Zumanɔ 62 - WE NU GALE 1995

Dungu fio ma yolo kɔ̃ Gale

¹ Zuma 'da Davidi

² Wi wia we hã dungu fio hã mi tati a Gale, kpasi 'da mi vɛ̃ ma yolo kɔ̃ a.

³ A zu a kpo a kpangba ta usu do tɛ mi, nɛ a a gba ngbo amba zu mi na mi kpasa, ní a mɔ kpo wé sɛ tɛ yaka mi gɔ.

⁴ Aa nɛ, owi handa mi, nɛ mba sɛ li ngba nɛ we bi mi gbaa soe ki nge nde? Mi 'bɔ do ngawi bina, mi ɔ nɛ dɛlɛ tɔa kɛ ma gɛa we te nɛ ni, hã nɛ ɔmɔ sɛ tɛ zɛ mi soe ki nge nde?

⁵ Nɛ fa we futu mi we duzu dɔ̃lɔ̃ li 'da mi, nɛ nɛ kɔ̃a tati a tɔ̃ bɛlɛ. Nɛ tɔ̃ ɛ̃fɛ̃ nu, nɛ nɛ wele nu nɛ tɛ wele, nɛ nde do kɔ sila nɛ i, nɛ fɔmbɔ a fɔmba.

⁶ Mi wia we kpa dungu fio tati a kɔ̃ Gale, we kɛ mi gbini zã mi do a.

⁷ A zu a kpo a kpangba ta usu do tɛ mi, nɛ a a gba ngbo amba zu mi na mi kpasa. Ní a mɔ kpo wé sɛ tɛ yaka mi gɔ.

⁸ Kpasi 'da mi do dɔ̃lɔ̃ li 'da mi ma yolo kɔ̃ Gale. A a kpangba ta kɛ mi usu tɛ mi kɔ nɛ.

⁹ Aa nɛ, owinɔ 'da Gale, nɛ gbíní zã nɛ do a fai, nɛ nɛ tɔ̃́ kɔ sila nɛ hã a. Mba gɔ, Gale a wi usu zu lɛ.

¹⁰ Owele wa a bũ iko, ogã winɔ do obe winɔ vɛ̃ do gulu wa bina, wa gãlã wa nu kilo, nɛ nde wa a dĩ gɔ.

¹¹ Nɛ tɛ ha tɛ nɛ we zũ mɔ, tabi we dɛ ngatɛ hã nɛ kpa do mɔ gɔ. Nɛ fala kɛ kpamɛ 'da nɛ ma dɛlɛ dɛ dati, nɛ nɛ tɛ gbini zã nɛ do ma gɔ.

¹² Gale, mɔ tɔ̃a we kpo, nɛ ma lia zala mi fala bɔa na: Ngawi ma yolo kɔ̃ mɔ Gale,

¹³ nɛ kɔ̃a zã 'bɔ a mɔ́ mɔ. Mba gɔ, mɔ NWA, mɔ si olo mɛnɔ kɛ wele kpo kpo dɛ ni, nɛ ma we do kɛ a dɛa ni.