Zumanɔ 26 - WE NU GALE 1995

Wi dia gulu we sambala Gale

1 Zuma 'da Davidi

¹ Zuma 'da Davidi Aa NWA, mɔ gbɛ́ dia we hã mi, we kɛ dɛa to tɛ mi a bɔlɔ, nɛ mi gbini zã mi do mɔ do sila mi kpo.

² Aa NWA, mɔ yámbá sila mi, nɛ mɔ fa we ĩ ti kɔ sila mi do linggamɔ zu mi.

³ Ta zu mi 'bana fai ngɔ dia zã 'da mɔ, nɛ mi yɛnggɛ li bɔlɔ wala 'da mɔ.

⁴ Mi dúngú fala nɛ kpo do owi dɛ ngatɛ gɔ. Nɛ mi yɛ́nggɛ́ fala nɛ kpo do owinɔ kɛ zu wa bɔa ɔ nɛ zu gindi ni gɔ.

⁵ Mi sɛnɛ mba li ngba wi 'da Owi dɛ 'dã mɛnɔ, nɛ mi kɔ̃̀ we hɔ 'da o'dã winɔ gɔ.

⁶ Aa NWA, mi fɔlɔ kɔ̃ mi we be na, mi do 'dã mɔ bina. Mi le sɛ kɔ Tɛmpɛloe 'da mɔ, nɛ mi zĩ do kɛ zã gbagala 'da mɔ we dɔnggɔ mɔ.

⁷ Mi ga sɛ zuma we gese iɔ̃nae hã mɔ, nɛ mi tɔ̃ sɛ lɛnggɛ gba mɛnɔ vɛ̃ kɛ mɔ dɛa ma ni.

⁸ Aa NWA, mi kɔ̃a gɛnɛ tɔa kɛ mɔ ɔ kɔ nɛ ni. Mɛ a fala kɛ mɔ be do dɔ̃lɔ̃ li 'da mɔ hã owele.

⁹ Mɔ tɛ gbɛ̀ mi fala nɛ kpo do owi dɛ 'dã mɛnɔ, tabi owi gbɛ winɔ gɔ.

¹⁰ Kɔ̃ wa ili do dɛ 'dã mɔ. Wele 'dɔlɔ de mɔ hã wa, sɛ nɛ wa dɛ to hã a de.

¹¹ Nɛ nde kɛ 'da mi, mɔ ĩ́ 'bako hã mi, nɛ mɔ kpasa mi.

¹² Sila mi ma bá we gɔ, we kɛ mi a tɛ dia fala. We duzu ma, mi hã iɔ̃nae hã mɔ NWA dɛ sanga ogba dɔa winɔ.