Zumanɔ 28 - WE NU GALE 1995

Sambala we gɔ gbaka wi kɔ̃ NWA

1 Zuma 'da Davidi

¹ Zuma 'da Davidi Aa NWA, mɔ a wi kele zu mi. Mi sa mɔ hã mɔ, mɔ zélé mi sɛ! Mɔ bɛ̃ we kɔ̃ nu mi, nɛ mi ɔ sɛ nɛ fio ni iko.

² Fala kɛ mi kala kɔ̃ mi dɛ ngɔ, hã mi be ma si 'biti fala santoe 'da mɔ, hã mi ala nu mi hã mɔ we gɔ gbaka wi kɔ̃ mɔ, nɛ mɔ zélé mi sɛ!

³ Aa NWA, mɔ tɛ mbà mi do o'dã winɔ kɛ wa zɛlɛ tɛ ngba wa ni, hã mɔ hã etumbu hã mi gɔ. Wa tɔ̃ ɛ̃fɛ̃ nu hã ngba wa, nɛ nde kɔ sila wa ma dunu do mãlã ngurr.

⁴ Mɔ hã etumbu hã wa, nɛ ma we do 'dã mɛnɔ kɛ wa dɛ ma ni. Mɔ bílí nu gbã 'dã mɛnɔ kɛ wa dɛ do ngba wa ni hã wa, nɛ mɔ dɛ do wa ɔ nɛ kɛ ma wia ni.

⁵ Wa lénggé do mɛnɔ kɛ mɔ NWA, mɔ dɛ ma ni gɔ. Na mɛ ni, mɔ gbɛ́ wa, hã mɔ kumu wa ngɔ nù gɛ do'do.

⁶ Mi gese iɔ̃nae hã mɔ NWA, we kɛ mɔ zila ala nui 'da mi.

⁷ NWA, mɔ a ngele amba zu mi, mi gbini zã mi do mɔ, nɛ mɔ gbaka mi, nɛ sila mi do yangga, nɛ mi ga zuma we dɔnggɔ do mɔ.

⁸ NWA, mɔ zɔ́ mɔ tɛ owinɔ 'da mɔ, mɔ kélé zu nwa kɛ mɔ saka a ni, ɔ nɛ gba ngbo ni, nɛ mɔ kpasa a.

⁹ Mɔ kpásá winɔ 'da mɔ, mɔ wélé nu mɔ tɛ wa, nɛ mɔ zɔ́ mɔ tɛ wa kɔ sabɛlɛ do sabɛlɛ.