Zumanɔ 68 - WE NU GALE 1995

Zuma sɔ̃ bolo 'da owinɔ wa nɛa ngɔ ngba wa li bolo

¹ Zuma 'da Davidi

² Gale siki li ɛ dɛ tɛ Owi sɛnɛ a, nɛ wa yu, nɛ wa pɛsɛ dati a wɛkɛ.

³ E kɔ 'dã winɔ wa fe dati Gale. E kɔ wa pɛsɛ dati a ɔ nɛ zɛ̃ we ni, nɛ sanga wa gɔnɔ ɔ nɛ nɔ gɔnɔ li we ni.

⁴ Nɛ ode winɔ wa dunu do yangga, nɛ wa zɛ kaliã dati a.

⁵ Nɛ gá zuma hã Gale, nɛ nɛ dɔnggɔ zu li a. A a wi kɛ a dungu ngɔ okutunɔ nɛ ma la do a. Nɛ dɔ́nggɔ́ a, li a a NWA, nɛ dɛ́ yangga dati a.

⁶ Gale ɔ kɔ Tɛmpɛloe 'da a kɛ ma santo, a a wi dala be gulanɔ, nɛ a 'bɔ a wi tɔ̃ ngbangga ngɔ wi fio wilinɔ.

⁷ A hã nu fɛlɛ kula hã owinɔ kɛ wa zɔla wele ni, nɛ a fo owi bɔlɔkɔnɔ dɛ nza, nɛ wa dɛ yangga. Nɛ a la tati a Owi bɛ̃ we nu a, nɛ wa 'bana dɛ ngɔ nùi kɛ ma kula kparr ni.

⁸ Aa Gale, 'da fala kɛ mɔ kpia zi dati owinɔ 'da mɔ, nɛ mɔ la do li gba zɔ̃ɛ ni,

⁹ nɛ nùi ma yaka, nɛ kolo yula li nza i, nɛ ma tɛa dati mɔ, Gale 'da lɛ obe Israɛlɛ, kɛ mɔ bia zi tɛ mɔ ngɔ kala Sinai ni.

¹⁰ Mɔ dɛa na, gba kolo 'butu tɛ, nɛ mɔ hã ngawi hã nùi 'da mɔ na ma ko kpalɛ.

¹¹ Nɛ owinɔ 'da mɔ wa dɛa tɔa dɛ ngɔ nùi ni, we kɛ mɔ Gale, kɛ mɔ dia la mɔ vɛ̃ ni, mɔ 'dafa zi nùi ni hã Owi 'bakonɔ.

¹² NWA ba nu ɛ kpo, nɛ ogba dɔa wukonɔ wa tɔ̃a dia sako na:

¹³ “Owi sɛnɛ lɛ do onwa ngɔ wa wa sua yu, nɛ wa la, nɛ lɛ wukonɔ kɛ lɛ 'bana nu tɔanɔ nga ni, lɛ kɛ̃a sanga odia mɔ olo wa.”

¹⁴ Mɛ a ogbakulĩ kɛ wa dula sala 'baka wa, do fɛ̃a mɔ bolo, nɛ wa dolo sala tɛ wa do mɔ mbali. (Gulu kɛ ombe sanga nɛ wa 'bana dɛ kɔ ngbo nga, we dala batanɔ 'da wa do ngba soe bole we ge nde?)

¹⁵ Do 'da fala kɛ NWA kɛ a do nganda vɛ̃, a pɛsɛ zi Onwanɔ tɛ ngɔ kala Salmoni ni, nɛ wɔlɔ wa ala zi dɛ zu kala, ɔ nɛ gbãlã mũlũ ni.

¹⁶ Kala Basanɛ, mɛ a gã kala, nɛ 'bɛ̃lɛ̃ zu nɛ dɛlɛ wena.

¹⁷ Kɔ aa mɔ, kala kɛ 'bɛ̃lɛ̃ zu mɔ dɛlɛ wena gɛ, gulu kɛ mɔ dɛ bɔnɛ hã kala 'da Gale, kɛ a saka ma we ɔ ngɔ nɛ fai ni we ge nde?

¹⁸ NWA Gale do ongilingili bolo koto do koto, a kulu ngɔ do ma tɛ ngɔ kala Sinai, kɔ a la dɛ fala santo.

¹⁹ A kũ dɛ ngɔ kala Sioni, we dɛ fala ɔi 'da a i mɔ. A kala owele li bolo, si do wa, nɛ owi bɛ̃ we nu a wa 'dɔla mɔ hã a. A a NWA Gale.

