Zumanɔ 27 - WE NU GALE 1995

Sambala 'da wi kɛ Gale zɔ mɔ tɛ a

1 Zuma 'da Davidi

¹ Zuma 'da Davidi NWA a wi kpasa mi, a a nyɛa we kɛ ma yele ngɔ mi, mi wè tɛ dɛ kili wele kpo gɔ. NWA a wi amba zu mi, kili wè tɛ ba mi gɔ.

² Fala kɛ o'dã wele wa tɛ, kɔ wa fa we gbɛ mi, nɛ wa zɔlɔ, nɛ wa te do fio.

³ Fala kɛ odɔa wi bolo wa linggi mi we bi mi, nɛ nde sila mi ɔ̀ ngɔ gɔ. Gɛnɛ kɔ wa ndo bi mi, nɛ mi gbini zã mi fai do Gale.

⁴ Mɛ kɛ mi aka kɔ̃ NWA, mɛ tati a mɔ kpo iko, nɛ mɛ ni, mi do hɛ̃lɛ̃ we kpa ma. Mi kɔ̃a na, 'da fala fai, mi ɔ kɔ Tɛmpɛloe 'da NWA, nɛ mi dɛ yangga dia zã 'da a, nɛ mi yambala linggamɛ 'da a.

⁵ Hã fala kɛ ngamɔ nɛ kpa mi, nɛ NWA a amba sɛ zu mi, nɛ a usu mi kɔ Tɛmpɛloe 'da a. Nɛ a e sɛ mi ngɔ ngala kala na, da dɛ kɔ ngamɛ ni kpá mi gɔ.

⁶ Na mɛ ni, nɛ mi nɛ sɛ ngɔ Owi sɛnɛ mi, kɛ wa linggi mi ni. Nɛ mi he sɛ mɔ do yangga, nɛ mi hã dɔnggamɔ hã NWA tɛ kɔ Tɛmpɛloe 'da a. Nɛ mi ga zuma we dɔnggɔ do a.

⁷ Aa NWA, fala kɛ mi sa mɔ hã mɔ, nɛ mɔ zélé, nɛ mɔ ĩ 'bako hã mi, nɛ mɔ kɔ̃ nu mi.

⁸ Mɔ tɔ̃a zi hã mi na, mi siki li mi dɛ 'da mɔ, hã mi dɔnggɔ mɔ. Nɛ mi dɛa olo nu mɔ.

⁹ Mɔ tɛ bɛ̃̀ gɛnɛ mi gɔ, nɛ mɔ tɛ ndàkà mi, wi dɛa toe 'da mɔ, do nɔ̃lɔ̃ zã gɔ. Mɔ zi a mɔ gbaka mi, mɔ tɛ dà kɔ̃ mɔ tɛ mi hã mɔ la mi gɔ. Mɔ a Gale wi kpasa mi.

¹⁰ Gɛnɛ kɔ naa mi do baa mi, wa bɛ̃ sɔ gɛnɛ mi bɛ̃a, nɛ mɔ NWA, mɔ kpɔ sɔ kɔ̃ mɔ ti mi.

¹¹ Aa NWA, mɔ bé li wala 'da mɔ hã mi, nɛ mɔ kpé dati mi li dia wala. Mba gɔ, owi sɛnɛ mi wa dɔ wena.

¹² Mɔ tɛ là mi dɛ kɔ̃ Owi sɛnɛ mi gɔ. Wa 'bili bɛlɛ dɛ ngɔ mi, nɛ wa fa we zɛlɛ tɛ mi.

¹³ Mi ĩ de wena na, mi zɔ sɛ dia mɛnɔ kɛ mɔ NWA, mɔ dɛ sɛ we owinɔ 'da mɔ, tɛ ngɔ nùi kɛ lɛ ɔ nɛ gɛ ni.

¹⁴ Lɛ gbíní zã lɛ do NWA fai. Lɛ ngo tɛ lɛ, nɛ lɛ kpãlã sila lɛ. Lɛ gbíní zã lɛ fai do NWA.