Zumanɔ 51 - WE NU GALE 1995

Sambala we gɔ mbɔkɔ wi kɔ̃ Gale

¹ Zuma 'da Davidi

² 'Do kɛ Davidi ɔa zi do Baseba, wuko 'da Uri ni, nɛ Natanɛ, wi gba olo nu Gale nɛa we dãlã dɛ tɛ̃ a, nɛ Davidi kɔ̃a gɛnɛ 'dã mɛ 'dɛ e. Ma hã a kɔma lɛnggɛ nɛ ko zuma ge.

³ Aa Gale, mɔ ĩ́ 'bako hã mi, we kɛ mɔ do kɔ̃a zã wena. Mɔ gbɛ́ 'dã mɛnɔ 'da mi do'do, tua kɛ mɔ do 'bako li mɔ wena.

⁴ Mɔ fɔlɔ ndi 'dã mɛnɔ mi dɛa ni, nɛ mɔ fó ma vɛ̃, takɔ mi hɔ sa wi li mɔ.

⁵ Mi ĩ na, mi dɛ̃ de gɔ, nɛ ta zu mi dɛ ngɔ 'dã mɛ ni fai.

⁶ 'Dã mɛ kɛ mi dɛa ni, mi dɛa ma dɛ tɛ mɔ zu mɔ kpo. Mba gɔ, mi dɛa mɔ kɛ ma dè li mɔ gɔ. Nɛ mɔ 'bili 'dã we hã mi, nɛ nde mɔ 'bili do bɔlɔ nɛ, nɛ fo sɛ wi kɔ'dɔ mɔ bina.

⁷ Naa mi ba zi zã mi, nɛ a kua mi dɛ kɔ lì 'dã mɔ, nɛ mi a wi dɛ 'dã mɔ.

⁸ Mɔ kɔ̃a na, lɛ Owele, lɛ tɔ̃ gbãlã we, nɛ lɛ dɛ mɔ do wala olo nɛ. Kɔ mi aka mɔ na, mɔ hã siki gbãlã zã hã mi.

⁹ Mɔ fó 'dã mɛ 'da mi do'do, hã mi hɔ sa wi. Mɔ fɔ́lɔ́ ma vɛ̃, hã mi fɛngɛ nde nde nde.

¹⁰ Mɔ bé hã mi na, mɔ mbɔka mi, takɔ sila mi dunu do yangga. Mɔ hã zi zɛlɛ tɛ hã mi la li ngele, nɛ nde di dɔ́ ni, mi nɛ dɛ yangga.

¹¹ Mɔ tɛ zɔ̃ 'dã mɛnɔ 'da mi gɔ, mɔ élé ma vɛ̃ do'do.

¹² Aa Gale, mɔ 'dáfá sila mi hã ma de, mɔ ngándá sila mi, nɛ mɔ hã mbé dia linggamɔ hã mi.

¹³ Mɔ tɛ ndàkà mi nyɛlɛ do mɔ gɔ, nɛ mɔ tɛ dɔ̀ mi do Hi Wi Santo 'da mɔ gɔ.

¹⁴ Mɔ kpásá mi, nɛ mɔ gese yangga hã mi. Mɔ dɛ́ na, mi hɔ wi dɛ olo nu mɔ.

¹⁵ Nɛ mi be sɛ mbula 'da mɔ hã Owi dɛ 'dã mɛnɔ, nɛ wa kpolo sɛ tɛ wa dɛ 'da mɔ.

¹⁶ Aa Gale, mɔ a wi kpasa mi, mɔ tɛ là mi hã wa gbɛ mi gɔ, Mɔ kpásá mi, nɛ mi be sɛ gbãlã we 'da mɔ do yangga.

¹⁷ Nwa 'da mi, mɔ gbáká mi na, mi fĩ nu mi ngɔ we hã mi dɔnggɔ mɔ.

¹⁸ Mɔ kɔ̃̀ na, mi gbɛ sa'de we dɔnggɔ do mɔ gɔ. Gɛnɛ kɔ mi dɔ sa'de we dɔnggɔ do mɔ, nɛ nde ma dé tɛ mɔ gɔ.

¹⁹ Aa Gale, dɔnggamɛ kɛ mi hã hã mɔ, mɛ a 'bakoe kɛ mi dɛ ma olo 'dã mɛ 'da mi ni. Mɔ kɔ̃́ gɛnɛ mi, we kɛ mi dɛa 'bako, nɛ mi kifi sila mi ngɔ 'dã mɛ mi dɛa ni.

²⁰ Mɔ bé dia zã 'dã mɔ hã Owi Yeruzalɛmɛ, nɛ mɔ dɛ ngbo nu le 'da wa dɛ olo nɛ.

²¹ 'Do nɛ, nɛ mɔ kɔ̃ sɛ na wa tɛ do dɔnggamɛnɔ, ɔ nɛ kɛ mɔ bia zi hã wa ni. Nɛ wa dɔ sɛ sa'de hã mɔ, nɛ wa tɛ sɛ 'bɔ do owili ngɔmbɔ, nɛ wa gbɛ wa ngɔ gbagala 'da mɔ we dɔnggɔ do mɔ.