Zumanɔ 72 - WE NU GALE 1995

Sambala hã Gale na a wele nu a tɛ nwa

1 Zuma 'da Davidi

¹ Zuma 'da Davidi Aa Gale, mɔ hã bɔlɔ zui 'da mɔ hã nwa, takɔ a 'bili we do bɔlɔ nɛ ngboo nɛ́ mɔ ni.

² E kɔ a dɛ mbulanɔ do wala olo nɛ, nɛ a zɔ mɔ tɛ Owi 'bakonɔ do bɔlɔ nɛ.

³ E kɔ nùi 'da lɛ ko dia mɔ hã winɔ, nɛ bɔlɔ zu dɛa mɔ pɛsɛ falanɔ vɛ̃.

⁴ E kɔ nwa 'bili we 'da Owi sãnɔ do bɔlɔ nɛ, nɛ a gbaka Owi 'bakonɔ, nɛ a ma wi zɛlɛ tɛ wa ti nyanga a.

⁵ E kɔ nwa 'bana nza fai, ɔ nɛ kɛ zɛkɛ do wese to do ma fai ni.

⁶ E kɔ nwa ɔ nɛ tɛa kolo, kɛ ma tɛ dɛ ngɔ fɔnɔ, nɛ ma 'bɔ nùi ni.

⁷ E kɔ bɔlɔ zu dɛa mɔ yɛ'bɛ ti to nwa 'da a, nɛ gã kpamɔ dunu ngɔ nùi gɛ, nɛ ma 'bana kɔ sabɛlɛ do sabɛlɛ ɔ nɛ kɛ zɛkɛ 'bana tɛ to ma fai ni.

⁸ E kɔ a dungu nwa ngɔ nùi kɛ ma sanga gba lìnɔ bɔa ni do yolo tɛ lì Efratɛ gbaa we hɔ ndɔti nùi.

⁹ Owi yɛnggɛ li gba zɔ̃nɔ wa gu sɛ gba zugolo, nɛ owi sɛnɛ a wa Sama sɛ fumbɛlɛ dati a.

¹⁰ Onwa ngɔ nù Tarsisi do wanɔ kulu gba lì i ni, wa tombo sɛ do dia mɔ hã a, nɛ onwa ngɔ nù Saba do Seba, wa futa sɛ tako hã a.

¹¹ Onu kɔnggɔ winɔ vɛ̃ wa dungu sɛ ti mbula 'da a, nɛ owinɔ vɛ̃ wa bili sɛ zu wa nù dati a.

¹² A kpasa sɛ wi sã kɛ a ala nu a hã a ni, do wi 'bakoe kɛ fo wi gala a bina ni.

¹³ A ĩ sɛ 'bako hã wi sãnɔ do wi 'bakonɔ, nɛ a kpasa sɛ wa.

¹⁴ A fo sɛ wa kɔ ngamɛ do zɛlɛ tɛ wa kpa ni, mba gɔ, a zɔ kpasi 'da wa li a do dĩ.

¹⁵ E kɔ nwa 'bana nza fai, e kɔ wa kala mɔ mbali ngɔ nù Saba, hã wa 'dɔlɔ hã a, e kɔ wa sambala we a 'do ngbɛ ɛ do 'do ngbɛ ɛ, nɛ wila nui 'da Gale 'bana do a fai.

¹⁶ E kɔ nùi gɛ ko kpalɛ dɛlɛ wena, nɛ kɔni kpa do ngɔ kalanɔ vɛ̃, nɛ ma de ɔ nɛ okala Libanɛ ni. E kɔ nyɔngɔmɔ dɛlɛ ngɔ nùi gɛ ɔ nɛ wɔkɔsɔ ni.

¹⁷ E kɔ dɔ̃lɔ̃ li 'da nwa 'bana kɔ sabɛlɛ do sabɛlɛ, ɔ nɛ kɛ wese 'bana tɛ to ma fai ni. E kɔ winɔ vɛ̃ wa kpa wele nu do zu li a, nɛ nu kɔnggɔnɔ vɛ̃ wa sambala na, a ɔ wi yangga.

¹⁸ Nɛ dɔ́nggɔ́ NWA Gale 'da obe Israɛlɛ. Wi dɛ ɔngbamɛnɔ, wi a a zu a kpo.

¹⁹ Nɛ dɔ́nggɔ́ dɔlɔ li 'da a 'da fala fai. E kɔ dɔ̃lɔ̃ li 'da a dunu ngɔ nùi gɛ vɛ̃! Amɛ. E kɔ ma ɔ na mɛ ni.

²⁰ Kɛ gɛ a ndɔti sambala 'da Davidi, be 'da Yɛse.