Zumanɔ 32 - WE NU GALE 1995

Yangga do wi kɛ NWA fo ku'da 'dã mɔ zu a

1 Zuma 'da Davidi

¹ Zuma 'da Davidi Yangga do wi kɛ Gale fo ku'da 'dã mɔ zu a, nɛ a ele 'dã mɛ a dɛa ni.

² Yangga do wi kɛ a do 'dã hã bina, nɛ NWA zɔ́ a ɔ nɛ wi dɛ 'dã mɔ gɔ ni.

³ Zi dati, mi kpia zi nu mi, nɛ mi bɛ̃a zi we gbala 'dã mɛ 'da mi, nɛ ngawi 'da mi ma ia zi vɛ̃ tɛ he kɔ̃a tũ kpo kpo fai.

⁴ Do tũ, do gba wese, mɔ NWA, mɔ hã zi etumbu hã mi, nɛ mi mbɔkɔ zi vɛ̃, ɔ nɛ be bɔlɔ wɔkɔsɔ do zɔlɔ sabɛlɛ ni.

⁵ Mi zɔa ni, nɛ mi ùsù 'bɔ 'dã mɛ 'da mi gɔ, nɛ mi gbala ma vɛ̃ hã mɔ nwa, nɛ mɔ fua ku'da nɛ zu mi.

⁶ Na mɛ ni, do 'da fala kɛ owinɔ 'da mɔ wa kɔ 'bako, nɛ wa wia we sambala mɔ. Nɛ gɛnɛ kɔ ngamɔ yɛ'bɛ ngɔ nù gɛ ɔ nɛ hɛ̃a gba lì ni, nɛ nde ma kpá sɛ wa gɔ.

⁷ NWA, mɔ a fala usu do tɛ mi, mɔ kpasa mi kɔ ngamɔ. Mi ga zuma yangga, we kɛ mɔ amba zu mi, nɛ mɔ kpasa mi.

⁸ NWA tɔ̃a na: “Mi be sɛ li wala hã mɔ na, mɔ ba do ma. Mi tɔ̃ sɛ mbula hã mɔ, nɛ mi zɔ sɛ mɔ tɛ mɔ.

⁹ Mɔ tɛ dɛ̃ nga zu ɔ nɛ punda gɔ. We duzu nga zui 'da punda, ma hã wa fi fɛlɛ mɔ bolo kɔ nu a, nɛ wi dungu ngɔ a gbɔtɔ ma, sɛ nɛ a ba do li wala kɛ ma wia ni de ni. Kɔ mɔ tɛ dɛ̀ nga zu na mɛ ni gɔ, dɔ mɔ kpá ngamɔ gɔ.”

¹⁰ O'dã winɔ wa kpa sɛ ngamɔ, nɛ nde NWA be kɔ̃a zã 'da a hã owinɔ kɛ wa gbini zã wa do a ni, nɛ a fɔmɔ wa.

¹¹ Aa nɛ, owi bɔlɔ zunɔ, kɛ nɛ dɛ mɔ do wala olo nɛ ni, nɛ zɛ́ kaliã, nɛ nɛ dɛ́ yangga, we duzu dia mɛnɔ kɛ NWA dɛa ma ni.