Zumanɔ 38 - WE NU GALE 1995

Sambala ala nu mɔ́ wi zɛlɛ

¹ Zuma 'da Davidi

² Aa NWA, mɔ tɛ ha 'bɔ etumbu hã mi gɔ, mɔ mbɔkɔ sila mɔ dɛ tɛ mi.

³ Mɔ ndɔla mi do Okpilinɔ 'da mɔ, mɔ zɛa mi, nɛ mɔ fi mi nù.

⁴ Dã ba mɔ dɛ tɛ mi, nɛ mɔ hã zɛlɛ tɛ hã mi wena. Ti ndala tɛ mi vɛ̃ kpa zɛlɛ, we duzu 'dã mɛnɔ 'da mi.

⁵ O'dã mɛnɔ 'da mi ma gulu zu mi, nɛ dĩ nɛ ma nɛa ngɔ mi do'do.

⁶ Daninɔ 'da mi ma mbulu, nɛ ma hulu do mã. Ma dɛ ni tua do yɔnda 'da mi.

⁷ Mi 'bɔa hɛɔɔ, nɛ mi mbɔka vɛ̃, nɛ kɔ̃ tũnɔ vɛ̃, mi dungu ɔ nɛ wi gɛla ni.

⁸ Nga zɛlɛ ba mi, nɛ tɛ mi ba we kpangbangba.

⁹ Mi do ngawi bina, mi mbɔkɔ wena, nɛ mi zɛ nu mi do 'bako.

¹⁰ Aa NWA, mɔ ĩ ti mɛnɔ mi dɛ wɔ tɛ nɛ ni. Mi ama gba ama, nɛ nde mɔ yɔ́ ti nɛ gɔ.

¹¹ Sila mi tɛ to nɛ, ngawi 'da mi ia do'do, nɛ gbali mi tó 'bɔ gɔ.

¹² Oyali ngba mi do ongba mi wi tɔanɔ wa dɛa kili dani 'da mi, nɛ wa yu mi do'do. Gɛnɛ kɔ onya mi ngboo wa kɔ́lɔ́ do mi gɔ.

¹³ Owinɔ kɛ wa fa we gbɛ mi ni, wa ndɔa bili hã mi. Owinɔ kɛ wa kɔ̃a we zɛlɛ tɛ mi ni, wa yɛnggɛ tɛ tɔ̃ tɛ mi, nɛ wa fa we 'danga zu li mi.

¹⁴ Nɛ nde mi, mi kpia zala mi, nɛ mi zélé mɔ kpo gɔ. Mi wélé we kpo gɔ ɔ nɛ kɛ nu mi lɔ lɔnda ni.

¹⁵ Mi ɔ nɛ wi la zala ni, nɛ mi gésé nu we kpo gɔ.

¹⁶ Nɛ nde mi gbini zã mi do mɔ NWA, nɛ mi 'bɔ na, mɔ NWA Gale 'da mi, mɔ gese nu we hã mi.

¹⁷ Mi aka mɔ na, mɔ tɛ là owi sɛnɛ mi hã wa mɔmɔ mi do 'da fala ngamɔ gɔ. Fala kɛ mi te, nɛ mɔ tɛ là wa, hã wa dɛ wali ngɔ mi gɔ.

¹⁸ Zɛlɛ tɛ 'da mi 'bana fai, nɛ mi kɔlɔ do fio ia.

¹⁹ Mi gbala 'dã mɛnɔ 'da mi, nɛ kili ba mi we duzu ma.

²⁰ Owi sɛnɛ mi wa a ozagbãlã, nɛ wa nganda wena. Owinɔ kɛ wa sɛnɛ mi yala iko ni, wa dɛlɛ wena.

²¹ Wa gese 'dã mɔ hã mi olo dia mɔ, nɛ wa bɛ̃ gɛnɛ mi, we kɛ mi dɛ mɔ do bɔlɔ nɛ.

²² Aa nwa, mɔ tɛ là mi gɔ. Aa Gale 'da mi, mɔ tɛ nyɛlɛ do mi gɔ.

²³ Mɔ tɛ́ dɔ̃, hã mɔ gbáká mi. Mɔ nwa, mɔ a wi kpasa mi.