Zumanɔ 30 - WE NU GALE 1995

¹ Zuma 'da Davidi

² Aa nwa, mi sambala mɔ, we kɛ mɔ kpasa mi kɔ fio, nɛ mɔ là mi hã Owi sɛnɛ mi na, wa mɔmɔ mi gɔ.

³ Aa NWA Gale 'da mi, mɔ kpasa zi mi kɔ fio, we kɛ mi ala nu mi hã mɔ.

⁴ Aa NWA, nyanga mi zi a nu kɔ̃, nɛ mɔ fua mi kɔ le 'da ofionɔ, nɛ mɔ kpasa mi.

⁵ Aa nɛ, owinɔ 'da NWA, nɛ gá zuma hã a, nɛ nɛ tɔ̃́ dia zu li a na, a a santo.

⁶ Nɔ̃lɔ̃ zã 'da NWA ma ɔ́ gbaa gɔ, nɛ nde dia zã 'da a ma 'bana sɛ fai. Gɛnɛ kɔ mi he kɔ̃a do tũ, nɛ nde do titole, nɛ mi dɛ yangga.

⁷ Mi lengge zi na, mi do gɛ̃a dungu. Nɛ mi tɔ̃ zi na: “'Dã mɔ kpo dɛ́ sɛ 'bɔ mi gɔ.

⁸ Mi kpa zi ngawi wena we duzu mɔ NWA.” Nɛ nde mɔ siki 'do mɔ hã mi, nɛ kili ma ba mi.

⁹ Aa NWA, mi sa mɔ hã mɔ, nɛ mi ala nu mi hã mɔ na, mɔ gbaka mi.

¹⁰ Fala kɛ mi fe, kɔ wa mi mi, nɛ mɛ mɔ nɛ kpa sɛ olo fio mi ni a ge nde? Wele fe do'do, nɛ nde a wè tɛ dɔnggɔ 'bɔ mɔ gɔ, nɛ a wè tɛ tɔ̃ sako dia zã 'da mɔ gɔ.

¹¹ Aa NWA, mɔ ĩ́ 'bako hã mi, hã mɔ kpasa mi.

¹² Mɔ kifi zi zuma 'bakoe 'da mi do zuma yɔla yangga. Mɔ fua tulu gɛla tɛ mi, nɛ mɔ kpula ma do tulu ɛngga.

¹³ Na mɛ ni, mi ga zuma we dɔnggɔ do mɔ, nɛ mi ɔ́mɔ́ sɛ tɛ ga ma gɔ. NWA, mɔ a Gale 'da mi, mi sambala sɛ mɔ fai.