Zumanɔ 6 - WE NU GALE 1995

¹ Zuma da Davidi

² Aa NWA, gɛnɛ kɔ zã mɔ nɔ̃̀lɔ̃̀ dɛ tɛ mi, nɛ mɔ tɛ ha etumbu hã mi gɔ. Gɛnɛ kɔ dã ba mɔ dɛ tɛ mi, nɛ mɔ tɛ ha ngamɔ hã mi gɔ.

³ NWA, mɔ dɛ́ 'bako hã mi, we kɛ mi 'bɔ do ngawi bina. NWA, mɔ kpásá mi, we kɛ gbãlã tɛ mi mbɔka do'do.

⁴ Sila mi 'bɔa, nɛ zu mi vĩ wá do'do. Kɔ NWA, mi aka mɔ na, mɔ nɛ gbaka mi soe ki nge nde?

⁵ Aa NWA, mɔ a wi kɔ̃a zã, mɔ tɛ́, kɔ mɔ kpasa mi. Mɔ fó mi kɔ ngamɛ gɛ do'do,

⁶ we kɛ wele fe, nɛ ta zu a ele ngɔ mɔ. Wele le kɔ le 'da ofionɔ, nɛ nde a dɔ́nggɔ́ 'bɔ mɔ gɔ.

⁷ Mi hia gbaa hã hi mi gɔna do'do. Do tũnɔ vɛ̃, nɛ mili kɔ̃a kɛ mi he ni, ma 'bɔ ngɔ mɔ ɔi 'da mi.

⁸ Owi sɛnɛ mi wa hã 'bako hã mi wena, nɛ li mi hɛ̃a tɛ hia kɔ̃a do'do, kɔ mi zɔ́ 'bɔ mɔ de ngboo gɔ.

⁹ Nɛ, owi dɛ 'dã mɛnɔ, nɛ fó tɛ nɛ do'do, we kɛ NWA zila hia kɔ̃a 'da mi.

¹⁰ A zila ala nui 'da mi, nɛ a kɔ̃a gɛnɛ sambala 'da mi.

¹¹ Sape ma ba sɛ li Owi sɛnɛ mi vɛ̃, nɛ wa tana sɛ do kili. NWA a ndi sɛ wa dati mi, nɛ zu wa ma dĩlĩ sɛ tɛ sape do ti.