Zumanɔ 52 - WE NU GALE 1995

Ngbangga 'da wi kɛ a gbini zã a do kpamɛ 'da a

¹ Zuma 'da Davidi

² A ga ma we lengge do kɛ Dɔɛgɛ, be 'da Edɔmɛ mbisa zi Saulo na, Davidi nɛa 'da nganga Ahimelɛkɛ we ba zã zu a ni.

³ Aa mɔ, wele dɛ ngatɛ gɛ, mɔ do ngawi wena we zɛlɛ tɛ Owi bɔlɔ zunɔ. Gulu kɛ mɔ dɔnggɔ tɛ mɔ ngɔ 'dã mɛnɔ 'da mɔ we ge nde?

⁴ Tũ kpo kpo, nɛ mɔ lengge we dɛ 'dã mɔ. Nu mɔ 'bili mɔ ɔ nɛ buluti ni, mɔ 'dafa bɛlɛ, nɛ mɔ tɔ̃ dɛ ngɔ wele.

⁵ Mɔ kɔ̃a 'dã mɔ olo li dia mɔ, nɛ mɔ kɔ̃ bɛlɛ olo li gbãlã we.

⁶ Mɔ fi nu mɔ kɔ mɛnɔ vɛ̃, nɛ ma 'danga, nɛ ma de tɛ mɔ. Wila we nu mɔ fai mɛ a bɛlɛ.

⁷ Ma kɛ Gale a o sɛ sanga mɔ ɔ nɛ kpana ni. A ba sɛ mɔ, nɛ a fo sɛ mɔ ngɔ nùi gɛ do'do.

⁸ Owi bɔlɔ zunɔ wa zɔ sɛ mɛ kɛ Gale dɛa ni, nɛ wa ɔngbɔ sɛ, nɛ wa mɔmɔ mɔ na:

⁹ “Nɛ zɔ́ wi gɛ, a gbini zi zã a do kpamɛ 'da a, nɛ a è zi Gale do wi kele zu a gɔ. A zɔ zi na, ɛ nganda wena, we duzu kpamɛ 'dɛ ɛ.”

¹⁰ Nɛ nde mi kɛ 'da mi do dia dungu kɔ tɔa 'da mɔ Gale, nɛ mi kpasa sɛ de wena, ɔ nɛ te kɛ nwá nɛ 'bɔ wena ni. Mi gbini zã mi do kɔ̃a zã 'da mɔ Gale fai.

¹¹ Mi gese sɛ iɔ̃nae hã mɔ ndɔti nɛ bina we duzu mɛnɔ vɛ̃ kɛ mɔ dɛa ni. Nɛ mi be sɛ dɛ dati owinɔ 'da mɔ na, mɔ Gale, mɔ a dia wi.