Zumanɔ 55 - WE NU GALE 1995

Sambala 'da wi kɛ wa vũ to tɛ a

¹ Zuma 'da Davidi

² Aa Gale, mɔ gɛ́ zala mɔ, hã mɔ zele sambala 'da mi. Fala kɛ mi ala nu mi hã mɔ, nɛ mɔ tɛ ùsù tɛ mɔ gɔ.

³ Mɔ lénggé do mi, nɛ mɔ gésé nu we hã mi. Zu mi vĩ do'do, mi bi tɛ mi

⁴ dati o'dã wi sɛnɛ mi, kɛ wa da mi ni. Zã wa nɔ̃lɔ̃ dɛ tɛ mi nganda wena, nɛ wa fa we zɛlɛ tɛ mi.

⁵ Sila mi ɔ ngɔ ngbũu do 'bako, nɛ kili fio ba mi.

⁶ Mi tana kili gbulu gbulu, nɛ 'bako gulu zu mi fɛɔɔ.

⁷ Nɛ mi tɔ̃ na: “Ɔ do kɛ mi sɔ do sala 'baka mi boe, nɛ mi bũlũ sɔ ɔ nɛ nɔɛ ni, nɛ mi usu tɛ mi gele fala.

⁸ Nɛ mi yu sɔ nyɛlɛ ndũu, gbaa dɛ li gba zɔ̃ i, nɛ mi ɔ sɔ dɛ i mɔ.

⁹ Nɛ do ngba soe gba bũ kamba, nɛ mi fa sɔ fala dɔ̃ dɔ̃ nɛ mi usu do tɛ mi.”

¹⁰ Aa NWA, mɔ vĩ linggamɔ zu Owi sɛnɛ mi, nɛ mɔ dɛ́ na wa tɛ zèlè ngba wa gɔ. Mba gɔ, mɛ kɛ mi zɔ ma kɔ le gɛ, mɛ tati a mɔ̃lã do zɛlɛ tɛ ngba wi.

¹¹ Do tũ, do gba wese, nɛ 'dã mɛnɔ ni ma yɛnggɛ, nɛ ma kpa kɔ le vɛ̃. Nɛ tɛ gbogbo le, mɛ tati a 'bako do ngamɔ.

¹² Falanɔ vɛ̃, winɔ wa dɛ 'dã mɔ, wa ɔlɔ ngba wa, nɛ wa zɛlɛ tɛ wa do li fandanɔ.

¹³ Wi kɛ a dã mi ni, wi a wi sɛnɛ mi gɔ. A ɔ sɔ do wi sɛnɛ mi, nɛ mi kunu sɔ sila mi. Wi kɛ a be tɛ̃ a ngɔ mi ni, a ɔ sɔ do wi sɛnɛ mi, nɛ mi yu sɔ a.

¹⁴ Nɛ nde wi dɛ mɛnɔ ni do mi, wi a mɔ yali ngba mi, kɛ mɔ a wi kɔ le 'da mi ngboo ni.

¹⁵ Lɛ ba zi zã zu we do mɔ do dia nɛ, nɛ lɛ sambala zi do mɔ fala nɛ kpo tɛ kɔ Tɛmpɛloe 'da Gale.

¹⁶ E kɔ fio gbanga Owi sɛnɛ mi, e kɔ wa la do tunu li wa dɛ kɔ le 'da ofionɔ, tua kɛ 'dã mɔ dunu kɔ sila wa ngurr.

¹⁷ Nɛ nde mi, mi sa mɔ hã NWA Gale na a gbaka mi, nɛ a kpasa sɛ mi.

¹⁸ Do titole, do gba wese, do gɛ̃a wese, nɛ mi he kɔ̃a, nɛ mi ala nu mi hã a, nɛ a zele sa mɛ 'da mi.

¹⁹ 'Da fala kɛ ogba dɔa wi sɛnɛ mi wa bi mi, nɛ a fo sɛ mi ti kɔ̃ wa, nɛ mi 'bana sɛ do lɔa tɛ mi.

²⁰ Gale, kɛ a a NWA kɔ sabɛlɛ do sabɛlɛ ni, a zele sɛ sa mɛ 'da mi, nɛ a hã sape hã wa. Tua kɛ wa kpóló dɛa to tɛ wa gɔ, nɛ wa yú kili Gale gɔ.

²¹ Wi vũ to tɛ wi siki li ɛ dɛ tɛ oyali ngba a, nɛ a bi wa, nɛ a yala mbuli kɛ a kpua zi ni.

²² Wila we nu a ɛ̃fɛ̃ nɛ́ nɔ gɔlɔ ni, nɛ nde do kɔ sila a, nɛ a lengge we bi ngba a. We nu a mbɔkɔ wele ɔ nɛ nɔ mbɔkɔ li dani ni, nɛ nde mɛ a du kɔya kɛ ma 'bɔ we dumu wele.

²³ Nɛ fó dĩ tole linggamɔ zu nɛ do'do, nɛ nɛ a ma dɛ kɔ̃ NWA. Nɛ NWA a dɛ sɛ na, nɛ 'bana dɛ ngɔ nyanga nɛ, we kɛ a lá sɛ Owi bɔlɔ zunɔ na, wa zɔlɔ dɔndɔ fai gɔ.

²⁴ Nɛ mɔ Gale, mɔ dɛ sɛ na, o'dã winɔ ni wa zĩlĩ dɛ go'do zununɔ i. Wanɔ kɛ wa dɛ 'dã mɛnɔ, nɛ wa gbɛ winɔ ni, wa hɔ sɛ gbogbo zã tũ dungu nza 'da wa gɔ. Nɛ nde mi, mi gbini zã mi do mɔ.