Zumanɔ 39 - WE NU GALE 1995

Wi zɛlɛ gbala 'dã mɛ 'da a

¹ Zuma 'da Davidi

² Mi tɔ̃a na: Mi nɛ dɛ to tɛ mi do dia nɛ, nɛ mi wélé sɛ 'dã we gɔ, dɔ ma fí mi li 'dã mɔ gɔ. Fala kɛ mi mba ngba mi do o'dã winɔ, nɛ nde mi tɔ̃́ sɛ mbamba we kpo gɔ.

³ Ma hã mi ɛnzɛ nu mi, nɛ mi wèlè we gɔ, mi tɔ̃̀ lɛnggɛ dia mɔ gɔ. Gɛnɛ kɔ na mɛ ni, nɛ zɛlɛ tɛ 'da mi, ma gã dɛ dati gã fai.

⁴ Kɔ zã mi anga do linggamɔ, nɛ sila mi dɛ ngɔ ngbũu, nɛ mi 'bã nu mi, nɛ mi aka na:

⁵ “Aa NWA, mi nɛ fe soe ki nge nde? Mi 'bana tɛ dungu nza wena nde? E kɔ mɔ be tũ fio 'da mi hã mi ĩ ti nɛ.”

⁶ Mɔ dɛa dungu nza 'da mi dùlù gɔ, nɛ tũ kpasi 'da mi ngɔ nù gɛ, ma hɔ̀ mɔ li mɔ gɔ. Gɛnɛ kɔ wi kɛ a 'bana ngɔ nga tɛ̃ a ni, a ɔ li mɔ nɛ bũ ni.

⁷ Wi ni la, nɛ a kpolo tɛ̃ a nɛ́ gɔ̃lɔ̃ ni. Mɛnɔ vɛ̃ kɛ a dɛ ni, ma yala iko. A ngɛmɛ li okpamɔ, nɛ nde a ĩ̀ ti wi nɛ dungu ngɔ ma olo a ni gɔ.

⁸ Aa NWA, mi nɛ gbini zã mi do ge nde? Mi gbini zã mi do mɔ iko.

⁹ Mɔ kpásá mi kɔ 'dã mɛnɔ mi dɛa ni vɛ̃, mɔ tɛ là yɔndɔ winɔ hã wa mɔmɔ mi gɔ.

¹⁰ Mi kpia nu mi, mi wélé 'bɔ we gɔ, we kɛ wi a mɔ a mɔ zɛlɛ tɛ mi.

¹¹ Mɔ tɛ ha 'bɔ etumbu hã mi gɔ, we kɛ mi nɛ fe zɛa wi kɛ mɔ zɛ mi ni fia.

¹² Mɔ nɛ bɔlɔ wele, nɛ mɔ hã etumbu hã a olo 'dã mɛnɔ 'da a, nɛ mɔ 'danga mɛnɔ a kɔ̃a ni, ɔ nɛ kɛ gbɛzɛ 'danga tɔa ni. Gbãlã we, wele vɛ̃ la nɛ bũ ni iko.

¹³ Aa NWA, mɔ zélé sambala 'da mi, mɔ gɛ́ zala mɔ hã mɔ zélé sa mɛ 'da mi, mɔ gbáká mi 'da fala kɛ mi tɛ he kɔ̃a ni. Mi a gɛnɛ 'da mɔ 'do be kɔ̃ tũ iko, ɔ nɛ kɛ oyaa mi vɛ̃ wa zi a gɛnɛ 'da mɔ ni.

¹⁴ Mɔ tɛ fèlè li mɔ dɛ tɛ mi gɔ, mɔ e mi hã mi dɛ yangga dati kɛ na mi la hã mi futu ni.