Zumanɔ 37 - WE NU GALE 1995

Mɔ gbíní zã mɔ do NWA

1 Zuma 'da Davidi

¹ Zuma 'da Davidi Sila mɔ tɛ zèlè dɛ tɛ o'dã winɔ gɔ, nɛ mɔ tɛ dɛ̃ bɔnɛ dia mɛnɔ 'da wa gɔ.

² We kɛ wa 'danga sɛ da dɔ̃, ɔ nɛ kɛ wɔkɔsɔ fele, nɛ ma kolo ni.

³ Mɔ gbíní zã mɔ do nwa, nɛ mɔ dɛ́ mɔ tɛ mɔ ɔ bɔlɔ, nɛ mɔ 'bana sɛ dɛ ngɔ nùi gɛ, nɛ mɔ kpa sɛ dungu fio.

⁴ Mɔ fá we kpa yangga kɔ NWA, nɛ a hã sɛ mɛ mɔ kɔ̃a ni hã mɔ.

⁵ Mɔ ha tɛ mɔ hã NWA, mɔ gbíní zã mɔ do a, nɛ a gbaka sɛ mɔ.

⁶ Nɛ a gbɛ sɛ dia we hã mɔ, nɛ bɔlɔ zu 'da mɔ ma to ɔ nɛ wese kɛ ma hɔa gbogbo zu wi ni.

⁷ Mɔ mbɔ́kɔ́ sila mɔ dati NWA, nɛ mɔ 'bɔ 'da mɛ kɛ a nɛ dɛ ma ni. Gɛnɛ kɔ 'dã wele kpa de mɔ, tabi 'dã mɛnɔ kɛ a 'dafa hã a dɛ ma ni, ma Sɔkpɔ do dia nɛ, nɛ zã mɔ tɛ nɔ̃̀lɔ̃̀ dɛ tɛ̃ a gɔ.

⁸ Mɔ bɛ̃ gɛnɛ nɔ̃lɔ̃ zã do zɛlɛ we, we kɛ ma kã sɛ mɔ li 'dã wala.

⁹ Owinɔ kɛ wa gbini zã wa do NWA ni, wa sɛ a wele nùi gɛ, nɛ nde NWA a fo sɛ Owi dɛ 'dã mɛnɔ ngɔ nùi gɛ do'do.

¹⁰ Ngba soe nɛ ma kɔla ia, wi dɛ 'dã mɔ 'báná sɛ 'bo go. Mɔ fa sɛ wa zãa, mɔ kpá sɛ 'dã wi kpo gɔ.

¹¹ Nɛ nde Owi dia silanɔ wa ba sɛ nùi, nɛ wa sɛ do dia dungu ngboo.

¹² 'Dã wele ba zã zu we dɛ ngɔ wi bɔlɔ zu, nɛ a fele li a de tɛ̃ a.

¹³ Nɛ nde NWA mɔmɔ 'dã wi ni, we kɛ a ĩ na tũ gɔnɔ ngbangga 'dɛ ɛ kɔla ia.

¹⁴ 'Dã wele gbɔtɔ du kɔya tabi kpili 'da a, nɛ a e tɛ wi sã tabi wi 'bako, nɛ a fa we gbɛ wi bɔlɔ zu.

¹⁵ Nɛ nde kpili ni ma gbini sɛ, nɛ du kɔya ma gbo sɛ sila a wele nɛ.

¹⁶ Gɛnɛ kɔ dia wele do kpamɔ sĩ iko, kɔ o'dã winɔ wa do kpamɔ wena, nɛ nde be kpamɛ 'da dia wele, ma nɛa ngɔ gã kpamɛ 'da o'dã winɔ.

¹⁷ Mba gɔ, NWA a fo sɛ ngawi 'da o'dã winɔ, nɛ a yolo sɛ gba sala 'do Owi bɔlɔ zunɔ.

¹⁸ NWA zɔ mɔ tɛ Owi dɛ de mɛnɔ, nɛ nùi kɛ a hã ma hã wa ni, ma 'bana sɛ do mɔ́ wa fai.

¹⁹ Wa kpá sɛ sape do li zɔlɔ ngamɔ gɔ, nɛ do 'da fala gba wɔ wa sɛ do nyɔngɔmɔ wena.

²⁰ Nɛ nde o'dã winɔ wa fe sɛ. Winɔ kɛ wa sɛnɛ NWA ni, wa 'danga sɛ ɔ nɛ fulɛlɛ, nɛ wa la sɛ ɔ nɛ zɛ̃ we ni.

