Zumanɔ 57 - WE NU GALE 1995

Sambala we gɔ gbaka wi kɔ̃ Gale

¹ Zuma 'da Davidi. A ga ma we lengge do kɛ a yu zi Saulo, nɛ a usu kɔ ta ni.

² A Gale, mɔ ĩ́ 'bako hã mi gɔ nde? Mi yu dɛ 'da mɔ na mɔ kele zu mi, nɛ mi tɛa we usu tɛ mi ti sala 'baka mɔ, gbaa na ngamɛ la do'do sɛ nɛ de.

³ Mi sa mɔ hã mɔ Gale, kɛ mɔ nɛa ngɔ mɔ vɛ̃, nɛ mɔ dɛ mɛnɔ vɛ̃ hã mi ni.

⁴ Yolo tɛ li nza i, mɔ kɔ̃ sɛ nu mi, nɛ mɔ gbaka mi, nɛ mɔ dɛ sɛ na, owi zɛlɛ tɛ mi wa te li bolo. E kɔ mɔ dɛ olo nu mɔ, nɛ mɔ be kɔ̃a zã 'da mɔ hã mi.

⁵ Owi sɛnɛ mi wa zĩ mi takpa. Wa dãlã ɔ nɛ ogbɔgbɔ kɛ wa nyɔngɔ wele ni. Zu gogo wa 'bɛ̃lɛ̃ nɛ́ zu sɛlɛ do kpili, nɛ nu lɛfɛ wa tɔ̃a nɛ́ nu buluti ni.

⁶ Aa Gale, mɔ kúlú ngɔ tɛ li nza i, nɛ mɔ be na mɔ a gã wi, nɛ dɔ̃lɔ̃ li 'da mɔ pɛsɛ ngɔ nù nga vɛ̃.

⁷ Owi sɛnɛ mi wa fi gbanda li wala 'da mi, nɛ mi bili zu mi, nɛ mi la do ti nɛ. Wa gu kɔ̃ hã mi, nɛ wa wele nɛ wa tia kɔ̃ɛ ni.

⁸ Aa Gale, mi wè 'bɔ tɛ ba kafi fala kpo gɔ, mi kɔ̃a we ga zuma we dɔnggɔ do mɔ.

⁹ Mi kɔ̃a we kulu ngɔ do titole belee, dati kɛ na wese kulu ngɔ ni, nɛ mi ba kembe do kundi 'da mi dɛ kɔ̃ mi, hã mi zɛ ma.

¹⁰ Aa NWA, mi gese sɛ iɔ̃nae hã mɔ, nɛ mi dɔnggɔ sɛ mɔ dɛ sanga onu kɔnggɔ winɔ.

¹¹ Mba gɔ, kɔ̃a zã 'da mɔ we owinɔ 'da mɔ ma gã la mɔ vɛ̃, nɛ dia zã 'da mɔ ma nɛa gbaa, nɛ ma la ngɔ li nza.

¹² Aa Gale, mɔ kúlú ngɔ tɛ li nza i, nɛ mɔ be na mɔ a gã wi, nɛ dɔ̃lɔ̃ li 'da mɔ pɛsɛ ngɔ nù nga vɛ̃.