Zumanɔ 42 - WE NU GALE 1995

BƆA 'BUKU ZUMANƆ (Zumanɔ 42—72) Sambala 'da wi kɛ a tɛ kɔlɔ 'duli

¹ Zuma 'da obe zã Kore

² Aa Gale, mi fa mɔ tu tu tu, ɔ nɛ kɛ zambɛlɛ 'bã nu ɛ tɛ fa fua lì ni.

³ Aa Gale wele kpasi, wɔ tɛ mɔ ba mi, ɔ nɛ wɔ lì ba wele ni. Mi nɛ le kɔ Tɛmpɛloe 'da mɔ, hã mi be tɛ mi hã mɔ soe ki nge nde?

⁴ Mi he kɔ̃a do tũ, do gba wese, nɛ nyɔngɔmɔ nu mi a mili kɔ̃a, we kɛ owi sɛnɛ mi wa aka nu mi fai na: “Gale 'da mɔ dɛ́ mɔ gɔ we ge nde?”

⁵ Nɛ ta zu mi gba ngɔ mɛnɔ mi dɛa zi dati ni, nɛ sila mi dunu do 'bako. Mi lingga tɛlɛ tɛ kɛ mi kpia zi dati ogba dɔa winɔ, nɛ mi kã zi wa do yangga dɛ nu tɔa 'da mɔ Gale, nɛ lɛ dungu ɛngga, nɛ lɛ ga zuma we dɔnggɔ do mɔ ni.

⁶ Nɛ mi aka tɛ mi na, gulu kɛ 'bako ba mi we ge nde? Gulu kɛ tɛ mi gɛ̃, nɛ mi ala nu mi we ge nde? Dia nɛ na, mi gbini zã mi do mɔ Gale, nɛ mi dɔnggɔ 'bɔ mɔ mbé nɛ. Mɔ a Gale 'da mi, wi kpasa mi.

⁷ 'Bako ba mi, nɛ ta zu mi gba ngɔ mɔ, Gale 'da mi. Nɛ mi yula tɛ nu l Yɔrdanɛ, dɔ̃ɔ do okala Hɛrmoni do Misearɛ, nɛ mi sa mɔ hã mɔ.

⁸ Mɔ dɛa na, 'bako o dã zu mi ɔ nɛ sulu lì ni, nɛ ma nda ngbɛ ɛ dɛ ngɔ mi, nɛ ma gulu zu mi fɛɔɔ.

⁹ E kɔ do gba wese, nɛ NWA, mɔ be kɔ̃a zã 'da mɔ hã mi, nɛ do tũi, mi ga zuma hã mɔ, nɛ mi sambala mɔ Gale, kɛ mɔ hã kpasi hã mi ni.

¹⁰ Nɛ mi aka mɔ Gale, kɛ mɔ a wi kele zu mi ni na: “Gulu kɛ ta mɔ ila ngɔ mi we ge nde? Gulu kɛ mɔ la mi na mi kpa ngamɔ, nɛ owi sɛnɛ mi wa zɛlɛ tɛ mi we ge nde?”

¹¹ Mɔ zɔ́, mi tɛ fe dɛla ti kɔ wa, nɛ wa aka nu mi fai na: “Gale 'da mɔ dɛ́ mɔ gɔ we ge nde?”

¹² Nɛ mi aka tɛ mi na, gulu kɛ 'bako ba mi we ge nde? Gulu kɛ tɛ mi gɛ̃, nɛ mi ala nu mi we ge nde? Dia nɛ na, mi gbini zã mi do mɔ Gale, nɛ mi sambala 'bɔ mɔ mbé nɛ.