Zumanɔ 66 - WE NU GALE 1995

Sambala we dɔnggɔ do Gale

1 Zuma 'da Davidi

¹ Zuma 'da Davidi Aa nɛ, owinɔ nyanga nza gɛ vɛ̃, nɛ zɛ́ kɔ̃ nɛ hã Gale.

² Nɛ gá zuma hã a, nɛ dɔ́nggɔ́ dɔ̃lɔ̃ li 'da a, nɛ nɛ tɔ̃ dia sako li a.

³ Nɛ tɔ̃́ hã Gale na: “Mɛnɔ kɛ mɔ dɛ ni, mɛ a oɔngbamɔ. Mɔ do ngawi la li ngele. Gɛnɛ kɔ owi sɛnɛ mɔ, kɔ wa hɔ dati mɔ, nɛ wa dɛ kili, nɛ wa bili zu wa nu.

⁴ Owinɔ nyanga nza gɛ vɛ̃ wa gu nù ti mɔ, nɛ wa ga zuma hã mɔ we dɔnggɔ sako li mɔ.”

⁵ Nɛ tɛ́, nɛ nɛ zɔ sɛ mɛnɔ kɛ Gale dɛa ni, a dɛa gba mɔ kɛ ma hã kili hã owinɔ hã.

⁶ A dɛa na gba lì ɔ̃sɔ̃, hã olo nɛ hɔ nga nù, nɛ oyaa lɛ wa kũ ma do kula nyanga wa. Ma hã lɛ dɛ yangga mɛ kɛ a dɛa ni.

⁷ A dungu nwa ngɔ mɛnɔ vɛ̃ do ngawi 'da a, nɛ a zɔ mɔ tɛ nu kɔnggɔ winɔ vɛ̃. Ma wè na, owi bɛ̃ we nu a wa dɔnggɔ tɛ wa gɔ.

⁸ Aa nɛ, owinɔ ngɔ nù gɛ vɛ̃, nɛ dɔ́nggɔ́ Gale 'da lɛ, nɛ nɛ sambala a do nga gɛlɛ.

⁹ A fua lɛ kɔ fio, nɛ a dɛa na, lɛ 'bana do kpasi.

¹⁰ Aa Gale, mɔ fi lɛ kɔ ngamɔ we yamba sila lɛ, ɔ nɛ kɛ wa fi fɛ̃a mɔ bolo li we, we fa dia nɛ zã nɛ ni.

¹¹ Mɔ dɛa na lɛ te li bili, mɔ ia dĩ tole zu lɛ.

¹² Mɔ la owi sɛnɛ lɛ na, wa ma lɛ ti nyanga wa, nɛ lɛ la do kɔ nyɛa we do lì. Nɛ nde mɔ fua lɛ kɔ ngamɛnɔ ni, nɛ mɔ gɛ̃a sila lɛ.

¹³ Mi le sɛ kɔ Tɛmpɛloe 'da mɔ, nɛ mi hã sɛ odɔnggamɔ hã mɔ, ɔ nɛ kɛ mi kpua zi do mbulu nɛ ni.

¹⁴ Mi dɛ sɛ olo nu mi kɛ mi tɔ̃a zi, do ngba soe kɛ mi zi kɔ ngamɛ ni.

¹⁵ Mi saka sɛ owili bata, do ngɔmbɔ, do dua, nɛ mi hã sɛ wa do dɔnggamɔ hã mɔ. Mi dɔ sɛ wa ngɔ gbagala 'da mɔ, nɛ zɛ̃ we nɛ ma kũ sɛ gbaa 'da mɔ i.

¹⁶ Aa nɛ, owinɔ kɛ nɛ yu kili Gale yu ni, nɛ tɛ́, hã nɛ zele we gɛ. Mi nɛ tɔ̃ lɛnggɛ mɛnɔ kɛ a dɛa hã mi ni.

¹⁷ Mi sa zi mɔ hã a na, a kpasa mi, nɛ do fala nɛ ni, mi dɔnggɔ zi 'bɔ a.

¹⁸ Ɔ do kɛ 'dã mɔ 'bana zi kɔ sila mi, nɛ NWA Gale wé zi tɛ zele mi gɔ.

¹⁹ Nɛ nde a gɛa zala a, nɛ a zila sambala 'da mi.

²⁰ Mi hã iɔ̃nae hã Gale, we kɛ a bɛ gɛnɛ sambala 'da mi gɔ, nɛ a dɔ̀ mi do kɔ̃a zã 'da a gɔ.