Zumanɔ 34 - WE NU GALE 1995

¹ Zuma da Davidi

² Mi gese sɛ iɔ̃nae hã NWA 'da fala fai, nɛ mi mbɔ́kɔ́ sɛ tɛ dɔnggɔ a gɔ.

³ Mi dɛ sɛ wali we NWA Gale. E kɔ owi 'bakonɔ wa zele sambala 'da mi, nɛ wa dɛ yangga.

⁴ Nɛ tɛ́, hã nɛ mba do mi fala nɛ kpo, hã lɛ tɔ̃ lɛnggɛ gã wi 'da NWA, nɛ lɛ be dɔlɔ li 'da a dɛ nza.

⁵ Mi sa mɔ hã NWA, nɛ a kɔ̃a nu mi, nɛ a fua kili tɛ mi.

⁶ Owinɔ kɛ wa siki li wa dɛ 'da a ni, wa dunu do yangga, nɛ mbé sape bá li wa gɔ.

⁷ Wi 'bako kpo sa mɔ hã NWA, nɛ a zele, nɛ a kpasa a kɔ ngamɔ.

⁸ Owinɔ kɛ wa yu kili NWA yu ni, anzɛ 'da a zɔ́ mɔ tɛ wa, nɛ a kpasa wa kɔ ngamɔ.

⁹ Nɛ zɔ́ gã dia zã 'da NWA, hã nɛ kɔ gɛnɛ ma. Wi kɛ NWA amba zu a ni, a a wi yangga.

¹⁰ Aa nɛ, owinɔ 'da NWA, nɛ dɛ́ kili a. Owinɔ kɛ wa yu kili NWA yu ni, wa kpa mɛnɔ vɛ̃ kɛ wa zɔlɔ ma ni.

¹¹ Gba wɔ tia ngɔ ogbɔgbɔnɔ, nɛ nde owinɔ kɛ wa siki li wa dɛ 'da NWA ni, wa zɔlɔ mɔ kpo gɔ.

¹² Aa nɛ, obenɔ 'da mi, nɛ tɛ hã nɛ zele mi sɛ. Mi nɛ be hã nɛ na, nɛ ĩ ti dɔnggɔ NWA.

¹³ Wi kɛ a kɔ̃ na, ɛ kpasa do dia nɛ, nɛ ɛ dungu do yangga ngɔ nù gɛ ni,

¹⁴ nɛ ma wia na, a tɛ tɔ̃̀ bɛlɛ gɔ, nɛ a tɛ tɔ̃̀ tɛ ngba a gɔ.

¹⁵ A bɛ̃́ gɛnɛ dɛ 'dã mɔ, nɛ a dɛ de mɔ, nɛ a ba tɛ̃ a vɛ̃ we fa na, a e dungu fio sanga owele.

¹⁶ NWA zɔ mɔ tɛ owi bɔlɔ zunɔ, nɛ a gɛ zala a we zele sa mɛ 'da wa.

¹⁷ Nɛ nde a bi do Owi dɛ 'dã mɛnɔ na, wa fe, hã ta zu wele ele ngɔ wa do'do.

¹⁸ Owi bɔlɔ zunɔ wa sa mɔ hã NWA, nɛ a zele gɛlɛ wa, nɛ a kpasa wa kɔ ngamɛ 'da wa vɛ̃.

¹⁹ NWA fala nɛ kpo do owinɔ kɛ sila wa 'bɔa, nɛ ngawi 'da wa ma ia ni, nɛ a kpasa winɔ kɛ gbãlã tɛ wa gbini, nɛ wa mbɔkɔ ni.

²⁰ Dia wi wia we kpa ngamɔ wena, nɛ nde NWA fo a kɔ ngamɛnɔ ni vɛ̃.

²¹ NWA zɔ mɔ tɛ gbãlã tɛ a vɛ̃ na, da dɛ kɔ mbe kpo gbíní gɔ.

²² Ngamɔ ma gbɛ sɛ o'dã winɔ, nɛ wi kɛ a sɛnɛ wi bɔlɔ zu ni, a kpa sɛ etumbu.

²³ NWA kpasa Owi dɛa tonɔ 'da a, nɛ owinɔ kɛ wa yu dɛ 'da a ni, wa té sɛ li ngbangga gɔ.