Zumanɔ 59 - WE NU GALE 1995

Sambala we gɔ gbaka wi kɔ̃ Gale

¹ Zuma 'da Davidi. A ga ma we lengge do kɛ Saulo tumba zi Owele we linggi tɔa 'da a hã wa gbɛ a ni.

² Aa Gale 'da mi, mɔ kpásá mi ti kɔ̃ Owi sɛnɛ mi, mɔ ámbá zu mi ti kɔ̃ Owi tulu mi.

³ Mɔ fó mi ti kɔ̃ Owi gbɛ winɔ, kɛ wa hã 'bakoe hã mi gɛ, nɛ mɔ kpásá mi ti kɔ̃ wa do'do.

⁴ Mɔ zɔ́ Owi zɛlɛ tɛ winɔ, wa kɛ! Wa tɛ wɛ mi, nɛ wa fa we bi mi. Mɛ ni, nɛ nde mi dɛ̀ mbe 'dã mɔ kpo gɔ.

⁵ Aa nwa, mi dɛ̃ mɔ kpo kɛ ma a 'dã ni gɔ, nɛ nde wa tɛa, nɛ wa 'dafa tɛ wa we bi mi. Kɔ mɔ kúlú ngɔ, nɛ mɔ tɛ gbaa 'da mi nga, nɛ mɔ ka mɔ hã mɔ zɔ wa.

⁶ Mɔ Gale, NWA ngɔ mɔ nyanga nza vɛ̃, Gale 'da lɛ obe Israɛlɛ, mɔ kúlú ngɔ, kɔ mɔ hã etumbu hã ogele winɔ, mɔ tɛ ĩ̀ 'bako hã owi vũ to tɛ winɔ ni gɔ.

⁷ Do gɛ̃a wese, nɛ wa kpolo tɛ wa, nɛ wa zĩ 'do ngbo nu le, nɛ wa ngbu dã ɔ nɛ otolo ni.

⁸ 'Dã we dunu kɔ nu wa ngurr, wila we nu wa 'bili mɔ ɔ nɛ du kɔya ni. Nɛ wa lengge na, wele kpo zélé wenɔ lo tɔ̃ ni gɔ.

⁹ Nɛ nde mɔ NWA, mɔ mɔmɔ wa mɔma, nɛ mɔ fi gbɛlɛgbɛsɛ zu winɔ ni vɛ̃.

¹⁰ Mi gbini zã mi do ngawi 'da mɔ, mɔ Gale, mɔ a wi kele zu mi.

¹¹ Gale 'da mi kɔ̃a gɛnɛ mi wena, a dɛ sɛ na, owi sɛnɛ mi wa te li bolo dɛ li mi.

¹² Aa NWA, mɔ a ngele kele zu lɛ, mɔ tɛ kùmù Owi sɛnɛ lɛ vɛ̃ do ti gɔ, dɔ ta zu winɔ 'da mi élé ngɔ ngawi 'da mɔ gɔ, nɛ nde mɔ yáká wa do nga, nɛ mɔ te do wa.

¹³ Wila we nu wa, mɛ a 'dã mɔ dati mɔ. E kɔ wali 'da wa a wa li bili, olo bɛlɛnɔ do fɔmbanɔ nu wa ni.

¹⁴ Mɔ bé gã nɔ̃lɔ̃ zã 'da mɔ hã wa, nɛ mɔ kúmú wa vɛ̃, mɔ tɛ là tala wa gɔ. Nɛ owinɔ nyanga nza gɛ vɛ̃ wa ĩ sɛ na, nwa ngɔ mɛnɔ vɛ̃, wi kpo a mɔ, Gale 'da lɛ obe Israɛlɛ.

¹⁵ Do gɛ̃a wese, nɛ Owi sɛnɛ mi wa kpolo tɛ wa, nɛ wa zĩ 'do ngbo nu le, nɛ wa ngbu dã ɔ nɛ otolo ni.

¹⁶ Wa yɛnggɛ mba mba we fa nyɔngɔmɔ, kɔ fala kɛ wa kpà gã gɔ, nɛ wa ma ngɔ he mɔ gboo.

¹⁷ Kɛ 'da mi, mi dɔnggɔ sɛ ngawi 'da mɔ, nɛ do titole kpo kpo, mi zɛ sɛ kɔ̃ mi we dɔnggɔ kɔ̃a zã 'da mɔ. Mba gɔ, mɔ a gba ngbo kele zu mi, mɔ amba zu mi do 'da fala kɛ mi kɔ 'bako.

¹⁸ Mi ga sɛ zuma we dɔnggɔ do mɔ Gale. Mɔ a wi hã ngawi hã mi, nɛ mɔ 'bɔ a wi kele zu mi. Mɔ a Gale 'da mi, mɔ do kɔ̃a zã wena.