Zumanɔ 71 - WE NU GALE 1995

¹ Aa NWA, mi yu dɛ 'da mɔ na, mɔ amba zu mi, mɔ tɛ ha sape hã mi gɔ.

² Mɔ gbáká mi do bɔlɔ zui 'da mɔ, mɔ gɛ́ zala mɔ hã mi, nɛ mɔ kpasa mi.

³ Mɔ kélé zu mi ɔ nɛ gba ngbo ni, nɛ mɔ bi ngɔ mi we kpasa mi. Gbãlã we, mɔ a kpangba ta kele zu mi, mɔ a gba ngbo amba zu mi.

⁴ Aa Gale 'da mi, mɔ kpásá mi ti kɔ̃ o'dã winɔ do Owi dɛ ngatɛnɔ do'do.

⁵ Mi gbini zã mi do mɔ, NWA Gale, yolo ngɔ be tɛ mi, mi hã tɛ mi hã mɔ.

⁶ Mi nda'ba tɛ mi do mɔ kɔ dungu nza 'da mi vɛ̃, nɛ yolo tɛ kula 'da mi, mɔ zɔ mɔ tɛ mi fai. Mi dɔnggɔ mɔ kɔ sabɛlɛ do sabɛlɛ.

⁷ Ogba dɔa winɔ wa ɔngbɔ zi mɛnɔ ma dɛ mi ni ɔngba, nɛ nde mɔ a ngi wi kele zu mi ngboo.

⁸ Mi sambala mɔ tũ kpo kpo, nɛ mi dɔnggɔ dɔ̃lɔ̃ li 'da mɔ fai.

⁹ Ngangga ni, mi dɛa gbɛlɛ, nɛ ngawi 'da mi ia, nɛ nde mɔ tɛ bɛ gɛnɛ mi gɔ.

¹⁰ Owi sɛnɛ mi wa ba zã zu mi, nɛ wa wɛ mi we gbɛ mi.

¹¹ Wa tɔ̃ na: “Gale bɛ̃a gɛnɛ a ia, lɛ wɛ́ a hã lɛ bá a. A 'bɔ do mbé wi kpasa a bina.”

¹² Aa Gale, mɔ tɛ là mi ndũu gɔ, mɔ tɛ́ dɔ̃ hã mɔ kpasa mi.

¹³ E kɔ winɔ wa fa we gbɛ mi ni, wa fe do sape. E kɔ winɔ wa fa we zɛlɛ tɛ mi ni, sako li wa 'danga, nɛ wa kpa sape.

¹⁴ Nɛ nde we mi, mi gbini zã mi do mɔ fai, nɛ mi dɔnggɔ mɔ ndɔti nɛ bina.

¹⁵ Tũ kpo kpo, nɛ mi tɔ̃ lɛnggɛ dia dɛa mɛnɔ 'da mɔ, kɛ ma dɛlɛ la li ngele ni. Nɛ mi tɔ̃ 'bɔ na, mɔ a wi bɔlɔ zu, nɛ mɔ a wi kpasa mi.

¹⁶ Mi tɔ̃ tati a sako ɔngbamɛnɔ 'da mɔ, do sako bɔlɔ zui 'da mɔ, NWA Gale zu mɔ kpo.

¹⁷ Aa Gale, yolo ngɔ be tɛ mi, mɔ bia zi mbula hã mi, nɛ mi 'bana tɛ tɔ̃ lɛnggɛ ɔngbamɛnɔ 'da mɔ gbaa tia do sɔɛ gɛ.

¹⁸ Ngangga gɛ, mi dɛa kpasa wi, nɛ zu mi kutu mbu, nɛ nde Gale, mɔ tɛ bɛ gɛnɛ mi gɔ. Mɔ ɔ́ do mi fala nɛ kpo, takɔ mi tɔ̃ lɛnggɛ mɛnɔ mɔ dɛa do ngawi 'da mɔ ni hã obe zã lɛ kɛ wa sanza gɛ.

¹⁹ Aa Gale, bɔlɔ zui 'da mɔ gã, nɛ ma nɛa gbaa li nza i. Mɔ dɛa ogba mɔ wena. Gale, wi kɛ a wia kɔ̃ do mɔ a wio nde?

²⁰ Mɔ dɛa na, mi kpa zɛlɛ tɛ do 'bako, nɛ nde mɔ gese sɛ ngawi 'da mi dɛ olo nɛ, nɛ mɔ fo sɛ mi kɔ zunu dɛ nza.

²¹ Mɔ mbɔkɔ sɛ 'bɔ sila mi mbé nɛ, nɛ mɔ gese sɛ dɔ̃lɔ̃ li 'da mi dɛ olo nɛ.

²² We duzu ma, mi zɛ sɛ kundu hã mɔ, nɛ mi dɔnggɔ sɛ mɔ, Gale 'da mi. Mi zɛ sɛ kundu, nɛ mi ga zuma, nɛ mi dɔnggɔ dia zã 'da mɔ. Mɔ a Gale Santo 'da obe Israɛlɛ.

²³ Mi zɛ sɛ biã, nɛ mi ga zuma hã mɔ do sila mi vɛ̃, we kɛ mɔ kpasa mi ni.

²⁴ Nɛ mi tɔ̃ sɛ lɛnggɛ bɔlɔ zu dɛa mɛ 'da mɔ tũ kpo kpo, mba gɔ, mɔ hã sape wena hã owinɔ kɛ wa fa zi we zɛlɛ tɛ mi ni.