Zumanɔ 40 - WE NU GALE 1995

Zuma we gɔ gala wi kɔ̃ Gale

¹ Zuma 'da Davidi

² Mi gbini zã mi do NWA do sila mi kpo, nɛ a gɛa zala a, nɛ a zele sa mɛ 'da mi.

³ A fua mi kɔ gba 'du kɔ̃ fio, nɛ a gbɔta mi kɔ 'bɛ̃tɛ̃ dɛ nza, nɛ a zĩ mi do nyanga mi. Ngangga ni, mi yɛnggɛ, nɛ nde kili bá mi gɔ.

⁴ NWA yambala mbé zuma hã mi, mɛ a zuma we dɔnggɔ do a, Gale 'da lɛ. Ogba dɔa winɔ wa zɔ ni, nɛ wa yu sɛ kili a, nɛ wa gbini sɛ zã wa do a.

⁵ Wi kɛ a hã tɛ̃ a hã NWA ni, a a wi yangga. A síkí li a dɛ tɛ osɛa tenɔ gɔ, nɛ a mbá ngba a do Owi dɔnggɔ gale bɛlɛnɔ gɔ.

⁶ Aa NWA Gale 'da lɛ, mɔ dɛa gbamɔ hã lɛ wena. Fo wi we kɔ̃ do mɔ bina. Mɔ 'dafa odia mɔ wena we dɛ ma hã lɛ, mi wé sɛ tɛ tɔlɔ mɛnɔ ni vɛ̃, nɛ ma e gɔ.

⁷ Mɔ fí zala mi, nɛ mɔ bia hã mi na, odɔnggamɛnɔ ma dé tɛ mɔ gɔ, nɛ mɔ àkà na, wa dɔ sa'de ngɔ gbagala we dɔnggɔ do mɔ, tabi we fo ku'da 'dã mɛnɔ gɔ.

⁸ Na mɛ ni, nɛ mi tɔ̃a na: “Mi kɛ̃, mi kulu ngɔ, nɛ mi nɛ dɛ 'da mɔ. Mɛ mi wia we dɛ ma ni, wa kɔma ma kɔ 'buku mbula 'da mɔ.

⁹ Aa Gale 'da mi, mi kɔ̃a we dɛ mɛnɔ kɛ ma de tɛ mɔ ni, nɛ mi usu mbulanɔ 'da mɔ dɛ kɔ sila mi.”

¹⁰ Mɛnɔ mɔ dɛa we kpasa do mi ni, mi tɔ̃a sako nɛ sanga owinɔ 'da mɔ kɛ wa mba li ngba wa ni, nɛ mi ùsù mɔ kpo gɔ. Nɛ mɔ NWA, mɔ ĩ na, mi lá sɛ fala tɔ̃ ma gɔ.

¹¹ Mɔ kpasa mi, nɛ mi ùsù lɛnggɛ nɛ dɛ kɔ zã mi gɔ, mi tɔ̃a sako dia zã 'da mɔ na, mɔ a wi kpasa mi. Nɛ mi kpè nu mi sanga owinɔ 'da mɔ kɛ wa mba li ngba wa ni gɔ. Mi tɔ̃a lɛnggɛ gbãlã we 'da mɔ, do kɔ̃a zã 'da mɔ.

¹² Aa NWA, mi ĩ na, mɔ lá sɛ fala dɛ 'bako hã mi gɔ, mɔ kpasa sɛ mi fai do kɔ̃a zã 'da mɔ.

¹³ Ngamɔ linggi mi zĩ takpa, ma dɔ wena, nɛ mi wè tɛ tɔlɔ ma tɔla gɔ. Mi kpa si olo 'dã mɛnɔ 'da mi, nɛ ma nɛa ngɔ mi do'do, nɛ mi wè 'bɔ tɛ zɔ ma gɔ. 'Dã mɛnɔ 'da mi dɔa ɔ nɛ mili zu wi ni, nɛ gbãlã zã mi bi tɛ nɛ do'do.

¹⁴ Aa NWA, mɔ gbáká mi, mɔ tɛ́ hã mɔ kpasa mi.

¹⁵ E kɔ owinɔ kɛ wa fa we gbɛ mi ni, li wa fele, nɛ wa dungu do sape. E kɔ wanɔ kɛ wa kpa yangga zɛlɛ tɛ 'da mi ni, sako li wa 'danga, nɛ wa si do sape.

¹⁶ E kɔ winɔ kɛ wa mɔmɔ mi gbɔlɔ gbɔlɔ ni, zu wa dĩlĩ do sape, hã wa kpé nu wa.

¹⁷ Nɛ nde e kɔ owinɔ 'da mɔ vɛ̃, wa dɛ yangga, nɛ wa te salangga we mɔ. E kɔ winɔ vɛ̃ kɛ wa kɔ̃a gɛnɛ mɔ na, mɔ a wi kpasa wa ni, wa tɔ̃ fai na: “Mɔ NWA, mɔ gã wena!”

¹⁸ Aa NWA, mi a wi sã, mi a wi 'bako, nɛ nde mɔ lingga do mi. Wi gbaka mi, do wi bi bolo ngɔ mi, wi a mɔ. Aa Gale 'da mi, mɔ tɛ dà'bà tɛ mɔ gɔ, mɔ tɛ́ dɔ̃, hã mɔ gbaka mi.