Zumanɔ 45 - WE NU GALE 1995

Zuma ga fala ba ngba wi 'da nwa

¹ Zuma 'da obe zã Kore

² Dia linggamɔ dunu kɔ zu mi, nɛ mi dɛa zuma gɛ na, wa ga ma we dɔnggɔ do mɔ nwa. Nɛ mi kɔ̃a na mi dɛ ma do dia nɛ ngboo, ɔ nɛ wi kɛ a ĩ ti kɔmɔ mbɛti wena ni.

³ Mɔ dia zagbãlã nɛa ngɔ owinɔ vɛ̃, nɛ mɔ ĩ ti wele dia lɛnggɛ do bɔlɔ nɛ. Gale wele nu ɛ tɛ mɔ kɔ sabɛlɛ do sabɛlɛ.

⁴ Mɔ a nga wi bolo, mɔ gãlã du kɔya 'da mɔ 'dɛ tili mɔ, nɛ ma be dɔ̃lɔ̃ li do gã wi 'da mɔ.

⁵ Mɔ gbɔ́tɔ́ nzabele 'da mɔ, nɛ mɔ ndɔlɔ Owi sɛnɛ mɔ, nɛ mɔ nɛ ngɔ wa. Mɔ kṹ ngɔ mbalata 'da mɔ, nɛ mɔ nɛ we bi bolo ngɔ wi bɔlɔ zunɔ do wi tɔ̃ gbãlã wenɔ. Mɔ dɛ́ ogba mɔ, we kɛ mɔ nganda wena.

⁶ E kɔ otɔa nu kpilinɔ 'da mɔ, ma ndɔlɔ li sila owi sɛnɛ mɔ, nɛ wa ala nù ti nyanga mɔ.

⁷ Dɛa to nwa kɛ Gale hã ma hã mɔ ni, ma 'bana sɛ fai. Mɔ dɛ to nwa 'da mɔ do bɔlɔ nɛ.

⁸ Mɔ kɔ̃a gɛnɛ bɔlɔ zu dɛa mɔ, nɛ mɔ sɛnɛ 'dã mɔ. We duzu ki ni, ma hã Gale saka mɔ, nɛ a e mɔ do nwa. Gale 'da mɔ hã yangga hã mɔ, nɛ mɔ nɛa ngɔ ongba mɔ vɛ̃.

⁹ Tulunɔ 'da mɔ ma unu onɔ yɔmbɔ. Wa sɛa gogo fɔlɔ, nɛ wa gɛzɛ do kɔ tɔanɔ 'da mɔ, nɛ wa ga zuma kɔ tɔanɔ ni we hã yangga hã mɔ.

¹⁰ Obenɔ 'da ogele nwanɔ, wa sanga owukonɔ 'da mɔ kɛ wa kɔ̃a gɛnɛ mɔ ni. Wuke kɛ mɔ nɛ ba a ni, a 'dafa tɛ̃ a do dia mɔ mbali, nɛ a dungu tɛ ngɔ ngawili kɔ̃ mɔ.

¹¹ Aa wuke 'da nwa, mɔ zélé mi, nɛ mɔ ká mɔ do sɔ̃a li sɛ. Mɔ tɛ lènggè 'bɔ do owi nanɔ 'da mɔ, tabi onya mɔ gɔ.

¹² E kɔ nwa kɔ̃ gɛnɛ mɔ we dia ndala tɛ mɔ. Ngangga ni, a a nwa 'da mɔ, mɔ bílí zu mɔ nù dati a, nɛ mɔ dɔnggɔ a.

¹³ Aa mɔ, boko Tirɛ, Owi kpamɔ wa tɛ sɛ, nɛ wa 'dɔlɔ sɛ odia mɔ hã mɔ, takɔ mɔ ɔ do dia zã dɛ 'da wa.

¹⁴ Wuke 'da nwa hi'da iyaka mɔ mbali, nɛ ma ndele do a gɔ̃lĩ gɔ̃lĩ.

¹⁵ Tuli a hi'da ni, ma do olangi kpi do kpi, nɛ wa kã a, nɛ a le 'da nwa. Obe zɔnga yali ngba a wa kpia dɛ 'do a, nɛ wa le do a 'da nwa i.

¹⁶ Wa kã a do kaliã, do yangga, nɛ wa lia dɛ kɔ tɔa nwa i.

¹⁷ Aa nwa 'da mi, mɔ ko sɛ obulu be, nɛ wa dungu sɛ nwa dɛ olo oyaa mɔ. Mɔ e sɛ wa do nwa ngɔ nù gɛ vɛ̃.

¹⁸ Nɛ zuma 'da mi ma dɛ sɛ na, sako li mɔ 'bana ngɔ nù gɛ fai. Na mɛ ni, nɛ owinɔ wa tɔ̃ sɛ dia zu li mɔ kɔ sabɛlɛ do sabɛlɛ.