Zumanɔ 49 - WE NU GALE 1995

Oyia winɔ wa gbini zã wa do kpamɛnɔ 'da wa

¹ Zuma 'da obe zã Kore

² Aa nɛ, owinɔ ngɔ nù gɛ vɛ̃, nɛ gɛ́ zala nɛ hã nɛ zélé we gɛ.

³ Ogã winɔ do obe winɔ, owi kpamɛnɔ do Owi sãnɔ, nɛ vɛ̃ nɛ zélé mi sɛ.

⁴ Mi do dia lingga we, mi nɛ tɔ̃ lɛnggɛ hã zã.

⁵ Mi nɛ gɛ zala mi we zele gba wenɔ, nɛ mi zɛ kundu we tɔ̃ gulu nɛ.

⁶ Do ngba soe ngamɔ, nɛ nde kili bá mi gɔ. 'Da fala kɛ owi sɛnɛ mi wa zĩ mi takpa we zɛlɛ tɛ mi, nɛ nde mi dɛ́ kili gɔ.

⁷ Owinɔ ni wa gbini zã wa do kpamɛnɔ 'da wa, nɛ wa dɔnggɔ tɛ wa do ma.

⁸ Wele do wala we gɔnɔ zu ɛ tabi zu ngba ɛ kɔ̃ Gale na, dɔ a fé gɔ ni bina.

⁹ We kɛ mbili gɔnɔ do zu wele kɔ fio, ma gã la li ngele. Wele wè tɛ kpa ma vɛ̃ dɛ kɔ̃ ɛ na,

¹⁰ ɛ 'bana nza fai, nɛ ɛ tɛ lè kɔ zunu gɔ ni gɔ.

¹¹ Wele vɛ̃ ĩ de wena na, owi hãnɔ wa fe fio fia, ɔ nɛ kɛ oyɔndɔ winɔ wa fe ni, nɛ wa la kpamɛnɔ olo wa ni hã obe zã wa.

¹² Gɛnɛ kɔ Owi kpamɛnɔ ni, wa ba nùnɔ do mɔ́ wa, nɛ nde wa le sɛ ti zunu, nɛ wa ɔ sɛ dɛ di ni fai.

¹³ Kpamɔ wè tɛ kpasa wele kɔ fio gɔ, wele Sɔkpɔ do fio ɔ nɛ sa'de ni.

¹⁴ Nɛ zɔ́ mɛ kɛ ma dɛ sɛ owinɔ kɛ wa gbini zã wa do kpamɛ 'da wa, do owanɔ kɛ wila we nu wa ɔlɔ wa ni, ma kɛ:

¹⁵ Wa fe sɛ, nɛ wa le sɛ ti zunu, nɛ wa mbulu. Owi bɔlɔ zunɔ wa nɛ sɛ ngɔ wa, nɛ owinɔ ni wa la sɛ dɛ kɔ le 'da ofionɔ, nɛ wa ɔ sɛ dɛ i mɔ fai.

¹⁶ Nɛ nde Gale a kpasa sɛ mi, a fo sɛ mi kɔ fio.

¹⁷ Fala kɛ mbe wele kpo hɔ wi kpamɔ, kɔ kpamɛ 'da a dɛlɛ wena, nɛ we nɛ tɛ zɛlɛ mɔ gɔ.

¹⁸ We kɛ do ngba soe fio 'da a, nɛ nde a bá sɛ mɔ kpo gɔ, nɛ kpamɛ ni lé sɛ 'do a kɔ zunu i gɔ.

¹⁹ Kɔ dungu nza 'da a, a be tɛ̃ a fai na, ɛ a wi yangga, we kɛ mɛnɔ 'da a vɛ̃ la do dia nɛ.

²⁰ Gɛnɛ kɔ na mɛ ni, nɛ nde a fe sɛ, nɛ a kpa sɛ ngba a do oyaa a kɛ wa lia kɔ gba tũi fai ni.

²¹ Kpamɔ wè tɛ kpasa wele kɔ fio gɔ, wele Sɔkpɔ do fio ɔ nɛ sa'de ni.