Zumanɔ 56 - WE NU GALE 1995

Sambala 'da wi kɛ a gbini zã a do Gale

¹ Zuma 'da Davidi. A ga ma we lengge do kɛ Ofilisti wa ba a tɛ kɔ le Gatɛ ni.

² Aa Gale, mɔ ĩ́ 'bako hã mi, tua kɛ Owi sɛnɛ mi wa hã ngamɔ hã mi. Wa bi mi, nɛ wa zɛlɛ tɛ mi tũ kpo kpo.

³ Kɔ̃ tũnɔ vɛ̃, nɛ wa tɛ dɛlɛ wena, nɛ wa bi mi, nɛ wa nɛ ngɔ mi, nɛ wa hã zɛlɛ tɛ hã mi.

⁴ Nɛ nde fala kɛ mi do kili, nɛ mi gbini zã mi do mɔ.

⁵ Mi dɔnggɔ mɔ Gale, we kɛ mɔ kpua mbulu hã mi na, mɔ kpasa sɛ mi. Mi gbini zã mi do mɔ, nɛ mbé kili bá mi gɔ. Mɛ kɛ wele iko wia we dɛ do mi ni a ge nde?

⁶ Tũ kpo kpo, owi sɛnɛ mi wa tɛ 'danga olo nu mi, nɛ wa fa we zɛlɛ tɛ mi fai.

⁷ Wa wɛ mi we hã ngamɔ hã mi, wa 'bã olo nyanga mi, nɛ wa fa we gbɛ mi.

⁸ Wa we sɛ we yu etumbu olo 'dã mɛnɔ vɛ̃ wa dɛ ni nde? Aa Gale, mɔ bé nɔ̃lɔ̃ zã 'da mɔ hã wa, nɛ mɔ té do wa.

⁹ Mɔ ĩ ti zɛlɛ tɛ 'da mi vɛ̃, mɔ kpɔa mili kɔ̃a li mi dɛ kɔ daka, nɛ mɔ zɔa nɛ nde ma dɛlɛ wena.

¹⁰ Do ngba soe kɛ mi sa sɛ mɔ hã mɔ na, mɔ gbaka mi ni, nɛ owi sɛnɛ mi wa kpolo sɛ tɛ wa 'do. We kɛ mi ĩ na mɔ Gale, mɔ si 'do mi.

¹¹ Mi dɔnggɔ mɔ Gale, we kɛ mɔ kpua mbulu hã mi na, mɔ kpasa sɛ mi.

¹² Mi gbini zã mi do mɔ, nɛ mbé kili bá mi gɔ. Mɛ kɛ wele iko wia we dɛ do mi ni a ge nde?

¹³ Aa Gale, mi hã sɛ dɔnggamɔ hã mɔ, ɔ nɛ kɛ mi kpua mbulu nɛ ni, nɛ mi gese sɛ iɔ̃nae hã mɔ.

¹⁴ Tua kɛ mɔ fua mi kɔ fio, nɛ mɔ dɛa na, mi tɛ tè hã mi fe gɔ. Na mɛ ni, mi yɛnggɛ do mɔ, tɛ kɔ yele ngbala kɛ ma hã kpasi ni.