dɛ́ 'dã mɔ gɔ ni we ge nde?

¹⁴ Tũ kpo kpo, nɛ mɔ Gale, mɔ hã ngamɔ hã mi, nɛ titole kpo kpo, mɔ hã etumbu hã mi.

¹⁵ Kɔ fala kɛ mi kɔ̃ sɔ na, mi wele we ɔ nɛ o'dã winɔ ni, nɛ mi hɔ sɔ wi vũ to tɛ winɔ 'da mɔ Gale.

¹⁶ Ma hã mi lingga ngɔ we gɛ, nɛ mi zɔa na ma nganda wena.

¹⁷ Ma dɛa tɛ̃ ɛ na mɛ ni gbaa, we hɔ ngba soe kɛ mi lia kɔ Tɛmpɛloe 'da mɔ, nɛ mi ĩ ti mɛ kɛ ma dɛ sɛ o'dã winɔ ni.

¹⁸ Mɛ a gbãlã we, mɔ a wa tɛ fala dɔndɔ, nɛ mɔ dɛa na, wa te kɔ wa kumu.

¹⁹ Mɔ hã ngamɔ hã wa, nɛ wa fia do ti, nɛ wa kumu vɛ̃.

²⁰ NWA, mɔ kulu ngɔ dɛ tɛ wa, nɛ ta zu wele ele ngɔ wa ɔ nɛ yalɛ ni.

²¹ Fala kɛ linggamɔ zu mi 'danga zi, nɛ sila mi dunu zi do 'bakoe ni,

²² nɛ nde mi ĩ́ zi ti gulu mɛnɔ mɔ dɛ ni gɔ, nɛ mi yɔnda zi nɛ́ naa ngandi ni.

²³ Gɛnɛ kɔ na mɛ ni, nɛ nde mi fala nɛ kpo do mɔ fai, nɛ mɔ 'bia mi do ngawili kɔ̃ mi,

²⁴ nɛ mɔ tɔ̃a mbula hã mi, nɛ ma kã mi kɔ dungu nza 'da mi. 'Do nɛ, nɛ mɔ ba sɛ mi do dɔ̃lɔ̃ li 'da mɔ.

²⁵ Wi kɛ a we sɛ we gbaka mi tɛ li nza i, wi tati a mɔ Gale. Kɔ nɛ́ kɛ mi sɛ do mɔ ni, wɔ tɛ mbé mɔ kpo ngɔ nù gɛ bá mi gɔ.

²⁶ Kili tɛ mi do sila mi wia tɛ mbɔkɔ ma, nɛ nde wi yolo 'do mi we nganda sila mi, wi fai a mɔ Gale. We duzu mɔ, ma a mi zɔ́lɔ́ mɔ kpo gɔ.

²⁷ Owinɔ kɛ wa bɛ̃a gɛnɛ mɔ ni, wa fe sɛ, nɛ mɔ kumu sɛ wanɔ wa siki 'do wa hã mɔ ni.

²⁸ Nɛ nde mi sɛ a wi yangga, we kɛ mi do mɔ Gale fala nɛ kpo. Mi usu tɛ mi dɛ kɛ zã mɔ NWA, nɛ mi tɔ̃ sako mɛnɔ vɛ̃ kɛ mɔ dɛa ni.