Zumanɔ 33 - WE NU GALE 1995

Zuma we dɔnggɔ do Gale

¹ Aa nɛ, owinɔ 'da NWA, nɛ zɛ́ kɔ̃ nɛ hã a do yangga, we duzu dia mɛnɔ kɛ a dɛa ni. Nɛ, owi bɔlɔ zunɔ, nɛ dɔ́nggɔ́ a nɛ́ kɛ ma wia ni.

² Nɛ zɛ́ be kundu hã NWA, nɛ nɛ zɛ́ gã kundu we dɔnggɔ do a.

³ Nɛ gá mbé zuma hã a, nɛ nɛ zɛ́ dia zuma do yangga, we hã dɔ̃lɔ̃ li hã a.

⁴ Wila wenɔ 'da NWA mɛ a gbãlã we, nɛ mɛnɔ vɛ̃ kɛ a dɛ ni, mɛ a ngi mɔ.

⁵ NWA a wi bɔlɔ zu, a kɔ̃a we dɛ de mɔ. Kɔ̃a zã 'da NWA, ma kpa ngɔ nù gɛ vɛ̃.

⁶ NWA ba nu ɛ, nɛ a dɛa li nza. A tɔ́a kpo, nɛ wese, do zɛkɛ, do sɔlanɔ ma hɔa.

⁷ A mba li gba lìnɔ vɛ̃, nɛ a kpe nu nɛ dɛ tɛ fala kpo.

⁸ Aa nɛ, owinɔ ngɔ nù gɛ vɛ̃, nɛ yú kili NWA Gale, nɛ nɛ tana kili dati a.

⁹ Fala kɛ a tɔ̃ we, nɛ ma dɛ tɛ̃ ɛ. Fala kɛ a ba nu a, nɛ mɔ olo nɛ ma hɔ.

¹⁰ NWA 'danga mɛnɔ kɛ ogele winɔ wa 'dafa we dɛ ma ni, nɛ a kele ti ma do'do.

¹¹ Nɛ nde mɛnɔ kɛ NWA 'dafa, nɛ a kɔ̃a we dɛ ma ni, ma ɔ sɛ kɔ sabɛlɛ do sabɛlɛ.

¹² Owinɔ kɛ NWA a Gale 'da wa ni, wa a wi yangga. Mɛ a yangga we owinɔ kɛ a saka wa do mɔ́ a ni.

¹³ Yolo do li nza i, NWA ka mɔ gbaa nù nga, nɛ a zɔ owinɔ vɛ̃.

¹⁴ A dungu nù tɛ fala nwa 'da a, nɛ a ka mɔ ngɔ nù nga, nɛ a zɔ winɔ vɛ̃.

¹⁵ A a dɛa wa, nɛ a 'dafa hã zã wa do linggamɔ zu wa, nɛ a ĩ ti mɛnɔ kɛ wa dɛ ma ni.

¹⁶ Nwa kpo wè tɛ kpasa li bolo we duzu onga soda bolonɔ 'da a gɔ. Nɛ nga soda sí li bolo do lɔa tɛ̃ a we duzu ngawi 'da a gɔ.

¹⁷ Mbalata wè tɛ kpasa wele li bolo gɔ. Gɛnɛ kɔ a yu do ngawi 'da a vɛ̃, nɛ nde a hɔ́ nza kɔ bole gɔ.

¹⁸ Nɛ nde NWA zɔ mɔ tɛ owinɔ kɛ wa yu kili a, nɛ wa gbini zã wa do kɔ̃a zã 'da a ni.

¹⁹ A kpasa wa kɔ fio, nɛ a e wa do tunu li wa do 'da fala gba wɔ.

²⁰ Kɛ 'da lɛ, lɛ kala li lɛ dɛ tɛ NWA. A a wi gbaka lɛ, nɛ a kele zu lɛ nɛ́ ngele ni.

²¹ Sila lɛ do yangga we duzu a. Lɛ gbini zã lɛ do a kɛ a santo.

²² Aa NWA, lɛ kala li lɛ dɛ tɛ mɔ. E kɔ kɔ̃a zã 'da mɔ 'bana do lɛ fai.