Zumanɔ 60 - WE NU GALE 1995

Sambala 'da obe Israɛlɛ 'do kɛ wa tia li bolo

¹ Zuma 'da Davidi. A ga ma we be do we.

² Ma tɔ̃ lɛnggɛ bolo kɛ Davidi bi zi do Osiri te ngɔ nù Mezopotami do Soba. Nɛ Yoabɛ kpolo tè a, nɛ a bi Oedɔmɛ te kɔ gbangɔlɔ̃ Tɔ̃, nɛ a nɛ ngɔ wa. Wa zi a owi wili Edɔmɛ koto 'bu ngɔ wa bɔa.

³ Aa Gale, zã mɔ nɔ̃lã dɛ tɛ lɛ, nɛ mɔ bɛ̃a gɛnɛ lɛ, nɛ mɔ pɛsɛ sanga lɛ li bolo. Kɔ lɛ aka mɔ na, mɔ gésé ngawi 'da lɛ dɛ olo nɛ.

⁴ Mɔ yaka zi nùi, nɛ mɔ gba sanga nɛ, kɔ mɔ lɔ li nɛ, we kɛ ma nɛ zu zu'du.

⁵ Mɔ dɛa na, lɛ owinɔ 'da mɔ, lɛ zɔ ngamɔ. Mɔ ba bila dɔ̃ɛ kɛ ma dunu do nɔ̃lɔ̃ zã 'da mɔ ni, nɛ mɔ isi ma dɛ nu lɛ.

⁶ Mɔ mbisa lɛ owinɔ 'da mɔ na, lɛ yu dati kpilinɔ kɛ Owi sɛnɛ lɛ wa da ni.

⁷ Mɔ kɔ̃̀ nu lɛ hã mɔ kpásá lɛ. Lɛ a owinɔ kɛ lɛ ngɔ sila mɔ, mɔ bé ngawi 'da mɔ, nɛ mɔ fó lɛ kɔ ngamɔ.

⁸ Gale a kɔ Tɛmpɛloe 'da a kɛ ma santo, nɛ a tɔ̃a na: “Mi nɛ sɛ ngɔ Owi sɛnɛ mi, nɛ mi kala sɛ le Sikɛmɛ do gbangɔlɔ̃ Sukɔtɛ, nɛ mi gɔnɔ sanga nɛ dɛ kɔ̃ owinɔ 'da mi.

⁹ Nù Galadɛ do Manase a mɔ mi, nɛ nù Efraimɛ, mɛ a ndasa 'da mi, nɛ dɔndɔlɔ nwa 'da mi, mɛ a nù Yuda.

¹⁰ Nù Moabɛ ma hɔ sɛ gba sani fɔlɔ tɛ mi, nɛ mi da sɛ mɔ nyanga mi dɛ ngɔ nù Edɔmɛ, takɔ wa ĩ na mɛ a mɔ mi. Nɛ mi he sɛ hiamɔ ngawi zu Ofilisti.”

¹¹ Wi kɛ a wia we e mi kɔ le kɛ gba ngboe zĩ ma takpa ni a wio nde? Wi kɛ a wia we kpe ti mi, kɔ a e mi ngɔ nù Edɔmɛ a wio nde?

¹² Wi tati a mɔ Gale gɔ nde? Nɛ nde mɔ bɛ̃a gɛnɛ lɛ, nɛ mɔ ka 'bɔ osodanɔ 'da lɛ li bolo gɔ.

¹³ Aa Gale, mɔ gálá lɛ dati owi sɛnɛ lɛ, mba gɔ, gala wi kɛ ma yolo kɔ̃ wele ni, ma a mɔ yala iko.

¹⁴ Nɛ nde lɛ mba do Gale fala nɛ kpo, nɛ lɛ dɛ sɛ gba mɔ. Wi a a hã a nɛ sɛ ngɔ owi sɛnɛ lɛ.