Zumanɔ 29 - WE NU GALE 1995

Wala gɛlɛ NWA wele ɔ nɛ ua dã kolo ni

1 Zuma 'da Davidi

¹ Zuma 'da Davidi Aa nɛ, oanzɛnɔ li nza gɛ, nɛ tɛ́ we dɔnggɔ NWA, nɛ nɛ tɔ̃ lɛnggɛ 'da a na, a do ngawi do dɔ̃lɔ̃ li wena.

² Nɛ tɛ́ we tɔ̃ lɛnggɛ dɔ̃lɔ̃ li 'da NWA. Fala kɛ a hɔ, nɛ nɛ gú nù dati a, we kɛ a a santo.

³ NWA Gale do nganda wena. Wala gɛlɛ a wele ɔ nɛ ua dã kolo ni. Ma wele nɛ ngɔ giti gba lì kɛ ma sulu ni, nɛ ma kpa ngɔ gba lìnɔ vɛ̃.

⁴ NWA wele we dɛ ngɔ, wala gɛlɛ a wele nganda wena.

⁵ Giti gɛlɛ a wele, nɛ ma gbini ogã te sɛdrɛnɔ tɛ ngɔ nù Libanɛ.

⁶ A wele we, nɛ kala Hɛrmoni, do okalanɔ tɛ ngɔ nù Libanɛ ma yaka, nɛ ma kpe'de dɛ ngɔ ɔ nɛ obe wili dua ni.

⁷ Giti gɛlɛ NWA wele, nɛ li nza ma nyɛ we ngbangge.

⁸ NWA wele we, nɛ li gba zɔ̃nɔ ma yaka, nɛ li gba zɔ̃ Kadɛsɛ ma tana.

⁹ Wala gɛlɛ nwa dɔ̃lɔ̃, nɛ ogã tenɔ ma yaka nderr, nɛ nwá nɛ ala nù hurr. Do 'da fala ni, nɛ owinɔ vɛ̃ kɔ Tɛmpɛloe 'da a i, wa tɔ̃ na: “Lɛ ha dɔ̃lɔ̃ li hã Gale!”

¹⁰ NWA Gale dungu nwa ngɔ ogba hɛ̃a lìnɔ, nɛ dɛa to nwa 'da a sɛ do ndɔti nɛ bina.

¹¹ Nwa a hã sɛ ngawi hã owinɔ 'da a. A wele sɛ nu a tɛ wa, nɛ a hã dia dungu hã wa.