Zumanɔ 69 - WE NU GALE 1995

Sambala ala nu wi hã Gale

¹ Zuma 'da Davidi

² Aa Gale, mɔ kpásá mi! Lì ba ti gɛlɛ mi we gulu zu mi.

³ Mi tia gba 'du 'bɛ̃tɛ̃, nɛ nyanga mi hɔ tɛ nga nù gɔ. Mi fi tɛ mi 'dɔ gba 'du lì, nɛ ngele nɛ ba mi si gɔtɔ.

⁴ Mi hia mɔ gbaa, nɛ mi mbɔkɔ, nɛ kɔ gɛlɛ mi kula, nɛ ma nãlã. Mi ka mɔ li wala tɛ 'bɔ 'da mɔ Gale 'da mi gbaa, nɛ gbali mi ma gɛ̃a do'do.

⁵ Owi sɛnɛ mi, wa dɛlɛ nɛa ngɔ mili zu mi. Wa sɛnɛ mi yala iko. Wa nganda wena, nɛ wa fa we gbɛ mi. Wa kɔ̃a na mi gese mɛ mi zũ ni hã wa, nɛ nde mi zu mɔ gɔ, kɔ mi nɛ dɛ fala gese ma nɛ nde?

⁶ Aa Gale, mɔ ĩ ti tɛlɛ tɛ kɛ mi zi a yɔndɔ wi ni, nɛ 'dã mɛnɔ 'da mi ùsù tɛ̃ ɛ li mɔ gɔ.

⁷ NWA Gale 'da mɔ nyanga nza vɛ̃, mi kɔ̃̀ na mi hã sape hã owinɔ kɛ wa gbini zã wa do mɔ ni gɔ. Aa Gale 'da obe Israɛlɛ, mɔ tɛ là owi dɛ olo nu mɔ na, wa kpa sape we duzu mi gɔ.

⁸ Mba gɔ, owi sɛnɛ mi wa dã mi we mɔ, nɛ zu mi dĩlĩ do sape.

⁹ Mi hɔa gele wi tɛ sanga onya mi, nɛ owi nu fɛlɛ kula 'da mi, wa ĩ̀ 'bɔ ti mi gɔ.

¹⁰ Kɔ̃a zã kɛ mi kɔ̃a do Tɛmpɛloe 'da mɔ ni, ma dɔ sila mi ɔ nɛ we ni. Nɛ dɛlanɔ kɛ winɔ wa dã do mɔ ni, ma si vɛ̃ dɛ ngɔ mi.

¹¹ Mi ba tɛ mi dɛ nu, nɛ mi bɛ̃a nyɔngɔmɔ, nɛ owinɔ wa dã mi we mɛ mi dɛa ni.

¹² Mi hi'da tulu gɛla, nɛ wa mɔma mi we nɛ.

¹³ Wa tɔ̃ zu li mi do li walanɔ, nɛ owi bá dɔ̃nɔ wa fi zuma do zu li mi.

¹⁴ Nɛ nde kɛ 'da mi, mi sambala mɔ NWA. Kɔ 'da fala kɛ ma we li mɔ ni, nɛ mɔ gese nu sambala 'da mi, nɛ mɔ be gã kɔ̃a zã 'da mɔ, hã mɔ kpasa mi.

¹⁵ Mɔ gbɔtɔ mi kɔ 'bɛ̃tɛ̃ do'do, mɔ fó mi kɔ 'du lì dɛ nza, nɛ mɔ kpásá mi ti kɔ̃ owi sɛnɛ mi.

¹⁶ Mɔ tɛ è mi na, ngele lì ba mi la do mi gɔ, nɛ mɔ tɛ dɛ̃ na, mi te gba 'du kɔ̃ hã ma gulu zu mi gɔ, mɔ tɛ là mi hã zunu kpe dɛ ngɔ mi gɔ.

¹⁷ Aa NWA, mɔ kɔ̃́ nu mi do dia zã 'da mɔ, e kɔ gã kɔ̃a zã 'da mɔ dɛ na, mɔ siki li mɔ dɛ 'da mi,

¹⁸ nɛ mɔ tɛ sìkì 'do mɔ lo do mi, wi dɛa toe 'da mɔ gɔ. Mi kɔ 'bako, mɔ tɛ dà'bà tɛ mɔ gɔ, mɔ kɔ̃́ nu mi.

