Zumanɔ 50 - WE NU GALE 1995

Tɛlɛ tɛ dɔnggɔ Gale do gbãlã we

1 Zuma 'da Asafɛ

¹ Zuma 'da Asafɛ NWA Gale ngɔ mɔ nyanga nza vɛ̃ wele we. A sa mɔ hã owinɔ ngɔ nù gɛ vɛ̃, yolo 'biti gba wese we hɔ 'biti gɛ̃a wese.

² Gale a tɛ Sioni, le kɛ ma dia nɛ ge nde ni, nɛ a bia tɛ̃ a ɔ nɛ yele ngbala ni.

³ Gale 'da lɛ tɛ tɛ nɛ, a tɛ́ do tũ nu a gɔ. Gba nyɛa we bɛlɛ mɔ dati a la la la, nɛ gba bũ kamba tɛ fi kɛ zã a vioo.

⁴ A sa mɔ hã li nza do nù na, wa dungu tɛ ngbangga 'da owinɔ 'dɛ ɛ kɛ ɛ nɛ 'bili ma ni.

⁵ A na: “Nɛ mbá li owinɔ 'da mi dɛ dati mi. Wi a wanɔ kɛ wa hã dɔnggamɔ hã mi, we kɛ wa gba zi tɔkɔ do mi ni.”

⁶ Nɛ li nza hia mɔ na: “Gale a wi bɔlɔ zu, wi gɔnɔ ngbangga, wi a a zu a kpo.”

⁷ Nɛ Gale na: “Aa nɛ, owinɔ 'da mi, nɛ zélé mi sɛ, mi do lɛnggɛ we tɔ̃ hã nɛ. Nɛ, obe Israɛlɛ, mi nɛ tɔ̃ ngbangga dɛ zu nɛ. Mi Gale, mi a Gale 'da nɛ.

⁸ Mi nɛ hã etumbu hã nɛ, nɛ nde mi hã́ sɛ ma we dɔnggamɛnɔ 'da nɛ gɔ, we kɛ nɛ mbɔkɔ tɛ nɛ tɛ dɔ sa'de, we dɔnggɔ do mi fala kpo gɔ.

⁹ Mi wè tɛ nɛ we ba ngɔmbɔ kɔ ngbo 'da nɛ, tabi dua kɔ ba'de 'da nɛ gɔ.

¹⁰ Mba gɔ, mi a wele sa'denɔ zamɔ gɛ vɛ̃, nɛ onadalamɛnɔ kɔ lenɔ ni, wele wa vɛ̃ a mɔ́ mi.

¹¹ Mi a wele onɔɛnɔ do osa'de zamɛnɔ vɛ̃.

¹² “Ɔ do kɛ na, wɔ ba sɔ mi ba, nɛ nde mi áká sɔ we nyɔngɔmɔ kɔ̃ nɛ gɔ, we kɛ wele nùi, do omɛnɔ ngɔ nɛ gɛ vɛ̃ a mɔ́ mi.

¹³ Mi wia we nyɔngɔ mulu wili ngɔmbɛnɔ, nɛ mi nɔ tɔkɔ wili duanɔ 'da nɛ nde?

¹⁴ Dia nɛ na, nɛ gésé iɔ̃nae hã mi, Gale 'da nɛ, nɛ nɛ dɛ́ mbuli kɛ nɛ kpua zi hã mi Gale, kɛ mi nɛa ngɔ mɔ vɛ̃ ni.

¹⁵ Nɛ dɛ na mɛ ni, nɛ do ngba soe ngamɔ, hã nɛ sa mɔ hã mi, nɛ mi kpasa sɛ nɛ, nɛ nɛ dɔnggɔ sɛ dɔ̃lɔ̃ li 'da mi.”

¹⁶ Nɛ Gale tɔ̃a 'bɔ hã wi dɛ 'dã mɛnɔ na: “Gulu kɛ nɛ tɔlɔ mbulanɔ 'da mi do zu nɛ, nɛ nɛ tɔ̃ lɛnggɛ gba tɔkɛ kɛ nɛ gba do mi ni, nɛ nde nɛ dɔ́nggɔ́ ma gɔ we ge nde?

¹⁷ Nɛ kɔ̃̀ na mi kɔ'dɔ nɛ gɔ, nɛ nɛ bɛ̃a we dɛ mbulanɔ 'da mi.

¹⁸ Nɛ kɔ̃a gɛnɛ we mɔ́ wi zũ, nɛ nɛ dungu do wi kɛ a yɛnggɛ do ko mɔ́ wili ni.

¹⁹ Nɛ hã tɛ nɛ we tɔ̃ 'dã we mɔ́ ongba nɛ, nɛ wila we nu nɛ fai a bɛlɛ.

²⁰ Nɛ siki li nɛ dɛ tɛ onya nɛ ngboo, nɛ nɛ fi wa kɔ ngamɔ.

²¹ Mɛnɔ ni, nɛ dɛa ma, nɛ mi wè tɛ tɔ̃ we gɔ nde? Nɛ lengge na, mi wia kɔ̃ do nɛ nde? Ngangga ni, mi nɛ hã etumbu hã nɛ, nɛ mi be 'dã mɛ 'da nɛ dɛ nza.

²² “Nɛ, winɔ kɛ ta zu nɛ ila ngɔ mi Gale ni, nɛ zélé gulu we gɛ ɔ dia. Ní gɔ, nɛ mi ɛ̃ sɛ sanga nɛ, nɛ́ nde wele kpo ámbá sɛ mi gɔ.

²³ Wi kɛ a dɔnggɔ mi, wi a wele kɛ a gese iɔ̃nae hã mi ni. Wi kɛ a dɛ tɛ̃ a ɔ dia ni, nɛ mi be sɛ hã a na, mi a wi kpasa wi.”