Zumanɔ 36 - WE NU GALE 1995

'Dã dɛa mɛ 'da wele

¹ Zuma 'da Davidi

² Fala kɛ wele dɛ 'dã mɔ, nɛ ma ɔ nɛ kɛ wele tɔ̃ 'dã mbula hã a tɛ kɔ sila a tɔ̃a ni. Nɛ a lengge na, ɛ wè we dɛ kili Gale gɔ.

³ Nɛ́ kɛ a zɔ na, ɛ a wi dĩ ni, a wè tɛ ĩ ti 'dã mɛ 'da a, kɔ a bɛ̃ gɛnɛ ma gɔ.

⁴ A ĩ tati a ti wele 'dã we do tɔ̃ bɛlɛ. Dia dɛa mɔ do gulu nɛ li a 'bɔ bina.

⁵ A ɔ nù do tũi, nɛ a 'dafa 'dã mɔ we dɛ ma. A dɛ́ de mɔ fala kpo gɔ, a kɔ̃a fai we dɛ 'dã mɔ.

Dia dɛa mɛ 'da Gale

⁶ Aa NWA, kɔ̃a zã 'da mɔ we owinɔ 'da mɔ, ma gã la mɔ vɛ̃. Dia zã 'da mɔ nɛa gbaa li nza i.

⁷ Bɔlɔ zui 'da mɔ ma nɛa ngɔ mɔ vɛ̃, ɔ nɛ ngala kala ni, nɛ 'bili we 'da mɔ do 'du gulu nɛ, ɔ nɛ gba 'du lì ni. NWA, mɔ a mɔ kpasa owinɔ do osa'denɔ.

⁸ Aa Gale, kɔ̃a zã 'da mɔ ma dia la li ngele. Owinɔ wa usu tɛ wa ti gɔ̃lɔ̃ 'baka mɔ.

⁹ Mɔ hã dia nyɔngɔmɔ hã wa, nɛ wa nyɔngɔ, nɛ dia zã 'da mɔ fo ɔ nɛ lì ni na, wa nɔ.

¹⁰ Mɔ a wele kpasi, lɛ zɔ sa fala we yele ngbala 'da mɔ.

¹¹ Mɔ bé kɔ̃a zã hã Owi ĩ ti mɔ fai, nɛ mɔ dɛ́ dia mɔ hã Owi bɔlɔ zunɔ.

¹² Mɔ tɛ là owi walinɔ hã wa le 'da mi gɔ, nɛ mɔ tɛ è o'dã winɔ hã wa ndaka mi gɔ.

¹³ Mɔ zɔ́ o'dã winɔ, wa zɔlɔ dɔndɔ, nɛ wa te, nɛ wa wè 'bɔ we kulu ngɔ gɔ.