¹⁹ Mɔ tɛ́, hã mɔ kpasa mi, mɔ fó mi ti kɔ̃ Owi sɛnɛ mi.

²⁰ Mɔ ĩ ti tɛlɛ tɛ kɛ wa dã do mi ni, nɛ mɔ ĩ 'bɔ ti sape kɛ mi kpa ni. Mɔ zɔ Owi sɛnɛ mi vɛ̃ wa dɛ dati mi gɛ.

²¹ Dɛla kɛ wa dã do mi ni, ma gbini sila mi, nɛ ma hã zɛlɛ hã mi. Nɛ mi ia sila mi na, mbe wele a ĩ sɛ 'bako hã mi, nɛ nde mi 'bɔa zãa. Mi fa wi nganda sila mi zãa, nɛ mi kpà mbamba wele kpo gɔ.

²² Wa a 'dã ina tɛ nyɔngɔmɔ na mi nyɔngɔ, nɛ wɔ lì ba mi, nɛ wa hã kpãlã dɔ̃ hã mi na mi nɔ.

²³ E kɔ nyɔngɔmɔ dɔɛ 'da wa ma ɔ nɛ bili ni na, wa te li nɛ, hã ma ba wa.

²⁴ E kɔ li wa 'danga, dɔ wa zɔ́ 'bɔ mbé mɔ gɔ, e kɔ 'do wa bili fai, nɛ wa tɛ bɔ̀lò tɛ wa gɔ.

²⁵ Mɔ tómbó do gã nɔ̃lɔ̃ zã 'da mɔ dɛ ngɔ wa hã ma kpa wa.

²⁶ E kɔ fala ɔi 'da wa ma 'danga, nɛ wele kpo tɛ 'bànà nza ti tɔa tande 'da wa gɔ.

²⁷ Mba gɔ, wa zɛlɛ tɛ wi kɛ mɔ hã zi etumbu hã a ni, nɛ wa tɔ̃ lɛnggɛ ngamɛ kɛ mɔ hã hã winɔ ni.

²⁸ Mɔ kɔ́mɔ́ 'dã mɛnɔ 'da wa kpo kpo, nɛ mɔ tɛ ĩ̀ 'bako hã wa fala kpo gɔ.

²⁹ Mɔ gbɛ́ li wa kɔ 'buki, kɛ mɔ dɛa li owinɔ 'da mɔ kɔ nɛ ni do'do, nɛ mɔ tɛ tɔlɔ wa fala nɛ kpo do owi bɔlɔ zunɔ gɔ.

³⁰ Aa Gale, mi gɛ, mi a wi 'bako, wa zɛlɛ tɛ mi wena, nɛ nde mɔ ámbá zu mi hã mɔ kpasa mi.

³¹ Nɛ mi ga sɛ zuma we be dɔ̃lɔ̃ li 'da mɔ, mi dɔnggɔ sɛ gã wi 'da mɔ

³² Aa NWA, ki ni ma ɛ̃fɛ̃ tɛ mɔ nɛa ngɔ kɛ na, mi dɔnggɔ mɔ do gã wili ngɔmbɔ ni.

³³ Owi 'bakonɔ wa zɔ kɛ mi kpasa ni, nɛ wa dɛ sɛ yangga. Owinɔ kɛ wa fa kpasi kɔ̃ Gale ni, tũ kɔ̃ wa ma dɛlɛ sɛ ngɔ nù gɛ.

³⁴ Mba gɔ, NWA zele sambala 'da Owi 'bakonɔ, nɛ fala owinɔ 'da a wa le bɔlɔkɔ, nɛ nde a bè gɛnɛ wa gɔ.

³⁵ Aa nɛ, omɛnɔ vɛ̃ tɛ li nza do ngɔ nù gɛ, do kɛnɔ 'dɔ gba lì, nɛ dɔ́nggɔ́ Gale.

³⁶ Mba gɔ, a kpasa sɛ Owi Yeruzalɛmɛ, nɛ a 'dafa sɛ olenɔ ngɔ nù Yuda dɛ olo nɛ, nɛ owinɔ 'da a wa ɔ kɔ nɛ.

³⁷ Obe zã wi dɛa tonɔ 'da a wa kala sɛ lenɔ olo Owi ko wa ni do mɔ́ wa. Owinɔ kɛ wa kɔ̃a NWA ni, wa dɛ sɛ tɔa ngɔ nùi 'da wa, nɛ wa ɔ dɛ di ni.