²⁰ E kɔ lɛ gese iɔ̃nae hã NWA Gale tũ kpo kpo. A a wi kpasa lɛ, nɛ a zɔ mɔ tɛ lɛ.

²¹ Gale 'da lɛ a Gale hã kpasi, a a NWA 'da lɛ kɛ a kpasa lɛ kɔ fio.

²² Lɛ ĩ de wena na, Gale a gbini sɛ gbãlã zu owi sɛnɛ lɛ, a o sɛ zu o'dã winɔ kɛ wa dɛ 'dã mɛnɔ fai ni.

²³ NWA tɔ̃a na: “Mi kala sɛ owi sɛnɛ nɛ tɛ ngɔ kala Basanɛ, mba do wanɔ ti go'do gba 'du lì, nɛ mi si sɛ do wa,

²⁴ takɔ nɛ gbɛ wa, nɛ nɛ yɛnggɛ 'dɔ lì tɔkɔ tɛ wa, nɛ otolonɔ 'da nɛ wa nyɔngɔ wɔlɔ wa, nɛ zã wa hɛ̃.”

²⁵ Aa Gale Nwa 'daa, owele wa zɔa mɔ tɛ la do owinɔ 'da mɔ, tɛ kɔ Tɛmpɛloe 'da mɔ kɛ ma santo.

²⁶ Owi ga zumanɔ wa kpia dati, nɛ obe zɔnganɔ wa kpe gbogbo tɛ yaka dawaya, nɛ owi zɛ kundunɔ do ngɔ go'do.

²⁷ Nɛ gésé iɔ̃nae hã NWA Gale dɛ sanga owinɔ 'da a, kɛ wa mba li ngba wa ni. Nɛ, obe Israɛlɛ, nɛ gésé iɔ̃nae hã a.

²⁸ Nu kpala Bɛnzamɛ, kɛ mɛ a be nu kpala kɔ obe Israɛlɛ ni, wa kpe sɛ dati ongba wa, nɛ onwa ngɔ Oyuda do owinɔ 'da wa, wa kpe dɛ 'do wa, nɛ dɛ 'do nɛ, onwa ngɔ Ozabuloni do Onɛftali wa kpe.

²⁹ Aa Gale, mɔ bé ngawi 'da mɔ, mɔ bé ngawi Gale 'da mɔ kɛ ma dɛ mɛnɔ we lɛ ni.

³⁰ Mɔ yóló kɔ Tɛmpɛloe 'da mɔ, kɛ ma tɛ kɔ le Yeruzalɛmɛ ni, nɛ Onwanɔ wa tɛ dɛ kɔ nɛ, we 'dɔlɔ dia mɔ hã mɔ.

³¹ Mɔ dãlã dɛ tɛ nwa ngɔ Oezipeto. A a sa'de yɛnggɛ kɔ sala tɔ̃, a dungu nwa ngɔ owinɔ kɛ wa ɔ nɛ owili ngɔmbɔ. Mɔ dãlã dɛ tɛ̃ a gbaa na, a bili zu a ti mbula 'da mɔ, nɛ a tɛ do gbãlã mbili we dɔnggɔ do mɔ sɛ nɛ de. Nɛ mɔ pɛ́sɛ́ owinɔ kɛ wa kɔ̃a bolo nɛ ge nde ni do'do.

³² Oezipeto wa tombo dia mɔ hã mɔ, nɛ Oetiopi wa tɛa we hã dɔnggamɔ hã mɔ.

³³ Aa nɛ, Owi kɔ le nwanɔ ngɔ nù gɛ vɛ̃, nɛ gá zuma, nɛ nɛ dɔ́nggɔ́ NWA Gale.

³⁴ A dungu ngɔ okutunɔ tɛ li nza kɛ ma 'bana sɛ fai ni, nɛ ma la do a. Nɛ zɔ́ a kɛ, a o dã nganda wena.

³⁵ Nɛ tɔ̃́ dɛ nza na, ngawi ma yolo kɔ̃ Gale, nɛ nganda 'da a nɛa gbaa li nza i. Dɔ̃lɔ̃ li 'da a kila nù Israɛlɛ vɛ̃.

³⁶ Gale hɔa nza tɛ fala santoe 'da a, nɛ owinɔ wa zɔa a, nɛ wa dɛa kili. A a Gale 'da lɛ, obe Israɛlɛ, a hã ngawi hã lɛ owinɔ 'da a. Lɛ dɔ́nggɔ́ Gale!