Zumanɔ 35 - WE NU GALE 1995

Sambala ala nu wi hã Gale

1 Zuma 'da Davidi

¹ Zuma 'da Davidi Aa NWA, mɔ sɛ́nɛ́ owi sɛnɛ mi, nɛ mɔ bí do owinɔ kɛ wa bi mi ni.

² Mɔ kúlú ngɔ, nɛ mɔ he'de tulu bolo, nɛ mɔ ba ngele dɛ kɔ̃ mɔ, hã mɔ tɛ we kpasa mi.

³ Mɔ kúsú sɛlɛ do za 'da mɔ ngɔ, nɛ mɔ bi do Owi ndaka 'do mi. Mɔ bé hã mi na, mɔ kpasa sɛ mi.

⁴ E kɔ owinɔ kɛ wa ba zã zu we, nɛ wa fa we gbɛ mi ni, wa kpolo tɛ wa 'do do sape.

⁵ E kɔ anzɛ 'da NWA ndaka wa, nɛ wa pɛsɛ ɔ nɛ kɛ bũ pɛsɛ 'bulu wɔkɔsɔ ni.

⁶ E kɔ 'da fala kɛ anzɛ 'da NWA nɛ ndaka 'do wa ni, nɛ NWA fi gba tũ ngɔ wala 'da wa, nɛ ma dɛ dɔndɔ.

⁷ Wa ndɔa bili hã mi, nɛ wa gu kɔ̃ hã mi, nɛ nde fo gulu nɛ kpo bina.

⁸ E kɔ ngamɔ gbanga wa, e kɔ wa wele nɛ wa te kɔ̃ɛ wa gu ni, hã wa fe.

⁹ Nɛ mi, mi dunu sɛ do yangga, we duzu kɛ nwa kpasa mi ni.

¹⁰ Nɛ mi tɔ̃ sɛ do sila mi kpo na: “Aa nwa, wele kpo wè kɔ̃ do mɔ gɔ. Mɔ kpasa wi 'bako ti kɔ̃ onga winɔ, kɛ wa fa we zɛlɛ tɛ̃ a ni.”

¹¹ Owi 'bili bɛlɛ wa kulu ngɔ dɛ tɛ mi, nɛ wa aka mi ngɔ we kɛ mi ĩ̀ gulu nɛ gɔ.

¹² Wa gese 'dã mɔ olo dia mɔ hã mi, nɛ wa la mi do sã.

¹³ Owi sɛnɛ mi wa ba zi zɛlɛ, nɛ mi dɛa zi 'bako tɛ wa, nɛ mi ba zi tɛ mi dɛ nù, nɛ mi sambala we wa do kɔ sila mi fai.

¹⁴ Mi hi'da zi tulu gɛla, nɛ mi dɛ zi to tɛ mi hã wa, ɔ nɛ kɛ mi dɛ hã nya mi, tabi yali ngba mi ni. Mi dɛ zi mɛnɔ vɛ̃, ɔ nɛ kɛ naa mi ngboo fi fia ni.

¹⁵ Nɛ nde do 'da fala kɛ mi kɔ ngamɔ, nɛ wa mba li ngba wa we mɔmɔ mi. Gɛnɛ kɔ ogele wele kɛ mi ĩ ti wa gɔ ni, wa hia mɔ zu mi fai.

¹⁶ Wa linggi mi, nɛ wa mɔmɔ mi, nɛ wa fele li wa dɛ tɛ mi.

¹⁷ Aa nwa, mɔ nɛ ka mɔ tɛ mi do li mɔ iko, gbaa soe ki nge nde? Mɔ fó mi kɔ ngamɔ, mɔ kpásá mi ti kɔ̃ o'dã winɔ, kɛ wa bi mi ɔ nɛ ogbɔgbɔnɔ gɛ.

¹⁸ Nɛ mi dɔnggɔ sɛ mɔ tɛ kɔ mba li ngba wi 'da owinɔ 'da mɔ, nɛ mi tɔ̃ sɛ dia zu li mɔ dɛ sanga ogba dɔa winɔ.

¹⁹ Mɔ tɛ là owinɔ kɛ wa bɛ̃a gɛnɛ mi ni na, wa nɛ ngɔ mi hã wa mɔmɔ mi gɔ. Mɔ tɛ là owinɔ kɛ wa sɛnɛ mi yala iko ni na, wa fi gbɛlɛgbɛsɛ ngɔ mi gɔ.

²⁰ Fo lɛnggɛ dɛa na nu wa bina, nɛ wa kũ bɛlɛ dɛ tɛ owi gɛ̃a silanɔ.

²¹ Wa he mɔ zu mi na: “Yee yee, lɛ zɔa 'dã mɛ kɛ mɔ dɛa ni do li lɛ ngboo!”

²² Nɛ nde nwa, mɔ ĩ ti mɛ ma la ni. Mɔ tɛ kpè nu mɔ gɔ, NWA, mɔ tɛ là mi ndũu gɔ.

²³ Aa NWA Gale 'da mi, mɔ kúlú ngɔ hã mɔ 'bili ngbangga 'da mi, nɛ mɔ bé dia gulu we 'da mi dɛ nza.

²⁴ NWA Gale 'da mi, mɔ a wi bɔlɔ zu, mɔ 'bílí ngbangga 'da mi do bɔlɔ nɛ, takɔ wa la fala mɔmɔ mi.

²⁵ Mɔ tɛ là owi sɛnɛ mi hã wa mɔmɔ mi na: “Lɛ kpa a ia, fo mbé mɔ kɔ̃ a bina” gɔ.

²⁶ E kɔ owinɔ kɛ wa dɛ yangga we duzu 'bakoe 'da mi ni, wa kpa sape. E kɔ owinɔ kɛ wa dɛ gã zu dati mi ni, wa usu li wa do sape.

²⁷ Nɛ nde e kɔ owinɔ kɛ wa kɔ̃a na, wa gbɛ dia we hã mi ni, wa dɛ yangga, nɛ wa dala nu wa tɛ tɔ̃ na: “NWA gã nɛa ngɔ mɔ vɛ̃, a do yangga we fo wi dɛa toe 'da a kɔ ngbangga.”

²⁸ Na mɛ ni, nɛ mi do tɛ mi, mi tɔ̃ sɛ lɛnggɛ bɔlɔ zui 'da mɔ NWA, nɛ mi dɔnggɔ sɛ mɔ fai.