Zumanɔ 31 - WE NU GALE 1995

Sambala 'da wi kɛ a gbini zã a do Gale

¹ Zuma 'da Davidi

² Aa NWA, mi yu dɛ 'da mɔ na, mɔ amba zu mi, mɔ tɛ hã̀ sape hã mi gɔ. Mɔ kpásá mi do bɔlɔ zui 'da mɔ.

³ Mɔ gɛ́ zala mɔ hã mi, nɛ mɔ wɛ́lɛ́ tɛ mɔ dɔ̃, hã mɔ kpasa mi. Mɔ kélé zu mi ɔ nɛ gba ngbo ni, nɛ mɔ bi ngɔ mi we kpasa mi.

⁴ Mɔ a kpangba ta kele zu mi, do gba ngbo amba zu mi. Mɔ kpé dati mi, nɛ mɔ kã mi, we lengge do dɔ̃lɔ̃ li 'da mɔ.

⁵ Mɔ tɛ è mi na, mi te li bili kɛ Owi sɛnɛ mi, wa ndɔa hã mi ni gɔ. Mba gɔ, mɔ a wi amba zu mi.

⁶ Aa NWA, mi kã tɛ mi hã mɔ na, mɔ zɔ́ mɔ tɛ mi. Mɔ a gbãlã we Gale, mɔ gɔna zu mi.

⁷ Mi sɛnɛ owinɔ kɛ wa dɔnggɔ ogale bɛlɛnɔ ni. Kɛ 'da mi, mi gbini zã mi do mɔ NWA.

⁸ Mi dɛ yangga, nɛ mi te salangga, we kɔ̃a zã 'da mɔ dɛ 'da mi. Mba gɔ, mɔ ĩ ti 'bako 'da mi, nɛ mɔ zɔa zɛlɛ tɛ 'da mi.

⁹ Mɔ là mi na, owi sɛnɛ mi wa ba mi gɔ. Nɛ mɔ dɛa na, mɔ kpo tɛ àmbà mi kɔ yali 'da mi gɔ.

¹⁰ Aa NWA, mɔ ĩ́ 'bako hã mi, we kɛ mi a kɔ ngamɔ. Li mi dunu do mili kɔ̃a, nɛ kili tɛ mi vɛ̃ do 'bako.

¹¹ Kpasi 'da mi ma Sɔkpɔ do ngamɔ, nɛ dungu nza 'da mi ma Sɔkpɔ do gba ama. Gbãlã tɛ mi ma gbini, nɛ ngawi 'da mi ma ia, we kɛ mi dɛa 'dã mɔ.

¹² Owi sɛnɛ mi vɛ̃ wa dã mi, nɛ ongba mi wi tɔanɔ, wa kala nu wa dɛ zu mi do dɛla. Owi ĩ ti mi wa dɛ kili mi, kɔ wa kpa mi li wala, nɛ wa la do yu.

¹³ Fo wi ĩ ti mi bina, ta zu winɔ ila ngɔ mi vɛ̃ ɔ nɛ kɛ mi fi fia ni.

¹⁴ Owi sɛnɛ mi wa linggi mi, wa ba zã zu mi we dɛ 'dã mɔ do mi, nɛ wa fa we gbɛ mi. Falanɔ vɛ̃, ma hã kili hã mi.

¹⁵ Nɛ nde mi, mi gbini zã mi do mɔ NWA, nɛ mi tɔ̃ na: “Gale 'da mi, wi a mɔ.”

¹⁶ Kpasi 'da mi fai dɛ tambala kɔ̃ mɔ. Mɔ fó mi ti kɔ̃ Owi sɛnɛ mi, do owinɔ kɛ wa zɛlɛ tɛ mi ni.

¹⁷ Mɔ kpɔ kɔ̃ mɔ ti mi, wi dɛa toe 'da mɔ. Mɔ kpásá mi do kɔ̃a zã 'da mɔ.

¹⁸ Aa NWA, mi sa mɔ hã mɔ, mɔ tɛ hã̀ sape hã mi gɔ. Nɛ nde mɔ ha sape hã o'dã winɔ, nɛ wa la do tũ nu wa dɛ kɔ le 'da ofionɔ i.

¹⁹ Mɔ kpé nu owi tɔ̃ bɛlɛnɔ, kɛ wa dɛ gã zu, nɛ wa tɔ̃ lɛnggɛ wali dɛ tɛ wi bɔlɔ zu, nɛ wa zɔ a li wa yala ni.

²⁰ Aa NWA, mɔ dɛa gã dia mɔ hã owinɔ kɛ wa yu kili mɔ ni. Mɔ hã gã yangga hã wa, nɛ owinɔ yerr wa zɔ ma.

²¹ Mɔ ia wa dɛ ti mɔ, nɛ mɔ usu wa na, dɔ 'dã mɛnɔ kɛ o'dã winɔ wa 'dafa ni, ma kpá wa gɔ. Mɔ usu wa dɛ kɔ tɔa 'da mɔ na, wa nyɛlɛ do ngalangba 'da o'dã winɔ.

²² Aa NWA, mi hã iɔ̃nae hã mɔ, we kɛ mɔ bia kɔ̃a zã 'da mɔ kɛ ma gã la li ngele ni hã mi. Owi sɛnɛ mi wa linggi zi mi,

²³ nɛ zu mi ma vĩ zi, nɛ mi lingga na, wa ndaka mi nyɛlɛ ndũu do mɔ ia. Nɛ nde mi sa mɔ hã mɔ, nɛ mɔ zila ala nui 'da mi, nɛ mɔ kpasa mi.

²⁴ Aa nɛ, owinɔ 'da NWA, nɛ kɔ̃́ gɛnɛ a. NWA zɔ mɔ tɛ owinɔ kɛ wa kɔ̃a gɛnɛ a ni. Nɛ nde a bili nu gbã hã Owi dɛ walinɔ, nɛ ma nɛ ngɔ 'dã mɛnɔ kɛ wa dɛa ma ni.

²⁵ Nɛ, owinɔ vɛ̃, kɛ nɛ gbini zã nɛ do NWA ni, nɛ ngo tɛ nɛ, nɛ nɛ kpãlã sila nɛ.