Zumanɔ 63 - WE NU GALE 1995

Kɔ̃a zã 'da Gale dia nɛa ngɔ kpasi 'da wele

¹ Zuma 'da Davidi. A ga ma we lengge do kɛ a ɔ zi li gba zɔ̃, tɛ ngɔ nu Yuda ni.

² Aa Gale, mɔ a Gale 'da mi, mi dɛ wɔ tɛ mɔ, nɛ mi tɛ fa mɔ fai. Sila mi kutu kpauu tɛ fa mɔ ɔ nɛ sila wi kɛ a a ngɔ kula nù li go ni.

³ Mi ka mɔ kɔ Tɛmpɛloe 'da mɔ, nɛ mi zɔa ngawi do dɔ̃lɔ̃ li 'da mɔ.

⁴ Kɔ̃a zã 'da mɔ we mi, ma dia nɛa ngɔ kpasi 'da mi. Ma kɛ, mi dɔnggɔ sɛ dɔ̃lɔ̃ li 'da mɔ,

⁵ nɛ mi gese sɛ iɔ̃nae hã mɔ kɔ dungu nza 'da mi vɛ̃. Mi kala sɛ kɔ̃ mi dɛ ngɔ, nɛ mi dɔnggɔ zu li mɔ.

⁶ Mɔ dɛa na, sila mi dungu do yangga, ɔ nɛ mi dungu ɛngga ni. Mi zɛ sɛ kaliã, nɛ mi ga sɛ zuma we dɔnggɔ do mɔ.

⁷ Fala kɛ do tũi hã mi ɔ nù, nɛ ta zu mi gba ngɔ mɔ, nɛ mi sambala mɔ gbaa, nɛ 'do nɛ nyɛlɛ.

⁸ We kɛ mɔ a wi gbaka mi. Mi usu tɛ mi ti sala 'baka mɔ, nɛ mi zɛ nu mi do yangga.

⁹ Mi na tɛ mi vɛ̃ do mɔ, nɛ mɔ a wi yolo gba sala 'do mi.

¹⁰ Nɛ nde ombe winɔ wa kɔ̃a na mi fe. E kɔ ngamɔ gbanga wa, kɔ wa zĩlĩ dɛ kɔ le 'da ofionɔ i.

¹¹ E kɔ wa fe nga fio, nɛ ogbokologboe wa nyɔngɔ wɔlɔ wa.

¹² Nwa 'da lɛ a kpa sɛ yangga kɔ̃ Gale, nɛ owinɔ vɛ̃ kɛ wa kana tɛ wa do li Gale ni, wa dɔnggɔ sɛ tɛ wa. Mba gɔ, Gale a kpe sɛ nu owi tɔ̃ bɛlɛnɔ.