Zumanɔ 7 - WE NU GALE 1995

¹ Zuma 'da Davidi

² Aa NWA Gale 'da mi, mi yu dɛ 'da mɔ. Mɔ fó mi ti kɔ̃ owinɔ wa hã ngamɛnɔ hã mi gɛ do'do. Mɔ kpásá mi, mɔ tɛ là mi dɛ kɔ̃ wa gɔ.

³ Mɔ fò mi ti kɔ̃ wa gɔ, nɛ wa ɛ̃ sɛ sanga mi, ɔ nɛ kɛ gbɔgbɔ ɛ̃ do sanga sa'de ni, nɛ nde wele kpo ámbá sɛ zu mi gɔ.

⁴ Aa NWA Gale 'da mi, mɔ zélé wenɔ wa tɔ̃ dɛ ngɔ mi gɛ. Kɔ fala kɛ mi dɛ 'dã mɔ dɛa do gbãlã we, tabi tɔkɔ tɛ wele ti ɛ̃lɛ̃ kɔ̃ mi boe,

⁵ tabi mi gisa 'dã mɔ hã wi dɛ dia mɔ, tabi mi dɛa nga zu, nɛ mi kala dia mɔ kɔ̃ wi handa mi iko nde,

⁶ nɛ mɔ e Owi sɛnɛ mi, hã wa ndi 'do mi. Nɛ wa bá mi do tunu li mi, nɛ wa ma mi ti nyanga wa, nɛ wa gbɛ mi, nɛ wa gbɔtɔ wɔlɔ mi do zã 'bɛ̃tɛ̃.

⁷ Aa NWA, mɔ kúlú ngɔ do dã, hã mɔ bi do winɔ kɛ li wa fele dɛ tɛ mi gɛ. Mɔ a wi gɔnɔ we do bɔlɔ nɛ, mɔ yóló gba sala 'do mi.

⁸ E kɔ gba gili Owele wa ngɛmɛ dɛ kɛ zã mɔ, nɛ mɔ dungu ngɔ kpongbo nwa 'da mɔ li nza i, nɛ mɔ e mbula ngɔ wa.

⁹ NWA, mɔ a mɔ 'bili we 'da owinɔ, mɔ gbɛ́ dia we hã mi, we kɛ mi dɛ̃ 'dã mɔ gɔ.

¹⁰ Mɔ Gale, mɔ a wele bɔlɔ zu dɛa mɔ, mɔ ĩ ti linggamɔ kɔ sila wele. Mɔ yúlú nu 'dã mɛnɔ 'da o'dã winɔ nù, nɛ mɔ hã kpã sila hã Owi kɔ̃ zu li mɔ.

¹¹ Aa Gale, mɔ a ngele kele zu mi, mɔ a mɔ amba ngɔ owinɔ wa dɛ olo nu mɔ ni.

¹² Aa Gale, mɔ a wi kɛ mɔ gɔnɔ we do li nɛ, nɛ nde mɔ mbɔ́kɔ́ sila mɔ hã wi dɛ 'dã mɔ fala kpo gɔ.

¹³ Mi ĩ de wena na, wi sɛnɛ mi kìfì sila a gɔ. Aa Gale, mɔ bɛngɛ nu du kɔya 'da mɔ, mɔ máná nzabele 'da mɔ, nɛ mɔ da.

¹⁴ Mɔ 'dáfá omɔ bolo we gbɛ wi, nɛ mɔ dɛ́ okpili kɛ nu nɛ nyɛ do we.

¹⁵ Nɛ zɔ́ wi sɛnɛ mi, a lengge we dɛ 'dã mɔ. A ĩ kpo a ti hã 'bako, do 'bili bɛlɛ hã owele.

¹⁶ A zã 'du kɔ, nɛ a gu ma hã ogele winɔ, nɛ nde a wele nɛ, a tia kɔ kɔ̃ɛ kɛ a zã ni.

¹⁷ 'Dã mɛ kɛ a lengge we dɛ do ngba a ni, ma kifi tɛ̃ ɛ dɛ zu a wele nɛ, nɛ ngamɛ kɛ a 'dafa we hã ma hã ngba a ni, ma siki tɛ̃ ɛ, nɛ ma kpa a.

¹⁸ Nɛ nde kɛ 'da mi, mi nɛ dɔnggɔ NWA, we duzu bɔlɔ zu dɛa mɛ 'da a. Mi nɛ ga zuma do zu li Gale, kɛ a nɛa ngɔ mɔ vɛ̃ ni.