Zumanɔ 58 - WE NU GALE 1995

Gale a wi 'bili ngbangga 'da owinɔ nù gɛ

¹ Zuma 'da Davidi

² Aa nɛ, ogã winɔ ngɔ nù gɛ, 'bili wenɔ 'da nɛ ma a bɔlɔ, takɔ wele gbini zã ɛ do ma nde? Nɛ 'bili ngbangganɔ 'da owinɔ do bɔlɔ nɛ nde?

³ Gɔ! Nɛ lengge tati a 'dã mɔ, nɛ nɛ dɛ ma do mbana. Nɛ ia tɛ nɛ fala ngatɛ ngɔ nù gɛ.

⁴ O'dã winɔ wa yɔ wala kɔ dungu nza 'da wa vɛ̃. Wa ko wa nɛ́, nɛ wa ndo 'bili bɛlɛ iko.

⁵ Falĩ wa 'danga nɛ́ falĩ kangge ni, nɛ zala wa la nɛ́ zala dã gɔ̃,

⁶ kɛ a kɔ̃̀ we zele zuma 'da Owi kala gɔ̃nɔ gɔɛ ni. Gɛnɛ kɔ gã wi kala gɔ̃ ga zuma ɔkɔlɔ do a, nɛ nde a zélé gɔ.

⁷ Aa Gale, mɔ gbíní gogo owinɔ wa ɔ nɛ ogbɔgbɔnɔ ni, mɔ gbɔtɔ zu gogo wa kɔ nu wa do'do.

⁸ E kɔ wa la fai ɔ nɛ fua lì ni, e kɔ wa kolo ɔ nɛ wɔkɔsɔ kɛ wa ma zu nɛ ni.

⁹ E kɔ sa nu wa kolo ɔ nɛ sa nu nda'ba kɛ ma kolo do olo a kɛ a la nɛ ni. E kɔ wa ɔ nɛ fia be kɛ wa kpɔ̃lɔ̃ a ni, nɛ wa tɛ zɔ̃ wese gɔ.

¹⁰ Wa wa sɛ wa dɛ nù ɔ nɛ 'dã wɔkɔsɔ ni, nɛ nde wa ĩ́ sɛ we nɛ dati gɔ. Zã Gale ma nɔ̃lɔ̃ sɛ, nɛ a pɛsɛ wa do tunu li wa.

¹¹ Gale a bili sɛ nu gbã hã 'dã winɔ, nɛ ma hã sɛ yangga hã Owi bɔlɔ zunɔ, nɛ wa yɛnggɛ sɛ do 'dɔ lì tɔkɔ tɛ 'dã winɔ ni.

¹² Nɛ owinɔ vɛ̃ wa tɔ̃ sɛ na: “Gbãlã we, owi bɔlɔ zunɔ wa kpa sɛ si olo bɔlɔ zui 'da wa.”