Zumanɔ 46 - WE NU GALE 1995

NWA Gale fala nɛ kpo do lɛ

¹ Zuma 'da obe zã Kore

² Gale a wi kele zu lɛ, nɛ a a wi ngo sila lɛ. Do 'da fala ngamɔ, nɛ nde a do lɛ dɔ̃ɔ we gala lɛ.

³ Ma hã lɛ wè we dɛ kili mɔ kpo gɔ. Gɛnɛ kɔ nùi tana gbirr, hã okalanɔ ma gbini, hã ma si ti go'do ogba lìnɔ, nɛ nde kili bá lɛ gɔ.

⁴ Tabi gɛnɛ kɔ gba lìnɔ ma dɛ ngele, hã ma o dã, hã ma go'do dɛ ngɔ, hã ma yaka okalanɔ, nɛ nde kili bá lɛ gɔ.

⁵ Mbe lì kpo boe, ma fo do kɔ le santo 'da NWA Gale, kɛ a nɛa ngɔ mɔ vɛ̃, nɛ ma hã yangga hã owinɔ 'da a.

⁶ Gale kɔ le ni boe, ma wè tɛ 'danga nɛ gɔ. Do titole, nɛ Gale tɛ we gala le ni.

⁷ A wila we, nɛ nùi ma yaka, nɛ ogele winɔ wa tana, nɛ dɛa to nwa 'da wa ma ia.

⁸ NWA ngɔ mɔ nyanga nza vɛ̃ do lɛ boe. Gba ngbo kele zu lɛ, wi a a Gale 'da Yakɔbɔ.

⁹ Nɛ tɛ́, nɛ nɛ zɔ mɛnɔ kɛ NWA dɛa ni, a dɛa mɔ kɛ ma kula nu owinɔ vɛ̃.

¹⁰ A amba bolo ngɔ nù gɛ vɛ̃, nɛ ma Sɔkpɔ. A gbini sanga onzabelenɔ, do osɛlɛ bolonɔ, nɛ a da ongelenɔ li we.

¹¹ A hia mɔ na: “Nɛ lá fala bi bolo, nɛ nɛ ĩ́ na mi a Gale! Mi a nwa ngɔ winɔ nyanga nza gɛ vɛ̃!”

¹² NWA ngɔ mɔ nyanga nza vɛ̃ do lɛ boe. Gba ngbo kele zu lɛ, wi a a Gale 'da Yakɔbɔ.