²¹ 'Dã wi ba ku'da kɔ wele, nɛ a gésé gɔ, nɛ nde wi bɔlɔ zu hã mɔ hã wele do dia zã iko.

²² Owinɔ kɛ NWA wele nu ɛ tɛ wa ni, wa ba sɛ nùi do mɔ́ wa. Nɛ wanɔ kɛ a fɔmbɔ wa ni, a fo sɛ wa di ni do'do.

²³ Wi kɛ dɛa to tɛ̃ a ɔ dia ni, NWA zɔ mɔ tɛ̃ a, nɛ a kpe dati a li dia wala.

²⁴ Fala kɛ wi ni te, nɛ nde a 'báná dɛ nù ni gɔ, we kɛ NWA 'be nu kɔ̃ a, nɛ a ba a dɛ ngɔ.

²⁵ Mi zi a be, nɛ mi ɔa gbaa nɛ mi dɛ kpasa wi, nɛ nde mi zɔ̀ mbe na, NWA da kɔ̃ ɛ tɛ wi bɔlɔ zu gɔ, nɛ mi zɔ̀ mbe be zã wi bɔlɔ zu tɛ gɔ nyɔngɔmɔ gɔ.

²⁶ 'Da fala fai, wi bɔlɔ zu ĩ 'bako, nɛ a 'dɔlɔ mɔ hã Owele, nɛ obe zã wi bɔlɔ zu wa kpa dia wila nu.

²⁷ Mɔ bɛ̃́ gɛnɛ dɛ 'dã mɔ, nɛ mɔ dɛ́ de mɔ, nɛ obe zã mɔ wa 'bana sɛ ngɔ nù gɛ fai.

²⁸ We kɛ NWA kɔ̃a gɛnɛ bɔlɔ zu dɛa mɔ, nɛ a dá li a ngɔ owinɔ 'da a gɔ. A zɔ mɔ tɛ wa ndɔti nɛ bina, nɛ nde a fo sɛ obe zã 'dã winɔ do'do.

²⁹ Owi bɔlɔ zunɔ wa ba sɛ nùi, nɛ wa ɔ sɛ dɛ di ni fai.

³⁰ Wi bɔlɔ zu tɔ̃ gbãlã zã lɛnggɛ, nɛ lɛnggɛ nu a ɔ bɔlɔ.

³¹ A usu mbula 'da Gale 'da a dɛ kɔ zã a, nɛ a lá fala dɛ ma gɔ.

³² 'Dã wi wɛ wi bɔlɔ zu, nɛ a fa we gbɛ a.

³³ Nɛ nde NWA lá wi bɔlɔ zu dɛ kɔ̃ Owi sɛnɛ a gɔ. Fala kɛ a do ngbangga, nɛ nde NWA lá a na, wa gbɛ 'dã we hã a gɔ.

³⁴ Mɔ gbíní zã mɔ do NWA, nɛ mɔ dɛ́ mbulanɔ 'da a. Mɔ dɛ ní, nɛ a hã sɛ dɔ̃lɔ̃ li hã mɔ, nɛ a e sɛ mɔ do wele nùi, nɛ mɔ zɔ sɛ o'dã winɔ tɛ fo tɛ wa di ni.

³⁵ Mi zɔa zi mbe wele kpo, a zɛlɛ zi tɛ winɔ wena do mbana. A nganda zi nɛa ngɔ winɔ vɛ̃, ɔ nɛ gã te sɛdrɛ nɛa ngɔ ote kɔ kɔla Libanɛ vɛ̃ ni.

³⁶ Kɔ olo nɛ la sĩ, nɛ mi la do di ni, nɛ nde fo 'bɔ a bina. Mi fa a zãa, nɛ mi kpà a gɔ.

³⁷ Mɔ ká mɔ hã mɔ zɔ dia wi, mɔ sókó wi bɔlɔ zu kɛ a do gɛ̃a sila, wi ni, a ko obe zã a, nɛ wa nɛ ngɔ.

³⁸ Nɛ nde o'dã winɔ wa kumu vɛ̃, obe zã wa wa ia do'do.

³⁹ NWA kpasa Owi bɔlɔ zunɔ, nɛ a kele zu wa do 'da fala ngamɔ.

⁴⁰ A gbaka wa, nɛ a amba zu wa. A kpasa wa ti kɔ̃ o'dã winɔ, we kɛ wa yu dɛ 'da a na, a kele zu lo.