Zumanɔ 48 - WE NU GALE 1995

Sioni le 'da Gale

¹ Zuma 'da obe zã Kore

² NWA Gale a gã wi, ma wia na lɛ dɔnggɔ Gale 'da lɛ, tɛ kɔ le 'da a Yeruzalɛmɛ, kɛ ma a tɛ ngɔ kala santo.

³ Kala Sioni a le 'da gã nwa, ma ngala wena, nɛ ma de wena. Mɛ a kala kɛ ma hã yangga hã winɔ vɛ̃, mɛ a gã le ngɔ nùi gɛ yerr.

⁴ Gba ngbo zĩ nu ma takpa, nɛ Gale a wi amba zu nɛ.

⁵ Onwanɔ wa nda zi ngba wa, nɛ wa tɛa we bi le Yeruzalɛmɛ.

⁶ Wa hɔa, hã wa nɛa we zɔ ma, nɛ sila wa gɔna, nɛ wa dɛa kili, nɛ wa kpolo tɛ wa do yu.

⁷ Nɛ wa tana kili gbulu gbulu, ɔ nɛ wuko kɛ a do zɛlɛ kula ni.

⁸ Wa tana ɔ nɛ omasua, kɛ gba bũ kamba yaka ma ni.

⁹ Lɛ zila lɛnggɛ mɛnɔ kɛ Gale dɛa zi ni, nɛ ngangga ni, lɛ zɔa ma. Ma dɛa tɛ̃ ɛ kɔ le 'da Gale 'da lɛ, kɛ a a NWA ngɔ mɔ nyanga nza vɛ̃ ni. Gale zɔ mɔ tɛ le ni fai na, dɔ ma 'dángá gɔ.

¹⁰ Aa Gale, lɛ le kɔ Tɛmpɛloe 'da mɔ, nɛ lɛ tɔ̃ lɛnggɛ kɔ̃a zã 'da mɔ.

¹¹ Dɔ̃lɔ̃ li 'da mɔ ma kpa ngɔ nù gɛ vɛ̃, owinɔ vɛ̃ wa dɔnggɔ sɛ mɔ. Mɔ dɛ sɛ to nwa 'da mɔ do bɔlɔ zu.

¹² Owi kɔ le Yeruzalɛmɛ, mba do Owi ngɔ nù Yuda wa dɛ yangga, we kɛ mɔ 'bili wenɔ do bɔlɔ nɛ ngboo.

¹³ Nɛ zĩ nu le Yeruzalɛmɛ vɛ̃, nɛ nɛ tɔlɔ ngala tɔanɔ kɛ wa zɔ do mɔ nu le ni.

¹⁴ Nɛ sókó 'bɔ gba ngbo nu le ɔ dia, takɔ nɛ we sɛ we tɔ̃ lɛnggɛ nɛ hã obe zã nɛ na,

¹⁵ Gale wele kɛ gɛ, a a Gale 'da lɛ kɔ sabɛlɛ do sabɛlɛ. A kpe dati lɛ 'da fala fai.