Zumanɔ 41 - WE NU GALE 1995

Sambala 'da wi kɛ wa zɛlɛ tɛ̃ a

¹ Zuma 'da Davidi

² Mɛ a yangga we wi kɛ a lengge do Owi sãnɔ ni, NWA a kpasa sɛ a do ngba soe ngamɔ.

³ NWA ia a do tunu li a, nɛ a hã yangga hã a ngɔ nù gɛ. A là a hã Owi sɛnɛ a na, wa zɛlɛ tɛ̃ a gɔ.

⁴ Fala kɛ zɛlɛ ba a, nɛ NWA zɔ mɔ tɛ̃ a, nɛ a gala a ngɔ tangge zɛlɛ.

⁵ Nɛ mi tɔ̃a na: “Aa NWA, mi dɛa 'dã mɔ dati mɔ, mɔ ĩ́ 'bako hã mi, nɛ mɔ kpásá mi.”

⁶ Owi sɛnɛ mi wa zonggo zu mi, wa kɔ̃a na mi fé, hã ta zu winɔ ele ngɔ mi.

⁷ Owanɔ kɛ wa tɛ we zɔ mi ni, wa tɔ̃́ gbãlã we hã mi gɔ. Wa kũ bɛlɛ do zu li mi, nɛ wa hɔ nza we nda sako li mi.

⁸ Owi sɛnɛ mi wa mba ngba wa, nɛ wa lungu mi, nɛ wa lengge 'dã we dɛ ngɔ mi.

⁹ Wa tɔ̃ na: “Owi tũ wa nyɔngɔ a, ɔ nɛ kɛ zɛlɛ ni fi a nù ni, a kúlú sɛ ngɔ gɔ.”

¹⁰ Nɛ yali ngba mi ngboo, kɛ lɛ mba 'do kɔ̃ lɛ do a ngɔ nyɔngɔmɔ, nɛ mi gbini zi zã mi do a ni, a siki tɛ̃ a, nɛ a vũ to tɛ mi.

¹¹ Nɛ nde mi aka mɔ nwa na, mɔ ĩ́ 'bako hã mi, hã mɔ zĩ́ mi ngɔ, takɔ mi bili nu gbã hã Owi sɛnɛ mi.

¹² Mɔ dɛ́ na, wa tɛ nɛ̀ ngɔ mi gɔ. Ní, nɛ mi ĩ sɛ ti dia zã 'da mɔ we mi.

¹³ Mɔ dɛ́ 'bɔ na, mi 'bana do dia gulu we, nɛ mɔ é mi fai dɛ kɛ zã mɔ.

¹⁴ Lɛ dɔ́nggɔ́ NWA Gale 'da obe Israɛlɛ kɔ sabɛlɛ do sabɛlɛ. Amɛ! E kɔ ma ɔ na mɛ ni.