Zumanɔ 5 - WE NU GALE 1995

Sambala 'da wi kɛ a fa gala wi kɔ̃ NWA

¹ Zuma 'da Davidi

² Aa NWA, mɔ gɛ́ zala mɔ, hã mɔ zélé hiamɔ ala nui 'da mi sɛ!

³ Aa Gale 'da mi, mɔ 'bɔ a NWA 'da mi. Mɔ gɛ́ zala mɔ we zele sa mɛ 'da mi, we kɛ mi dɛ sambala gɛ hã mɔ.

⁴ Aa NWA, do titole, nɛ mɔ zele gɛlɛ mi. Fala ma ngɔ sa nɛ, nɛ mi kulu ngɔ, nɛ mi 'dafa tɛ mi we sambala mɔ, nɛ mi 'bɔ na, mɔ gese nu nɛ hã mi.

⁵ Mɔ a Gale kɛ mɔ dɛ́ yangga we 'dã mɔ gɔ. 'Dã wi wè tɛ kɔlɔ do mɔ gɔ.

⁶ Owinɔ wa dɛ wali ni, sila mɔ kɔ̃̀ gɛnɛ wa gɔ. Owanɔ wa fa we hã ngamɔ hã ngba wa ni, mɔ sɛnɛ wa vɛ̃, mɔ kɔ̃̀ wa gɔ.

⁷ Mɔ kumu Owi 'bili bɛlɛnɔ, nɛ zã mɔ kɔ̃̀ gɛnɛ owi gbɛ wi, do owi ɔkɔlɔ wi gɔ.

⁸ Nɛ nde aa NWA, kɛ 'da mi, mi wia we le kɔ tɔa Tɛmpɛloe 'da mɔ, nɛ mi gu li mi nù we dɔnggɔ mɔ, we kɛ mɔ kɔ̃ mi wena.

⁹ Aa NWA, mɔ a Gale bɔlɔ zu, mɔ zɔ owi sɛnɛ mi wa dɔa la li! Mɔ kã́ mi tɛ fala kɛ mɔ kɔ̃a ni, nɛ mɔ 'dáfá wala, hã mi ba do ma.

¹⁰ Owi sɛnɛ mi wa wele we, nɛ nde mi wè tɛ gbini zã mi do lɛnggɛ nu wa gɔ. Wa fa tati a we 'danga wele iko. Lɛnggɛ nu wa ɛ̃fɛ̃ tɛ wi wena, nɛ nde ma kã wele dɛ li fio.

¹¹ Aa Gale, mɔ gɔ́nɔ́ 'dã we hã wa. E kɔ bili olo nu wa ma ba wa wele nɛ. Mɔ ndáká wa ngɔ li mɔ do'do, we kɛ wa dɛa nga zu, nɛ wa bɛ̃a dɛ olo nu mɔ.

¹² Nɛ nde yangga wena do owinɔ kɛ wa gbini zã wa do mɔ ni. Wa ga zuma, nɛ wa zɛ nu wa do yangga, we kɛ mɔ zɔ mɔ tɛ wa fai. Owanɔ wa kɔ̃a gɛnɛ mɔ ni, wa tɔ̃ de sako li mɔ, we kɛ mɔ a wi amba zu wa.

¹³ Mɔ NWA, mɔ dɛ dia mɔ do Owi bɔlɔ zu. Dia zã 'da mɔ, ma kele zu wa ɔ nɛ ngele ni.