Zumanɔ 64 - WE NU GALE 1995

NWA a wi amba zu owinɔ 'da a

¹ Zuma 'da Davidi

² Aa Gale, mɔ zélé ala nui 'da mi, nɛ mɔ kpásá mi ti kɔ̃ Owi sɛnɛ mi, kɛ wa hã kili hã mi gɛ.

³ Mɔ gálá mi na, dɔ mi té li ngbangga 'da o'dã winɔ, kɛ wa mba li ngba wa we ba zã zu mi ni gɔ.

⁴ Nu lɛfɛ wa tɔ̃a ɔ nɛ nu du kɔya kɛ wa bɛ bɛnga ni, nɛ wila we nu wa ba wele nɛ́ kpili kɛ wa a li nɛ a ni.

⁵ Wa mana ma, nɛ wa da do usu nɛ, nɛ wa ndɔlɔ do dia winɔ, nɛ nde wa dɛ́ kili mɔ kpo gɔ.

⁶ Wa mu ngba wa we dɛ 'dã mɔ, nɛ wa tɔ̃ sako bilinɔ kɛ wa ndɔ hã winɔ do usu nɛ ni, nɛ wa na: “Wele kpo ĩ́ sɛ we nɛ gɔ.”

⁷ Wa 'dafa 'dã mɔ we dɛ ma, nɛ wa tɔ̃ na: “Lɛ 'dafa mɛnɔ lɛ nɛ dɛ ma ni de wena, wele wè tɛ le kɔ sila ngba a we ĩ́ ti linggamɔ zu a gɔ.”

⁸ Nɛ nde Gale da kpili 'dɛ ɛ hã wa, nɛ ma gbanga wa, nɛ ma ndɔlɔ wa.

⁹ A dɛa na, bili olo nu wa ba wa. Wele zɔ wa, nɛ a nyɛ nu a, nɛ a yaka zu a.

¹⁰ Kili ma ba winɔ vɛ̃ do'do, nɛ wa tɔ̃ lɛnggɛ mɛnɔ kɛ Gale dɛa ni, nɛ mɛnɔ ni, ma sɔ̃a li wa.

¹¹ E kɔ owi bɔlɔ zunɔ wa dɛ yangga mɛnɔ kɛ nwa dɛa ni, nɛ wa e a do wi amba zu wa, E kɔ wa vɛ̃ wa dɔnggɔ a.